› 選擇地區
三藩市
紐約
洛杉磯
其他美國地區
香港 台灣 北美
 
2005年12月19日

爆機狂迷:搶試AGS重頭勁Game兩大猛作愈玩愈驚

個多月嚟XBOX360攻勢鋪天蓋地,SCEH終於發招喇!一次過公布多款PS2及PSP的人氣大作,要話畀一眾機迷知,大家係玩「Game」,而唔係打「機」!當中最矚目者,是PS2的兩套恐怖大作《死魂曲2》及《RULEOFROSE》,極盡驚嚇之能事,而且畫面靚絕,好多Game書老編打過都大拇指一豎!想眼見為實?嚟緊星期六(24/12)灣仔會展AGS2005都有得試玩,大家記得Mark住以下幾款大作嚟排隊喇!

記者:朱崇德
攝影:陳偉強、朱崇德
ImageGirl:Yuki

等足2年!PS2終於推出《死魂曲2》(或者叫佢「屍人2」會較易喚起大家記憶);雖然此名作之續篇要等到出年2月先推出,不過SCEH最近搞咗個PS2「金碟」試玩,記者就搶在亞洲遊戲展(AGS)之前試玩,為大家作個預告!

《死魂曲2》/2月9日推出

畫面細緻超嚇鬼

初上手,感覺真係幾驚嚇!話說日本近海的夜見島,半夜突然大停電,意外招來29年前一起失蹤的全島居民,不過返嚟嘅當然唔係人啦!遊戲過癮處係發生於在同一時空下,經歷島上各「人」的撞鬼遭遇,並再逐步解開撞鬼之謎,表現手法好有電影感!筆者都係前作擁躉,開Game第一個感覺係畫質改進好大,上集的「爛格」及模糊不清已不復見,換來是細緻以及接近DVD的清晰畫質,以PS2嚟講都去得幾盡!當中最見功係由暗位走入光位,嗰種高反差令人暈眩的感覺真係好正;人物設計亦一絕,簡直有如真人!更細心是連老人的步履蹣跚、年輕人的矯捷快速,都完全做到!

喪打屍人

遊戲系統同操作跟上集分別不大,成名的「視界截取」系統一樣保留(以心靈感應從敵人的視線觀察四周),不過敵人明顯多咗,有時「截截吓」發現竟然望返自己嘅情況經常會出現,真係嚇到連手掣都掟落地!此外新加入動物及過去視界截取能力,好多解謎線索都係靠呢兩招呢!今集最大改變處,是能夠奪取「屍人」武器,而且遊戲初段就有人物手上有槍打喪屍!上集嘅半截燒烤叉撩全場爆笑場面,同以「最低武力」對抗空群屍人的壓迫感真係低咗,可能為咗更多機迷能享受遊戲樂趣,而刻意將難度稍作調低啦!

《薔薇守則》/1月19日推出

變態童黨玩禁錮

一開Game已是連續10分鐘的CGOpening,4個小女孩連同1個美少女,喺咁帶我遊「花園」,明明話係恐怖驚嚇之作,起初都以為開錯Game;不過後5分鐘內容絕對急轉直下,那幾個小女孩竟然是童黨!佢哋所玩,並唔係笑笑口、聲一巴咁簡單!着魔般喜歡設祭壇、玩禁錮、玩生葬!再留心CG的畫質,細緻的布景、強烈的光源變化,同人物肌膚及衣着所表現的強烈質感,簡直媲美一齣CG電影!翻查資料,原來是製作《鬼武者3》CG影片的「白組」操刀,真係唔講得笑!故事背景是1930年的老英國,傳說中的妖獸邪靈、甚至童話中的惡魔都會隨時在玩家面前出現;玩法以迷宮加解謎,不過最恐怖者,可是玩家所飾的美少女珍妮佛,在這樣詭異的世界下,基本無甚武力的情況面對種種怪物一浪浪的襲擊,再加小童黨攻心的精神壓迫,絕對同《死魂曲2》有異曲同工的驚嚇感。故事劇情咁複雜,幸好在正式推出時會完全繁體中文化,相信屆時大家可更了解劇情。

Michael(Game書編輯):有啲似CAPCOM隻《DEMENTO》!遊戲氣氛唔錯,開場CG上十幾分鐘簡直震撼;遊戲玩變態細路Feel,真係幾嚇人!

其他PS2猛Game

GT之父改玩兩個轆

好鬼似《GT4》!不過就變咗兩個轆。梗係啦!《TouristTrophy》是由原GT班底PolyphonyDigital開發。繼承着《GT》血統,車場一樣取材自30條世界著名賽道,據知同《GT4》一樣加入了香港賽道,不過金碟版重未測試到!兩個轆同以往4個轆最大不同之處,係過彎時一定要更準確收車,想挨欄過或衝過路邊沙地?包你一定炒車!即場測試好多Game書編輯都話玩到滾地葫蘆,好有真車感覺。遊戲內唔少得嘅,除一般賽車模式外,一樣會加入任務、執照學校同影相等模式,不過最正係車手由頭盔到腳底對Boot,都可以自己Edit,相信一出有排煲!

Edward(電腦雜誌記者):操控有啲似《GT》系列手感,不過反車感覺超真實,如果以電單車遊戲嚟計,佢係造得最靚一隻,包括街機在內!

暴走族自組「靚」車

雖然都係賽車,不過比較另類,因為佢玩暴走族Feel,真係比較少見。遊戲內31種車款再加400件Parts畀你打造最完美及別具個人風格的豪華飆車,而賽事中的車身損耗,亦會真實呈現車身之上,都真係諗得幾細緻;遊戲共分故事、對戰、計時及MiniGame多種模式。

PSP都有睇頭

考起Game書老編

睇介面都知係益智遊戲類,玩法簡單,兩邊玩家各佔一角,遊戲以輪流回合制,以「變色」擴佔附近同色領土,最快達50%總面積為勝!不過轉折處是上一輪玩家所選顏色,下一輪玩家不可同選,所以精髓在於擴佔領土之餘,重要阻礙對手令他「無色可選」的心計存在,真係幾蝦人玩吓!現場測試,好似暫未見有Game書編輯能取勝電腦(筆者亦飲恨5鋪!),不過好彩有GameShare功能,而且重係一Game可作兩機對戰,唔夠電腦打,可以搵「人」翻本!

中文版更易玩

捉馬騮基本已成SCE的代表作,《PIPOSARUACADEMIA2》看似CardGame,其實骨子裏是內藏100個迷你遊戲的集大成作品;睇到呢度大家可能問,乜唔係今個月12號已經出咗咩?其實今個月推出嘅係日文版,嚟緊1月嗰隻會採用全中文介面,繙譯內文同以往捉馬騮中文版一樣咁抵死!而且好多MiniGame嘅達成要求,有中文介面點都易明啲!

AGS2005資料
日期:12月24日(六)至27日(二)
時間:10:00至20:00(註:首天12:00開放、最後一天17:00閉幕)
地點:灣仔會議展覽中心一號展館
入場費:成人$25、11歲以下小童$15
查詢: http://www.asiagameshow.com/

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載