› 選擇地區
三藩市
紐約
洛杉磯
其他美國地區
香港 台灣 北美
 
2003年01月19日

娛風街:新年通宵煲碟
阿旺揀《哈仔Ⅰ》及《魔戒Ⅰ》

農曆新年有好幾天假期,日間出動拜年𢭃利是兼看賀歲片,晚間最適合通宵煲碟。演《戇夫成龍》的阿旺(郭晉安)想重溫《哈利波特》及《魔戒》第一集,作家李敏想欣賞柯德莉夏萍的明星風采,焦媛想看電視劇集《色慾都市》,在電台主持電影節目的馮志豐則獨愛舊戲。

記者:藍雪紅 攝影:陳穎(影碟)
鳴謝:DVShop(21949100)

電視演員郭晉安:最緊要開心
自己最想睇:「啱啱睇完《哈利波特:消失的密室》及《魔戒二部曲:雙城奇謀》,好想趁新年假重溫一下佢哋嘅第一集。另外,新年最好睇啲開開心心嘅戲,我會揀《回到未來》一至三集,一次過睇晒佢!」
推介畀讀者:「改編自StevenKing嘅《閃靈》(TheShining),不過呢套係驚慄片嚟㗎!如果怕新年唔多吉利,咁就留番第日睇喇!」

舞台劇演員焦媛:努力做功課
自己最想睇:「為咗套劇《赤之禁室》做功課,新年我會努力睇晒套《色慾都市》(Sex&theCity)。」
推介畀讀者:「《風月俏佳人》(PrettyWoman),好睇!」

DJ芝See菇Bi:高水準喜劇
自己最想睇:「《HowToMarryAMillionaire》(我愛金龜婿)係瑪莉蓮夢露經典之作,係高水準荷李活式喜劇,睇完好開心,講心唔講金但又可以嫁到有錢人,羊年願望皆成真!」
推介畀讀者:「睇《Sex&theCity》不如重溫《90男歡女愛》(WhenHarryMetSally),𠵱家重看一啲都唔覺老套,係溫馨小品經典。」

電視演員康子妮:細賞文藝片
自己最想睇:「張藝謀嘅電影,例如《我的父親母親》,因為平時無乜時間同心情欣賞呢類較為文藝嘅電影,好想藉住幾日假期慢慢欣賞。」
推介畀讀者:「如果讀者未睇過《魔戒首部曲:魔戒現身》或《哈利波特:神秘的魔法石》,咁就要趁假期觀看,戲裏面啲特技同人物都做得好,而且片長足足三個鐘,最啱放假時睇!」

專欄作家李敏:重溫經典
自己最想睇:「柯德莉夏萍係明星中嘅明星,最好睇佢啲戲,《珠光寶氣》(BreakfastatTiffany’s)、《窈窕淑女》(MyFairLady)、《龍鳳配》(Sabrina)、《甜姐兒》(FunnyFace)、《戰爭與和平》(War&Peace)。」
推介畀讀者:「BBC嘅《人體漫遊》(TheHumanBody),能夠讓你認識自己身體,特別適合求知慾強嘅朋友。」

DJ馮志豐:獨愛舊片
自己最想睇:「最近出嘅邵氏影片,尤其是《傾國傾城》,當時(七十年代)返唔到大陸實景拍攝,只有用廠景,仍然拍出真實感,非常高水準。《十三太保》都好想睇,其中一幕五馬分屍好激㗎!」
推介畀讀者:「1952年拍嘅歌舞片《SingingInTheRain》,最近出咗五十周年紀念版,有中文版㗎,其中一隻係製作特輯,更有女主角嘅訪問片段,好珍貴。」

電視演員王喜:關心地球
自己最想睇:「早於幾個月前已經睇晒一套八集嘅《藍地球》(TheBluePlanet);真係大開眼界。但當時無仔細從中學會該如何看待海洋,所以希望喺假期溫故時知新。」
推介畀讀者:「《小喇嘛看世界盃》講及無孔不入嘅世界盃如何跟小喇嘛發生關係,引發一啲值得反思嘅既有價值觀,呢部電影可以滿足一啲想進一步了解自己特性嘅朋友。」

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載