› 選擇地區
三藩市
紐約
洛杉磯
其他美國地區
香港 台灣 北美
 
2019年09月05日

【黑鏡線索】777一人扭轉全局 - 宋漢生

【黑鏡線索】
中共掌舵人堅持逼英帝交出香港,但心知兩地文明,存在巨大鴻溝,而一旦呢個中港矛盾搵唔到方法解決,管治成本將會高到不勝負荷。

溫水煮蛙 中港區隔變融合

要解決中港矛盾,就即係要做到中港區隔,而要做到中港區隔,就不如索性一國兩制,一國幾乎係冠名,實質係高度自治、港人治港。

但係設計還設計,到時執行嘅人,唔跟你個設計,都係廢嘅,一如大家都知,中國人整嘅,一定會爆炸。政權移交之後,中共執行人,將一國兩制越推越歪,到咗689,連核心嘅雙普選承諾都宣佈壽終正寢,一國兩制既走樣、又變形。

嚟到777,既可以DQ閹咗立法會,又可以違憲推一地兩檢,再加上大灣區出爐,索性叫大家改口唔好再咁拘泥叫「香港」,大家都係冇乜反抗。溫水煮蛙,中港區隔越來越細,中港區隔慘變中港融合,大勢已成,收割只係時間問題。

777搞咁多嘢,連雨傘規模嘅反抗都冇,輕輕鬆鬆入幾粒,連777都估唔到咁容易,又考第一。即係球迷會話,贏緊3:0,就安安全全搓到吹雞完場,捧盃開香檳。喺平行時空,之後再裝埋4,000支監控燈柱,推埋社會信用評分,明日大愚,要幾融合有幾融合,香港人瞓喺到俾人輾過,從此跌入獨裁政權引力範圍,脫離自由世界文明圈。

溫水煮蛙,第一要訣,係千祈千祈唔好無端端貪心,走去開猛個火。DQ立法會,已經係好踩界,埋下逼人上街抗爭嘅種子,777仲要邪惡到想硬推送中法邀功,再開猛啲個火,終於出事。

倒數第一 當之無愧

如果換轉係一個冇咁邪惡嘅特首,溫水煮蛙會成功,香港再冇反融合嘅條件,偏偏777夠邪惡,又誤判國際形勢,先吹大雞驚醒咗就嚟被煮熟嘅香港人,試問三個月前,邊個會諗到,三個月後,街上嘅監控燈柱,竟然會俾人見一支拆一支?

777因為自己邪惡,搞咗五十年一遇嘅大頭佛,為主子添煩添亂,自知出咗大事,想急速切割,話送中問題已經圓滿解決,之後嘅事係另一件事,係外國勢力搞顏色革命,乜都好,外星人襲地球都好,總之就係唔關送中事。

但係全香港知,佢自己知,中共都知,分明係佢邪惡,以一人之力,搞送中搞出嚟,無論點樣放風點樣扮慘點樣洗白,都係冇得兜,一概入晒佢數。香港人入佢數,佢主子又係入佢數,總之所有嘅衰嘢,每一邊都會入佢數。贏家寫歷史,最終無論邊一邊贏,佢都係遺臭N年,拋九條街之遠,寫入史冊,倒數第一之名,當之無愧,永無來者。

撰文:宋漢生

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載