› 選擇地區
三藩市
紐約
洛杉磯
其他美國地區
香港 台灣 北美
 
2017年09月01日

【專題籽】「蝕到入肉就bye bye」 23歲女接手兒時糖果店

【專題籽:胚芽故事】
「呢隻波子汽水味啱啱到,可樂糖就得番檸樂味,其他唔夠嘅我可以即刻fill番!」第一次步入這間糖果店,還是有着以往的親切感,招牌一樣、氣味依舊,只是地址變了,老闆娘也變成23歲的溫淑琪(Suki)。

Double Happiness舊店座落於馬鞍山馬鐵站旁的馬鞍山廣場,是區內數一數二的大型商場,13年前開業,至今年5月底因為旁邊的「譚仔」擴充,無奈結業。「租務部話租約只有1年零10個月,同以往嘅兩年唔同,因為商場開咗二十幾年,呢個舖位要抽起裝修,初初都冇提過有舖頭要租呢個舖位。」前店主李少芬(Annie)憶起商場收舖的每一步仍帶點激動。商場向Annie提供所謂解決方法,但跟擺明車馬與趕走小店無異,「話畀個舖位我,但係三百幾呎,我要咁大間做乜,我賣吓糖,cover唔到租金,即係逼我哋結業。」

老闆傾囊相授 送埋招牌

結業的消息很快就在臉書上廣傳,不少街坊都感可惜和震驚,包括當時還沒打算成為老闆娘的Suki,「啞咗,好愕然!即刻衝落去問係咪真係唔做落去。」Suki叫Annie搬舖,搬往做美容院的媽媽在另一商場租的小舖位,「因為媽咪想搬去大舖,商場就有個細舖位可以出租。」不過決心退休的Annie斷言拒絕,跟Suki說:「我真係唔想做,不如你來做,我教你做,將舖頭所有嘢畀晒你,連招牌都畀埋你。」未有正職、剛從大專視覺傳意課程畢業的Suki,膽粗粗接受提議,以四位數字頂了糖果店來做,「如果真係執笠就冇得夾糖,硬係覺得有人要頂咗佢嚟做,咁不如趣趣哋,我頂咗佢啦!」
在舊店結業前,Suki特意到場實習一星期,Annie和丈夫將十多年來的經驗傾囊相授,由糖果保存方法到上架排位都教了,總之一切都交託給Suki,就連舊店的糖果櫃都是以極低的頂手費轉讓給她,Suki希望接手後一切如舊,「雖然老闆唔同咗,但起碼所有嘢都係以前嘅,入到嚟會有熟悉感覺,會憑感覺記得呢度係以前嗰間店。」

由細幫襯 不忍結業頂硬上 

能大方得連招牌都拱手相讓,全因Annie視Suki如己出。Suki小學時在糖果店旁上芭蕾舞班,一上完課便會去夾糖,「夾一大包,行又會食,坐又會食,口痕有嘢咬吓會舒服啲。」Annie回憶當時的情景還歷歷在目,「佢着住芭蕾舞褲跳吓跳吓,同你傾偈,同你玩,黐住你,摸住你,好似我個女咁。」Suki長大後仍經常會去夾糖,還跟Annie打牙骹,Annie說:「佢身邊嘅嘢、屋企人點,都會同我傾同我講,覺得呢個人冇機心。」信任就此建立,原本打算留給兒子的店舖最後也變成Suki的生意,「間舖最初諗住畀個仔十幾年前畢業嗰時做,但佢做唔嚟,因為男仔好難困喺度,而Suki就定性同乖啲,我教佢又會聽。」Suki下定決心要做好糖果店,但家人起初並不支持,「話呢啲搵唔到食,做嚟嘥心機,同業主打工冇分別。」不過眼見Suki用盡自己的私己錢默默耕耘,家人開始提供一點援助,還幫她打理賬目,「佢哋話見步行步啦,蝕到入肉就要bye bye。」開業近兩個月都未放過假,身體還開始有點吃不消,後悔嗎?「廿幾歲畀間舖困住,難免有少少驚自己後悔頂唔順,現在未後悔住,都洗濕咗個頭,無理由唔繼續做落去。」Suki謂假若他日真的支持不了,她也沒辦法,Annie就寄語她,「做咗個開頭,你跟住繼續做,唔好懶散就得了。生意係要守,冇理由話做生意可以包你啲乜。我希望你一路做落去,係好困身,但你都可以嘗試咁做,後生係要闖,唔闖嘅話,條路係行唔到落去。」

Double Happiness 喜喜
馬鞍山鞍駿街11號福安花園商場地下44號舖
facebook:doublehappinessmos

記者:李煒汯
攝影:許先煜、徐振國
編輯:馮秀珍

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載