› 選擇地區
三藩市
紐約
洛杉磯
其他美國地區
香港 台灣 北美
 
2004年05月30日

煲碟王:
《玩轉男人心》王老五覓真愛情

《玩轉男人心》缺少咗動作片嗰種緊張場面,幽默得嚟又與笑片嘅無喱頭不同,以輕鬆手法帶出人過中年,喺愛情路上如何尋覓真愛,令人睇得舒舒服服,而男主角積尼高遜用上老練嘅演技,將角色演活過嚟,更令到未到中年嘅觀眾亦能產生共鳴,今個星期剛推出3區DVD,放假煲碟最佳之選。

記者:許福合

售價:$138
華納發行
查詢電話:31281791

玩世不恭
各位想像之中嘅王老五會係點樣?《玩轉男人心》內積尼高遜飾演嘅夏里似乎略為唔同,富有且未婚,不過年齡就大咗些少,年屆63。勉強都可當做個超齡「鑽石王老五」,不過佢有個怪癖,只會追求30歲以下女人。呢個喜好甚至被雜誌報道過呢!一日夏里與新相識女友瑪蓮(阿曼達彼堤飾)到別墅玩。誰知瑪蓮母親名劇作家伊麗嘉(戴安姬頓飾)突然出現,夏里更被當賊扮。因而鬧出唔少笑話,伊麗嘉亦因女兒年齡相差太遠及雜誌報道過夏里嘅「事迹」,對佢印象欠佳。



獨處一屋
呢個時候就發生咗《玩轉男人心》最重要事件。夏里心臟病發,當中帶出唔少笑話外,靚仔醫生祖利安(奇洛里維斯飾)亦出場,雖然只有三十幾歲,原來佢係伊麗嘉Fans,對伊麗嘉大有一見傾情之感。女方似乎亦有些心動。夏里出院後,暫時住喺伊麗嘉家。兩人獨處一屋起初當然唔習慣,不過相處日久,亦發覺對方優點所在。女兒瑪蓮亦察覺兩人關係轉變,向夏里提出分手,兩人之間障礙消失,更係一拍即合。



情敵出現
尾段雖然笑位唔少,不過就最有意思,尤其講到夏里病好離開後,兩人關係由熱轉冷,夏里對愛情猶豫而卻步。於是竟然失蹤半年,去探訪以往曾飛嘅女友,最後先確定自己人到63歲先至搵到真正愛情,毅然跑到巴黎搵伊麗嘉,可惜呢個時候出現咗第三者祖利安,最後就要睇伊麗嘉如何選擇。此片大玩忘年戀,筆者雖然有排都未到中年,不過亦睇得相當投入過癮,全片節奏輕快,無乜冷場,文片中較為少見。



特別收錄
DVD版嘅特別收錄中包括有導演、積尼高遜戴安姬頓訪問片段,另外亦包括刪剪片段。

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載