蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年04月21日
馬上成為壹會員

【百老匯電椅中心】考試喇,仲唔溫書!《復仇者3》倒數精讀班!

《復仇者聯盟3無限之戰》劇照

【十年寒窗,全球苦讀】

對好多影迷、漫畫迷嚟講,4月25號上映《復仇者聯盟3 無限之戰》(Avengers 3: Infinity War),大鑊過考DSE……

大鑊,因為呢場大考嘅syllabus足足橫跨十年。由2008年嘅《鐵甲奇俠》,到對上一部《雷神奇俠3: 諸神黃昏》,Marvel Studio已經推出18部英雄電影,形成一個超龐大嘅故事體系。如果《星戰》係20世紀最顯赫嘅現代神話,咁Marvel電影肯定係21世紀嘅繼承者,而且壯闊程度猶有過之。最攞命係呢18部作品互相緊扣,劇情逐步推進,直至《復仇者3》同出年上映嘅《復仇者4》,終於嚟到史詩式嘅高潮。假如閣下懶懶閒、唔溫書,到家陣先嚟抱佛腳,咁剩番呢幾日你平均每日要睇三套以上,先趕得切開畫日第一時間入場……

當然,自命品味非凡嘅你可以以一句「毒L戲」抹殺呢件世紀盛事。之但係過去十年,Marvel Studio呢18部戲全球總收入經已衝破140億美元。喺美國,《復仇者3》更打破當地預售紀錄,數額相等於前7部Marvel戲預售嘅總和。正當你自命清高,你口中嘅「毒L」已經統治緊地球人嘅品味。

【先搞清楚「syllabus」】

若然閣下冇睇過Marvel戲,家下先諗住上車,都唔使「劣」。作為賺大錢嘅商業片,講故仔手法一定體貼入微,相信新觀眾一樣會enjoy。不過想好似fan屎一樣,徹底享受呢套年度大作,就要做啲功課嘞。

完全冇接觸超級英雄片嘅朋友,溫習前記得先搞清楚個syllabus。今次考試範圍其實係「Marvel Cinematic Universe」(簡稱「MCU」),即係由Marvel Studio(漫威影業)親自主理嘅18部作品。如果你連超人、蝙蝠俠唔屬於Marvel都未知,唔該拿拿聲上維基,睇吓「MCU」到底有啲乜戲: https://goo.gl/tJ4Raa

此外仲要留意噃:有啲作品雖然主打Marvel人物,但並唔屬於「MCU」系列。例如咁多部蜘蛛俠電影當中,暫時只有上年上映嘅《蜘蛛俠:強勢回歸》,先至屬於「MCU」系列。其他作品,包括Sam Raimi執導嘅「蜘蛛俠三部曲」,仲有《蜘蛛俠:驚世現身》、《蜘蛛俠2:決戰電魔》,都係以前Marvel授權Sony Pictures Entertainment拍嘅版本,同依家「MCU」故事世界唔接軌架。同樣道理,《變種特攻》系列其實係Marvel授權20th Century Fox拍嘅,同依家呢18部戲亦無關。如果覺得亂就睇番維基啦,無謂溫錯書、嘥心機。

【包你合格:《復仇者3》懶人精讀】

作為毒L,自問我已經算勤力:MCU電影每部至少睇兩次;心儀作品諸如《鐵甲奇俠1》、《復仇者聯盟1》、《銀河守護隊1》同《蟻俠》,更加反覆鋤夠三鑊以上。可惜再用功,一啲劇情細節始終唔記得。而且好似讀書咁,總係有幾科唔入腦──好似《美國隊長1》、《變形俠醫》、《雷神2》,我同好多friend都表示「太悶唔想溫」……。更何況睇都係求開心箒,搞到開夜車咪書都冇癮啦。所以下面我已經準備咗易入口嘅懶人包,花幾分鐘時間讀一讀,夠初心者高高興興入場考合格返嚟。

「世界觀」

同原著漫畫一樣,MCU背景雖然係現實世界,但係科技、魔法、神鬼同時並存。所以佢既有Iron Man嘅先進裝甲,亦有擅長遠古法術嘅Dr. Strange,以及雷神呢啲北歐神明,故事亦橫跨地球、太空、仙界,甚至穿越時空。有fan屎推測,嚟緊《復仇者》3、4集可能會踩埋入平衡宇宙添。冇邊際嘅舞台,正正係Marvel世界魅力所在。

「人物篇」

據已披露嘅消息,嚟緊《復仇者》3、4集登場角色至少有76個,仲未計可能出現嘅神秘驚喜。星光熠熠嘅陣容,連見慣世面嘅影帝米高德格拉斯都為之興奮──據聞上年Marvel Studio安排所有演員影劇照,飾演第一代蟻俠嘅佢就忍唔住趁高興,周圍問其他演員攞簽名。想知《復仇者3》有乜角色率先登場,美國網站Gamespot已經列晒出嚟,仲有圖添,包你唔會認錯: https://goo.gl/cRHv3P

「關鍵詞」

想一試場就進入狀態,最緊要記住幾個keyword:
AVENGERS──基本上係正邪大戰嘅大路故仔,唔會太難理解嘅。嚟緊呢兩集主要講神一般嘅奸角Thanos企圖殲滅全宇宙一半生命,一班英雄梗係聯手阻止啦;不過為咗泡製戲味,導演Russo兄弟早喺《美國隊長3:英雄內戰》鋪咗伏線:正義英雄組織「復仇者」兩大巨頭──美國隊長同Iron Man,因為公私兩面嘅恩怨決裂,其他成員就各自跟大佬,分成兩邊。隊長嗰邊有Hawkeye、Falcon、Scarlet Witch,外援Antman,同埋隊長因為兄弟情而包庇嘅「炸彈嫌疑犯」Winter Soldier;而Iron Man嗰邊就有Black Widow、Vision、War Machine,同埋誤認Winter Soldier係殺父仇人而幫拖嘅Black Panther。最令人頭痕嘅係,原本壁壘分明嘅兩班人,到《英雄內戰》完結又有變數──Scarlet Witch由於手掌手背都係肉,結果兩邊都唔幫走咗;Black Panther又因為搞清楚之前嘅誤會,結果同隊長friend番,仲收留埋假死狀態嘅Winter Soldier……。於是,嚟到《復仇者3》,當Thanos發動宇宙浩劫,一班英雄能唔能夠「放低彼此心中矛盾,襯家一起去追」,就成為追看嘅看點嘞。

THANOS──關於呢個Marvel影史上最強奸角,暫時資料少之又少。觀眾淨係知佢想儲齊六粒「無限聖石」,獲得無所不能嘅神力。至於要咁石嚟做乜, 電影就冇講嘞。睇番漫畫原著,Thanos唔止係觀音兵一名,而且相當重口味──佢女神竟然係「Death」,即係掌管死亡嘅女神!由女神不滿現世活人太多,仲多過地府啲死人,做兵嘅佢就拍晒心口,話搞宇宙大屠殺!咪以為佢得個講字呀:根據原著,佢當年曾經活生生解剖親生老母,而原因只係想知點解對方會生到自己出嚟!到底電影版會唔會用番咁變態嘅設定,就留番大家自己睇嘞。

WAKANDA──Black Panther祖國,與世隔絕,擁有超高科技,同全世界最堅硬嘅金屬Vibranium。從《復仇者3》預告片推測,今次地球戰線嘅主戰場就喺呢處。

GURARDIANS OF THE GALAXY──長駐太空嘅浪人團隊。今集佢哋終於有機會同復仇者一眾地球英雄相遇,係Fan屎們期待已久嘅看點之一。

VISION──導演Russo兄弟早前提醒fan屎,最好帶定紙巾入場,可能係暗示《復仇者3》將會有英雄殉職!從預告片推測,俾人由額頭撓走聖石嘅Vision,可能就係犧牲者!值得留意嘅係,Vision同女英雄Scarlet Witch一直有條感情線煲緊,而Scarlet又出名情緒唔穩定……萬一條仔死咗,力量大到不可估計嘅Scarlet可能會發晒癲,為故事增添變數。

【必考:Infinity Stones係乜東東 !?】

拿咪話唔提你:「Infinity Stones」呢次考硬,唔溫其他都要熟讀呢part。據電影嘅講法,呢六粒聖石早係遠古時候已經出現,佢哋各自有不同法力,不過實際用途就冇交代得好清楚。下面係漫畫方面嘅設定,大家不妨參考。

Space Stone(空間寶石):藍色,用者能夠打開蟲洞,瞬間轉移。粒嘢依家好似俾雷神細佬Loki偷咗。
Mind Stone(心靈寶石):黃色,用者可以增強智慧、操控人心。 粒嘢依家鑲咗喺Vision額頭,可以話係佢生命之源。
Time Stone(時間寶石):綠色,用者可以操控時間,奇異博士已經示範過。粒嘢依家鑲咗喺奇異博士嘅法器飾物入面。
Reality Stone(現實寶石):紅色,用者能夠扭曲現實,即係幾乎做乜都得。漫畫甚至講到佢可以帶用家穿越不同平衡宇宙。粒嘢依家喺一個叫Collector嘅外太空收藏家嗰度。
Power Stone(力量寶石):紫色,用者可以擁有無窮力量。粒嘢依家由宇宙警局Nova Corps保管緊。
Soul Stone(靈魂寶石):橙色,用者可以操控靈魂,漫畫甚至講到佢可以令死人復活。粒嘢依家冇人知喺邊,有fan屎推測可能收埋喺Black Panther老家Wakanda。

【攞A貼士:3大漫畫原著】

想睇得開開心心,知住以上咁多夠使架喇。如果你係考試一定要攞A嗰啲人,可以睇三本漫畫原著:《Infinity War》、《Avengers Disassembled》同《Infinity》,估計Marvel Studio總指揮Kevin Feige都係喺呢幾本嘢攞靈感。我就冇咁好精力嘞,睇咗第一本已經飽晒。反正作為死忠fan屎,今次無論考成點我都預咗repeat──入場睇一次邊夠皮,梗係要翻啅啦。

撰文:阿雞
《蘋果動新聞》前創作總監,文化雜食者,high嘢cheap嘢都啱,淨係冇中間。現為網台Booom主持cult片節目《百老匯電椅中心》,並負責附屬FB群組《百老匯電椅中心: 放棄治療部》(broadwayelectricchair)

全新旅遊專頁,即like籽想旅行: https://fb.com/travel.appleseed

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載