› 選擇地區
三藩市
紐約
洛杉磯
其他美國地區
香港 台灣 北美
 
2002年08月17日

打機樂園:
實地測試GBA兩大法寶戶外睇電視爽

GBA在世界各地均大受歡迎,一推出迅速佔據手提機大部份市場,連SQUARE都要同任天堂扮Friend先可以喺GBA出Game,可想而知GBA市場佔有率幾咁犀利。醒目嘅香港人又點會錯過大好搵錢機會,最新兩大搞作係將GBA搖身一變成任何環境都啱睇嘅電視機仔,今日就為你實地測試,睇吓掂唔掂。

記者、攝影:徐影龍
ImgaeGirl:Patsy

隨時隨地睇電視
今日介紹GBA呢兩個法寶,雖然唔係任天堂官方出品,不過喺創意到實用性上都有不俗表現,令到呢部手提遊戲機王有更大用途。第一樣介紹係電視接收器,插上GAB後便可接收香港四大電視台信號,變成一部流動電視機仔,最啱喺戶外遊玩,又或司機在車等人時都可睇電視解悶。
由於GBA屏幕設計為反射型LCD,故此需有充足光線情況底下先睇得清楚,遇着陰暗環境如落雨、室內唔夠光等就會睇得好辛苦,呢個時候就要靠另一個法寶──發光屏幕嘞,有咗佢不但可清楚咁欣賞電視節目,連過往一啲如《惡魔城》般背景較暗嘅Game,都可睇得清清楚楚,要打爆機都冇咁吃力啦。

實地測試一
接收能力一般
呢部戶外電視接收器約莫等於GBA咁大,加入後體積唔算太大尚可接受,在室內環境測試時接收能力一般,大部份電視台都睇得唔清楚,不過轉到戶外環境情況就好得多,四大電視台均接收得清晰,雪花都唔多,就算上到山頂都一樣接收得到,唯一問題係始終要對正信號發射方向先會清楚,即係要坐定定先得。除可接收電視外,重設有VideoIn轉換線,供用家接駁各式視像裝置之用,如流動VCD機、遊戲機等,變相將GBA變成一部彩色顯示屏,唔睇電視都可睇碟同打機。賣價方面四百蚊有找尚算抵玩,適合如司機般需經常在戶外工作嘅人士。

實地測試二
睇得清楚玩得舒服
另一樣法寶就係名為「AfterBurner」嘅屏幕光管,喺GBA屏幕底下加入一塊光管,令到成個屏幕即時光猛番晒,幾暗嘅Game都玩得好舒服,又唔怕搭車時唔夠光玩唔到。為測試加入發光屏幕後耗電量嘅分別,筆者換入全新2A電池煲《機戰R》,最後發覺耗電量並非太高,差不多可以玩八至十小時,情況算令人滿意。
不過安裝上並唔係咁簡單插入部GBA就得,而係需要拆機安裝,雖然用家可以較平價錢購入「AfterBurner」,再自行安裝,不過據改裝師傅講,由於要剪開機內部份膠片及在機殼鑽洞,改裝上有極大難度,用家自己裝壞機風險頗大,已經有好多玩家改唔掂要拎返轉頭,有啲重成部機散晒咁滯。難度咁高,呢一百蚊改裝費就唔好慳嘞。
「AfterBurner」$350(代安裝$450)

售賣點:DreamStore
電話:25753285
地址:灣仔東方188商場256號舖

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載