› 選擇地區
三藩市
紐約
洛杉磯
其他美國地區
香港 台灣 北美
 
2005年12月29日

三品牌溝上身港式DV手機全球最細

提到「港式」兩個字,大家可能只諗起電車、茶餐廳等歷史「遺迹」。但原來,帶「港式」味道嘅數碼產品亦都唔執輸!喺手機界裏面,就以「新牌仔」ORO為例,旗下首部大作DV-1,除咗挾全球最細DV手機之名殺出一條血路,其機外、機內更擁有來自歐日等大牌影子!正如當入到茶餐廳嗰陣,餐牌上都印着「中西美食」四隻大字,呢種集百家大成嘅特點,就成為「港式」產品!

記者:陳國輝
攝影:陳盛臣
ImageGirl:Yumi

本地手機品牌又何止ORO一款!早前如AK、Xplore就以「師兄」身份打入本地手機界;前者近作AK900具備600萬像素鏡頭攻影相;後者更創出首部PalmOS摺機,可謂各展所長。ORO代理表示,雖然DV-1由設計到部份製作都屬MadeinHK,但內餡與NEC為同一「生父」,淨係呢一點已經唔可以睇小呢位「新牌仔」!

集三大強機之長

玩數碼產品,港人最冧㗎仔嘢;而手機則以歐美大牌行先。ORO深知本地玩家喜好,不論外形抑或玩法,都流露出大廠影子,絕對係歐、日嘅混合體!

45°斜上鏡頭

一般DV手機只會將鏡頭平放於機側處,但DV-1就特別將其130萬像鏡頭呈45°向上傾斜,旁邊搭多盞補光燈,齋睇個款真係勁似三洋部C6!如此獨特嘅設計,未必咁易習慣,但好處係當拍攝人面時,唔使特登將部機舉高咁麻煩。手柄亦刻意加闊及磨滑,與C6一樣更貼緊手位,等玩家用起嚟更舒服。

扭屏拍片

講到拍片,必屬DV-1強項!除咗屏幕能作90°扭轉,變成一部可單手操控嘅DV機外,更支援長達110分鐘有聲攝錄,旅行嗰陣用嚟拍個人旅遊特輯就Fit晒!而影片質素唔差,352×288解像度,用個26萬色QVGA芒睇片就最啱。播放格式支援MPEG4及3GP格式,規格同現時Hit爆嘅扭屏DV手機N90有幾分相似。

強攻音樂

齋睇機背,右邊鏡頭「啄」位狀似SONY嘅NetworkWalkman。用手機嚟聽歌,不嬲係SONY強項,但DV-1亦加入呢項玩意,都算交足貨。講音質,從機背立體聲喇叭所發出嘅音樂,都幾清脆,而且旁邊還加設2.5mm插口及音樂專掣,可接駁唔同耳機,操作方便,唔使加錢買多個Adapter。不過,DV-1不設記憶卡槽,玩家只能憑機內僅有嘅128MB容量發揮慳家本領,夠唔夠用就見仁見智。

介面向SONY致敬

睇埋介面,相信你更加認同DV-1嗰種「港式」雜炒味道!當記者首次開機,其實操作與一般手機無異,既有圖示,亦能夠用Folder方式顯示;不過,當跳至「遊戲」介面,竟發現佢用咗手提遊戲機PSP作為介面,相似度更高達99%!跟住,重發現類似「MacMouse」、「SONYWalkman」等熟口熟面嘅圖示,雖然裏面都係「多媒體」或者「設定」等內容,不過介面夠晒過癮,好啱港人愛騎呢嘅口味!

PROFILE

制式:GSM900/1800
體積:80.5×48.7×21.8mm
重量:94.5g
屏幕:26萬色QVGA彩芒
備用時間:150小時
通話時間:150分鐘
主要功能:130萬像素鏡頭連補光燈、DV式設計、支援MPEG4及3GP影片、110分鐘攝錄、MP3快捷鍵、內置128MB容量
AMIXMobile(31882280)

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載