› 選擇地區
三藩市
紐約
洛杉磯
其他美國地區
香港 台灣 北美
 
2018年12月14日

【人狗情未了】戶外攝影場景王40kg揹上身 汪星人乖乖望鏡頭

瞓地普通料,Terry話夏天最難搞,一定要搵樹蔭,驚狗狗中暑。

【人狗情未了】
去影樓拍攝寵物寫真有很多場景選擇,但狗狗落街最興奮,條尾揈到甩咁滯。於是,唐穎聰(Terry)次次超過40kg揹上身,將場景搬到山頂、公園、南生圍等戶外地方,再花超過半粒鐘砌出移動城市,「喺戶外真係會見到狗狗笑得好開心,不過有時興奮過頭難控制啲。」

近年寵物攝影大受歡迎,但當手機都影到有景深的時候,為乜要搵攝影師幫手?因為影的是一班high起嚟四圍衝的小動物。你顧得狗狗sit同stay,又顧不了光圈、快門,你揹得狗袋、零食、水兜等隨身物,又揹不起一個「移動城市」,更重要是引狗狗望鏡頭笑,單靠主人之力很難,如果有Terry獨門「海豚音」引狗仔望鏡頭,易好多。

場景道具多變 玩「季節限定」

本身做船務工作的Terry,一直對攝影有研究,起初只是放假帶愛狗去公園玩兼影相,有時手痕影埋其他狗,之後放上網幾好反應,開始有其他主人問價,就這樣做起這門生意,40多歲才入行。「影狗狗好開心,如果你鍾意小動物,就會知同佢哋相處係好治癒嘅事,佢哋唔識chok唔會扮嘢,你對佢好,佢哋就鍾意你,你感受得到。」那時,Terry愛狗Happy仔開始年老多病,於是他索性辭去正職,「影相時間彈性啲,可以多啲時間喺屋企陪佢,有時如果影相嘅係熟客,我又可以帶埋佢開工,一齊玩。」

好誇張,40kg裝備中,除攝影器材外一半重量來自場景道具,Terry還會玩「季節限定」,如早前的萬聖節場景,狗狗騎掃把扮巫師,襯埋套衫真係Harry Potter級數,還有歐洲風、日本櫻花場景,同一個地方都可以次次不同感覺。「喺戶外狗狗開心啲,但如果影嚟影去都係花花草草會悶,於是就開始買場景道具,越買越多越帶越多。」最新有聖誕主題,誇張到連燈飾也有幾款,用乾電或尿袋供電。

每兩個鐘收千幾蚊 不限狗狗數量

入行一年,Terry話寵物攝影有淡旺季,「夏天比較少生意,好多人揀影室內,去studio影冇咁熱,又或者去狗泳池影相,秋冬就比較多戶外。」最驚乜?「落雨或者太大風啦。」有沒有遇過不受控的狗狗?「最緊要有耐性,暫時未試過有狗狗不受控到影唔到,主人未必控制到,但我可以幫手控制,最多唔合作係唔望鏡頭,咁就要追住佢哋嚟影,佢望邊我就去邊,影到佢哋煩,影到佢哋屈服,哈哈。」他的收費每兩個鐘千幾蚊,不限狗狗數量。

今日,Tina帶來四位主角貴婦狗豆豆、史納莎Bell、阿蛋和Lulu,她是熟客,已經找Terry影過幾次相,「佢哋四個係我心肝,搵Terry影相係因為佢多唔同場景,戶外或者studio都可以影,而且最重要,係我啲狗狗都好鍾意佢,佢又控制到我啲狗。」真係?真係,拍攝當日我也和豆豆、阿蛋、Lulu玩得好開心,惟獨Bell有點怕人,Tina說:「係呀,因為Bell係喺繁殖場救出嚟嘅,所以有啲怕人。」但Bell完全唔怕Terry,仲好friend。四位小朋友真係好活潑,在現場會見識到Terry的「海豚音」,Terry說:「夏天我曬到黑晒,冬天就嗌到把聲沙晒。」

病或老狗優先 主人傷心怕就快走

影相總會遇到傷感故事,始終狗狗壽命大多只有十幾歲,難免離別。Terry曾經遇過一位客人,她的狗狗16歲,年老有病更動過大手術,知道狗狗時日不多,希望影相留念。「當時聽到Carrina形容,話狗狗Courage已經冇乜精神,又成日抽筋,所以偏向去影樓影,但以我經驗,嗰陣天氣唔算凍,而且如果有太陽天氣都好舒服,我諗狗狗見到陽光草地,知道主人同佢出街玩會開心好多,所以提議帶佢出嚟影。去到嗰日,狗狗真係好似知道主人帶佢出嚟玩,表現得好精神,仲成日笑。」影完相不久,Courage就離開了。

Terry還試過短時間內同一隻有病狗狗影了三輯相,「知道心愛狗狗就快走,留幾多回憶都覺得唔夠,所以我都明白,如果聽到有病或老狗想影相,我都盡量同其他客夾,希望可以盡快同佢影先。試過有狗狗約咗影相,未到相約嗰日已經走咗,亦都試過交相嗰陣,狗狗已經走咗,主人嗰下睇到相會好傷心,但我相信狗狗希望留低畀主人嘅,都係開心回憶。」

Terry說得傷感,因為早前他的狗狗Happy仔亦離開了,「其實唔只我幫客人同狗狗留低回憶,好多時啲客人都影響到我,我影好多狗狗都係喺繁殖場救出嚟,有啲狗狗被利用完生狗仔後被遺棄,佢哋喺繁殖場不見天日,做繁殖機器,可能大半世狗都未跑過草地未見過陽光,所以我都好支持領養代替購買,之前都有幫過啲救貓狗團體免費影相,如果有動物慈善團體希望搵人幫忙影相,都可以搵我,就到時間可以免費幫手。」

採訪:陳孝義
攝影:徐振國
部份圖片由Steeze Workshop Photography寵物攝影提供

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載