› 選擇地區
三藩市
紐約
洛杉磯
其他美國地區
香港 台灣 北美
 
2018年05月19日

【百老匯電椅中心】到底咩人會唔鍾意《死侍2》?

「《死侍2》令人跌眼鏡?」

冇諗過《死侍2》會令我跌眼鏡。千祈唔好誤會: 齣戲我睇得不知幾高興,甚至散場即刻想睇多次;強如《復仇者3》都未至於令我咁想二刷。之所以話跌眼鏡,係因為有喜歡第一集嘅朋友睇完今集居然覺得掃興。

起初我真係搲爆頭 —— 今集無論笑料、動作、出場角色統統加碼,行出戲院一刻我直頭飽到捧住肚走,照計一般觀眾應該滿足至係。偏偏少部份人睇完表示失望,而佢地普遍意見係「冇突破」…… 喂大佬,今集死侍一開場已經玩自殺,仲唔夠突破? 唔止咁,今次編劇煞有介事安排經典戰隊「X-Force」出場,點知轉個頭竟然全數貶為二打六…… 咁樣撚化觀眾,唔叫突破我都唔知叫咩。

由於部分街坊反應實在出人意表,搞到我楝高床板諗咗好耐,直到尋晚忍唔住摷返第一集嘅影評研究,我終於恍然大悟: 《死侍》係「拍畀討厭超級英雄嘅人睇嘅電影」,而《死侍2》係「拍畀超級英雄狂迷睇嘅電影」。

「第一集反英雄大受歡迎」

2016年2月,《死侍》第一集上映,憑住區區5千幾萬美元成本勁賺7億8千幾萬全球票房,堪稱刀仔鋸大廈嘅奇芭。背後成功因素,相信同部分觀眾對超級英雄電影「消化不良」有關。
其時Marvel Studio嗰邊已經推出12部電影,第13部《美國隊長3: 英雄內戰》亦即將於3月上映;DC方面又方死執輸,趕拍《蝙蝠俠對超人:正義曙光》同《自殺特攻:超能暴隊》分一杯羹;加上早幾年Christopher Nolan嘅《蝙蝠俠》三部曲、重新reboot嘅《蜘蛛俠》,以及拍到第七部嘅《變種特攻》系列……對討厭superheros嘅朋友而言,的確係一場發極唔完嘅惡夢。而《死侍》嘅出現正好為一眾haters出一口冤氣: 性格無賴賤格、以自嘲為樂嘅Deadpool,可以話係對整個超級英雄熱潮嘅徹底諷刺。加上電影專登走「R級」路線,大玩血腥笑料同成人幽默,對嫌棄superhero movies小兒科嘅朋友嚟講,簡直係一道「重口味嘅清泉」。

「第二集重手唔係人人受」

既然第一集反英雄為人受落,今集又加重料、去到盡,咁點解《死侍2》又得失某啲觀眾呢? 個人認為係因為太重手,亦太忠於原著。

喺原著漫畫入面,Deadpool有個綽號叫「Merc with a Mouth」,我姑且直譯「多口僱傭兵」。睇漫畫,你會覺得死侍正職根本係楝篤笑藝人 —— 佢啲對白唔止質到畫面密密麻麻,而且幾乎每一句都係gag位;最出位嘅係,佢啲笑話幾乎全部同漫畫、電影有關,令讀者覺得死侍完全意識到自己係活喺漫畫世界。呢種破格手法喺敘事學有個正統名稱,叫「打破第四牆」(Breaking the Fourth Wall) : 簡單講,即係假設任何故事世界同讀者、觀眾之間,隔咗一道無形嘅「牆」;打破第四牆,等於打破虛構世界同我哋身處現實嘅壁壘,令故事人物同觀眾、讀者為意彼此嘅存在。

「拆牆」呢家嘢,偶一為之可以增添趣味、引發受眾思考;但好似Deadpool咁「見牆就拆」,視敘事規矩如無物,對睇故仔嘅人嚟講就變成考驗。以《死侍2》為例,主角長期「跳出跳入」,高密度笑話不斷打斷劇情,睇唔慣嘅朋友難免會覺得窒住、窒住。更麻煩嘅係,《死侍2》大部分「拆牆gag」都同漫畫有關,甚至玩過界恥笑DC旗下作品。於是愈熟漫畫嘅毒L就睇得愈過癮,至於唔熟漫畫嘅……就可能有些少無癮。諗番當日現場睇戲情況,部分場口的確有兩極反應: 識笑嘅睇到拍晒大髀,唔識笑嘅冇表情,仲尶尶哋。

平心而論,導演David Leitch同創作團隊已經計算得相當精密:單純論娛樂性同production value,個人認為絕對比上集優勝幾倍。事實上,朋友當中有唔少「非Marvel死忠」,散場一刻一樣滿意離場。問題係,假如閣下同超級英雄電影誓不兩立,一心諗住《死侍2》可以幫你再次重挫毒L銳氣,咁你好可能會有啲失望。講到尾,一部對漫畫電影終極反諷嘅作品,你唔係毒L又點可能深切領會?

「到底咩係反英雄?」

又有祟尚「反英雄」嘅觀眾抱怨,話《死侍2》捉到鹿唔敢脫角: 劇情明明玩到大一大,夠膽整死角色嚇窒觀眾,點知結果又係「虛驚一場」,一切推倒重來當冇事發生。對呢類睇法,熟悉原著嘅毒L相信會一笑置之: 死侍漫畫從來得啖笑,就算劇情講到天跌落嚟,最後一定有無賴方法化險為夷。所謂「反英雄」,咪就係信奉「認真便輸了」嘅閒人囉,咁你又何必認真?

撰文:阿雞
《蘋果動新聞》前創作總監,文化雜食者,high嘢cheap嘢都啱,淨係冇中間。現為網台Booom主持cult片節目《百老匯電椅中心》,並負責附屬FB群組《百老匯電椅中心:放棄治療部》(broadwayelectricchair)

全新旅遊專頁,即like籽想旅行: https://fb.com/travel.appleseed

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載