› 選擇地區
三藩市
紐約
洛杉磯
其他美國地區
香港 台灣 北美
 
2006年10月10日

影音試團:抵玩DV加入闊屏攝錄 自拍笑版《無間道》

呢排戲院上緊嗰套《無間道風雲》好多人講,好多戲迷懷念幾年前原裝正版,所以對鬼佬版一樣有期待!見到馬田史高西斯執導咁過癮,不如你又試吓SPEED新出嗰部DX7,自拍番部搞笑版《無間道》過吓戲癮,價錢抵玩得嚟仲有埋16:9拍攝,拍出嚟影片零舍有電影感!
編導:許福合
攝影:譚盈傑
演出:何笑@Aunties

聽歌睇片又影又拍

SPEED一向都係腦場名牌,着重實際嘅用家好多時都會諗起佢,貪佢價廉物美。睇過笑探員今日用到部DX7咁盡,證明部機大件夾抵食。DX7集7大功能於一身,除最常用嘅影相拍片外,仲可以學笑探員咁用MotionDetect嚟拍嘢,如長時間捕捉動物走過一類嘅生態片,都幾得意㗎。DX7亦具PMP特色,可播放MPEG-4影片,抄入自製電影檔喺2.7"闊芒上欣賞都唔錯;鍾意聽音樂,DX7亦內置音樂播放器,可以聽MP3同錄音,更可放入文字檔,得閒睇吓E-Book式小說,都算多才多藝。

闊屏DV6大撒手鐧

今日主角何健明,人稱笑探員(皆因唔識笑),屬警方卧底神探。情報科指出琛哥喺「無間大廈」有交易,黃Sir急Call笑探員查個明白,仲畀咗部闊屏武器DX7過佢查案㖭!

自動偵察

估唔到呢件闊屏武器都好用,一到交易地點,笑探員即刻隱藏部DX7,只要鏡頭前有咩風吹草動,「動作偵測」即時自動將畫面拍低,而且仲可偷偷用遙控變焦,琛哥有乜依郁盡收鏡內!

即場錄音

去到交易中途,琛哥頭馬儍強居然爆咗句:「啲粉係我嘅!」咁重要嘅資料,梗要即時錄低佢。好彩DX7機身輕巧,放喺西裝袋都唔易被人發覺,要錄音時只要輕輕喺機頂㩒幾㩒,就唔怕被人知啦!

連拍5張

為咗搜集證據,好多時都要將可疑人物拍低,最常用到8倍數碼變焦,遠遠Zoom埋去影,配合連拍功能,可以一次過快拍5張,一手交錢一手交貨情形,全部影得清清楚楚,今勻唔怕Miss咗而俾黃Sir鬧。

暗位照影

犯罪集團唔係下下上天台傾密偈,今日我就跟蹤琛哥到戲院同人密斟,佢哋仲鬼鼠到喺後樓梯咬耳仔。DX7提供夜攝功能,喺黑麻麻環境就啱晒,再開埋佢個防手震功能,即使邊行邊影都可拍出較清晰嘅相片。

千萬像素

影到相交差,抄入電腦放大嚟睇,有時會發掘到琛哥更多隱密資料!DX7拍出嚟嘅相片,最高可以1,100萬像素輸出,加埋16:9拍攝比例,左右兩邊可以拍到更多嘢,唔怕眼大睇過龍。

當PMP翻睇

努力一輪,係時候整理一下搜集到嘅資料。DX7屏幕配合16:9設計,可以反轉嚟睇,拍埋錄埋咁多相片影片,當係PMP咁坐定定慢慢睇都得,如發現任何重要線索,就咁拎去畀黃Sir,連花時間寫報告都慳番,啱我!

16:9背景見多啲

唔單只電視鍾意用16:9,連相機同DV,都開始提供16:9比例相片同影片拍攝,更由高貴DV引伸到入門級機種。16:9比例令相片變得更有氣勢,如兩旁背景會見多啲,睇起上嚟更具電影感。當然你亦可利用剪片軟件「裁頂裁底」達致16:9畫面,不過過程包保煩到你想放棄,都係機身拍攝時已係16:9方便多啦!

畫質實試
相片:

由於DX7使用CMOS而非CCD,相質始終難以跟DC比,如手機拍片般較多雜訊,不過相片質素尚可接受。

防震:

去到光線不足地方,想穩穩定定影相就要靠防震功能;DX7去到陰暗位置都唔使驚,加埋內置有閃燈,夜景夾人樣照拍可也。

PROFILE

感光元件:536萬像素CMOS(插值至1,100萬像素)
鏡頭:8倍數碼變焦
屏幕:2.5"扭擰芒
影片:16:9比例(720×400、30fps)
功能:MP3、錄音、防震、內置閃燈,5張連環快拍
記憶卡:SD
電源:專用鋰電池
體積:108×69×39mm
重量:154g
查詢:領先(25721822)

小知識:乜嘢係插值?

DX7用咗插值技術,令到相片可以提高至過千萬像素輸出,其實乜係插值技術呢?像素插值功能是通過電腦的插值法運算後作相片增補技術,於數碼影像中每兩個相連像素之間,添加一個新嘅像素,簡單嚟講就係將相片「抆大」。利用相似功能,即使較低解像度嘅CCD或CMOS,亦可輸出比原定更高解像度嘅相片。

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載