› 選擇地區
三藩市
紐約
洛杉磯
其他美國地區
香港 台灣 北美
 
2018年03月09日

【西遊記】奧斯卡搞成咁點算好?

今屆奧斯卡最大新意,邊個得獎者發表致謝辭最短就得到大禮。

美聯社

【文化籽:西遊記】
今屆奧斯卡,第90屆,場內參與者得一句metoo,場外觀眾得一個字:悶。好難唔悶,正如你晚晚食飯、洗澡、睡眠,做得多也會悶。只不過,觀看頒獎禮不是身體必須,你可以選擇在同一時間打鋪switch、出個post、幫BB掃掃風。就無咁悶。頒獎禮的模式已經見慣見熟,再難炮製甚麼驚喜。為提高收視率,至少維持,奧斯卡已經無所不用其極。無法說服評審支持《神奇女俠》(Wonder Woman),也請來最當時得令的Gal Gadot不斷穿插,頒完獎又要過戲院娛賓,出鏡率高過影后候選者。還未計蜘蛛俠Tom Holland,黑豹Chadwick Boseman,總之套戲夠賣座又仲肯無償過來當跑腿的新人王,統統請來,填充了Gary Oldman或Frances McDormand這兩位老戲骨的不足。又懂得自抽去年頒錯獎的笑料,再請一次Warren Beatty與Faye Dunaway頒發最佳電影,製造一下話題。可惜,本末倒置。
每年奧斯卡都有一個重點話題,去年是Donald Trump,今年是性侵,是平權,明知的。看賽前大熱是《廣告牌殺人事件》(Three Billboards Outside Ebbing, Missouri),是《忘形水》(The Shape of Water),兩齣由女性主導的電影;最佳導演的提名則包羅了《不得鳥小姐》(Lady Bird)位Greta Gerwig及《訪.嚇》(Get Out)位Jordan Peele,一女一黑兩個新人;已經估計到大會想傳遞甚麼訊息。估佢唔到是密度之高,幾乎由頭講到尾,A講完到B講,B講完再到C接力。一開始還有少少點綴,到Ashley Judd等三位被害人出場後,輪到一連串影后級頒獎嘉賓,便失陷。簡直似佈道會,或者姊妹淘的訴苦熱線,如Emma Stone如Jennifer Lawrence,個個也好像有深仇大恨需要即場大報復。不是想說傳遞的訊息不重要,但現在是唐三藏式疲勞轟炸,便只有反效果。連續四小時強迫觀眾聆聽同一種聲音,我只想到人大會議。連最佳外語片也要頒給變性人當主角的《神奇女郎》(A Fantastic Woman),再給她機會上台表態。使唔使政治正確得咁誇張?
一個頒獎禮,唔係話唔可以宣揚政治觀念。以前會宣揚得比較有趣味。講真,你會唔會觀看一個擺明車馬推銷基本法的電視節目吖?衰衰地都要搵家燕姐或者阿Bob上去玩一玩遊戲啦。今屆奧斯卡,最大新意正是遊戲,一開場就推架水上電單車出來,明刀明槍植入廣告,講明邊個得獎者發表致謝辭最短,就可以得到大禮。
大佬,你咁樣自貶身價?奧斯卡有乜好睇?就係好睇在地位夠高,人人恨攞,攞到會興奮,會真情流露,會呈現人性。如果,得獎者攞完個獎,會似個機械人或者人工智能,快快讀完急口令便下台,覺得獎項價值還不如一架水上電單車,咁就不如去睇春茗聯歡晚會大抽獎啦。
我明白,節目太長係好催眠,超時又好煩,控制上台嘉賓發言時間的確不能避免,都無理由過猶不及搞到頒獎嘉賓一打開信封便立即宣佈得獎名單,連少少懸念也沒有空閒營造,觀眾連少少緊張的情緒都不可能產生;得獎者上台講唔夠兩句就話夠鐘要滅聲,趕過大學畢業生上台領取證書。有雞先定有蛋先?有如此的規矩,我份致謝辭當然寫到有咁短得咁短,功能性為主,就當然沒有起承轉合不夠娛樂性啦。不夠娛樂性,你就再cut我鐘,情願將時間花費在將睇過無數次的經典電影片段再一次剪成精華;或者,將時間花費在售賣軟糖、熱狗與三文治。咁樣搞頒獎禮法,不如搵張壁報板貼份成績表上去就算啦,不用辛辛苦苦製作一個長達四小時的節目,四分鐘都有找呀!

Profile:方俊傑

觀塘長大,壹仔打滾,偏愛西片、西劇、中日韓美女。利物浦悲慘球迷,非西人一個。
facebook:方俊傑

編輯:彭錦明

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載