› 選擇地區
三藩市
紐約
洛杉磯
其他美國地區
香港 台灣 北美
 
2018年01月28日

【最後一Rap】MastaMic寧刪大事多Rap小人物 記錄香港十年史

你未必認識Hip-Hop,但都應該聽過MastaMic(馬米)的《RAP UP》系列,每年年三十晚,風雨不改,至少Rap足六分鐘大小事,今年已來到第十年,不過亦是最後一Rap。

兩句、四句總結一則新聞,嬉笑怒罵,《RAP UP》嘅輕鬆得意曲風、合適嘅速度節奏,令大家可以聽清歌詞,馬米話專登做到老少咸宜,「即使你阿爸唔識Hip-Hop、不聽流行曲,都會聽一下。」2012年開始,社會時事嘅份量超越娛樂圈,馬米坦白:「最初係Gimmick,想多啲人認識馬米,去到第四、五年,我已經覺得不是抽水。」講起抽水,佢有啲激動,「我係音樂人,用我嘅創作手法去記錄,你會唔會話報紙同《頭條新聞》抽水?真係抽水嘅人唔會花咁多心機去做呢件事。」他拎起用環保紙做嘅筆記,幾廿頁紙,百分百手寫,用point form寫低大小新聞,小到「17年,最炎熱夏天,最高氣溫錄得36.6度,歷史紀錄以來最高」,即係睇晒全年報紙啊?忙緊準備3月新專輯《MastaPiece》同演唱會,「今年啲報紙仲未睇完啊,雖然我已經跳咗財經版,唔睇副刊,國際新聞只會睇最大幾則,體育都少睇,除非同香港好有關係,但份量真係好難啃。」如此動作,每年做一次,「我每年年尾都不想做,寫歌不難,最難是一掀報紙,心裏已經……365份啊大佬!最少要個半至兩個月。」堅嘔心瀝血,未正式訪問前,馬米帶記者睇佢嘅「收藏」──報紙,佢拿起大笑:「我唔係淨係睇《蘋果》,我會睇唔同報紙,去了解事件嘅完整層面。呢份係貴州人示威,我會收起我認為重要嘅新聞,仲有好多喺屋企。」《RAP UP》好多社會議題和敏感內容,每年都有唔少傳媒訪問,「對我來講,唔係因為這樣,而係一個簡單想法,想用音樂記錄香港。」係半個娛樂圈人、爭取曝光機會嘅馬米過去兩三年推咗關於《RAP UP》的訪問,寧願低調做史官。

過去十年,香港動盪,馬米說:「啱啱好撞到呢十年,歷史嚟講係好好,香港80至90年代大部份時間都風調雨順,你唔會看到人民的轉變。」頭幾年《RAP UP》,娛樂新聞佔一半,輕鬆搞笑為主,「但慢慢,我挑選的題材也隨時代、市民留意嘅事物改變。」李國章出任港大校委會主席事件、大白象撥款、免費電視牌照、新聞及言論自由,每年都跟得好貼,一口氣聽番呢幾年《RAP UP》系列,成個timeline出晒嚟,香港被吞噬嘅full picture顯而易見。民生同政治都好多大事,最令他深刻的卻是小人物,這幾年,馬米寧願刪減大事都要記小事,中環整遮阿伯2014年退休,佢咁樣Rap:「屹立60年遮王何洪希收山,一代遮王自此絕跡中環」,石硤尾雪糕伯伯今年離世都令佢動容,「而家香港缺乏人情味,人情味都留喺facebook,新聞報過後,三天內有人討論,三天後呢?不會記得。真正陪伴香港人成長嘅係呢啲人,呢啲先最記錄到香港歷史。」今年的《RAP UP》都會有雪糕伯伯,「當係自我安慰,覺得自己都為呢啲人做啲小事。」

最後一Rap仍會在農曆年三十發佈,剛好一個年代,馬米話天下無不散之筵席,在還沒想到更好的方法突破框架,係時候暫停一下,更希望走出《RAP UP》這comfort zone,在音樂創作上有新嘗試。佢希望《RAP UP》在香港流行音樂歷史中有啲位置,「希望聽過我歌嘅人可能做咗老師、教授,拎出嚟同人講香港呢十年係咁咁咁。原來有個人做過香港十年歷史系列,我唔知係幾耐之後,可能三十四十年後。」佢仲話今年上半年仲會有《Rap-Up of the Rap-Up》,唔好走數啊。

記者:列淑華
攝影:周芝瑩

全新旅遊專頁,即like籽想旅行: https://fb.com/travel.appleseed

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載