› 選擇地區
三藩市
紐約
洛杉磯
其他美國地區
香港 台灣 北美
 
2017年09月30日

【果籽人話】獨臂女紋身師:我少一隻手之嘛,同普通人冇分別

坐在我面前的天兒(Alley),說話老積,一點也不像只得21歲,或許她的經歷,教她比一般同齡的人早熟。樣子甜美的她天生失去左前臂,從小就和人不一樣,家人自小就給予她很多正能量和正面思想,培養出開朗樂天的性格。16歲那年,正值反叛期,Alley偷偷紋身,在右手手腕紋了一個蝴蝶結圖案,「父母改我嘅中文名叫天兒,意思係上天畀佢哋嘅禮物,我紋蝴蝶結就係呢個意思。」紋身後回家告訴父母,沒有責罵,只關心她痛不痛,無論她做甚麼,家人總是支持,只要她開心就好。19歲時,讀完書的她決定做紋身師,「由細到大我都無諗過搵正常工,朝九晚五,打字文書嗰啲,又唔夠人哋十隻手指嘅打字快,我不嬲都唔鍾意讀書,但就好鍾意畫畫,又好鍾意紋身,覺得紋身師呢行應該幾適合我。」

因為身體的缺憾,令很多人覺得她甚麼都做不到,但她卻淡然說:「我同普通人根本無分別,只係少咗一隻手之嘛。我可以剪指甲、綁鞋帶、紮辮、煮飯,仲可以切絲!除咗打排球同打桌球之外,其實我無乜做唔到,生活上、紋身上嘅事我都有自己方法解決,只要想做一定做到。」以前剪不到指甲,她就苦練用左臂和大髀夾着指甲鉗來剪,她又想到將指甲油夾在左臂關節位,慢慢幫右手搽甲油,她還即場示範紮辮給我看,「好多人都唔信我紮到,啱啱先表演完畀其他紋身師睇。」
然而,他人的歧視目光始終避不了,「試過有個客人walk in嚟紋身,我向佢解釋一啲疑問,之後佢問係咪我紋,我話搵我或者我朋友都無問題,佢就話反正都係畀差不多價錢,不如搵個正常嘅人幫我做。當時我聽到無乜嘢,都無唔開心,但就記住咗喺心,呢件事令我更加努力,希望客人會係因為我嘅作品嚟搵我。」從小到大對於其他人的閒言閒語,她一點也不在乎,會選擇用開心方法處理和面對,「我唔係為其他人生存,如果太過在意其他人講乜會好難受。我好開朗,都希望呢個心態可以幫助到我事業。」
紋身是很費神費力的工作,對天生沒有左前臂的Alley來說,就更具挑戰,她會要求客人用姿勢配合她,好讓她紋得舒服一點,但由於身體長期向左傾,她的脊柱經常發炎,需要經常看醫生,聽見都辛苦,但她卻沒有想過放棄,「屋企人對我嘅支持,對我做呢行係好大嘅推動力,我做得紋身師,就有責任證明畀佢哋睇我係做得到,唔係玩玩吓,唔會半途而廢,一定要堅持,我目標唔係想好出名,只係想老老實實做好紋身技術,無論你外表係點,知名度有幾高,一切都唔重要,做紋身師最緊要做好技術。」
訪問前,Alley多次強調不太希望集中說她的缺憾,她只想透過自己的故事去鼓勵其他人,「成日有好多人質疑自己乜都做唔到,但諗吓其實好多人天生條件無你咁好,就連最基本的四肢健全都未必有,當你有條件時,就唔好用負面想法怨天怨地,唔好因為別人說話質疑自己,一定要堅持自己夢想同目標,相信自己,決定咗走呢條路就要做好佢。」今個星期舉行的紋身展,Alley也會參與,想支持她的不妨去撐場,和她聊聊天,吸收一點正能量。

第五屆香港中國國際紋身展2017
日期:9月29日至10月1日(星期五至日)
時間:上午10時至晚上10時(星期五、六);中午12時至晚上10時(星期日)
地點:啟德遊輪碼頭2樓Hall A
入場費:$188(1日通行證),$358(3日通行證)

記者:黃子配
攝影:梁志永

2017果籽繼續認真知味。識買惜用。行以求知。好事多為。重修舊好。
緊貼果籽報道,即like: http://fb.me/AS.AppleDaily

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載