› 選擇地區
三藩市
紐約
洛杉磯
其他美國地區
香港 台灣 北美
 
2006年10月11日

Game事撻:PS2《龍珠》歷代角色晒冷 130人打到頭暈

可能有人認為《龍珠》呢套經典動漫,都播完咁耐做乜仲成日出Game?其實佢喺歐美市場依然勁Hit,所以響呢幾年出嘅新作多不勝數,好多時仲係美版行先,錫晒鬼佬玩家。今次《龍珠ZSparking!Neo》堪稱歷代之最,皆因佢操作爽快俐落,仲一口氣囊括咗近130名角色,由大家熟悉嘅悟空比達到極生面口嘅劇場版閒角都有,真係似足話事啤同你玩晒冷!
文:陳福榮

角色多到嚇死人

若以為過去《武道會》系列已算叠馬,咁今次《Neo》就肯定稱得上前無古人!事關除咗悟空、悟飯、比達、杜拉格斯呢堆必然主角,仲有超大量奸角收錄其中。為切合當中嘅「劇場版篇」,更將絕大部份敵人一次過落齊,好多仲係百年難得一見,如首套《龍珠Z》劇場版嘅加利二世,變身前同變身後兩個都有;仲有《超級撒亞人孫悟空》嘅那美星超戰士史拉古,同樣都係有正常形態同巨大化形態,當然會變成藍色一嚿嚿嘅人造人13號亦都有。

高手陸續登場

跟足原著冇甩拖

對Fans嚟講,今集最吸引固然係神龍冒險,由一開波笛子魔童巧遇拿狄斯、繼而悟空阿哥抓走悟飯嘅「撒亞人篇」,基本上係依照原裝劇情逐關打,直到最後成功解決比達先至過關,從而開啓「菲利篇」、「斯路篇」、「布歐篇」、「龍珠GT篇」、「劇場版篇」與「小時候篇」。
除耳熟能詳過關方式,遊戲仲設有唔少非主線隱藏人物嘅旁支劇情,要儲齊全部百幾人甚至所有升級飾物,絕對可讓你煲足三個月!其他模式就有唔同路線嘅生存模式「終極戰」、似足劇場版隨時要同惑星戰士波札古開拖嘅全新「武鬥大會」、按部就班練招嘅「超修行」等,豐富到爆。

唔夠打變身撒亞人

《Neo》以操作爽快作為賣點,將前作《Sparking》嘅上天下地連招悉數保留,再加多好多屈機到震嘅近身打法,例如投技性能大幅強化及殘像防禦等,再配合威力更大嘅氣功絕招,令玩家需要因應戰況而作出取捨,唔使一味齋波或者齋打拳腳交。不過招式愈加愈多搞到初學者難以領會,變成好多人都迫於無奈Set最低難度嚟頂住檔先。
變身系統亦係今集另一特色,設有即時變身及角色固定變身兩種,例如喺對戰模式你可以揀個普通悟空,只要儲夠氣就可以按「R3掣」變成超級撒亞人,但亦都可以直接選用超級撒亞人3嚟玩。再者佢喺融合方面亦有類似系統,響特定2對2嘅劇情,可將悟空同比達各自操作,又或者手指指合體變成超級格古達,令玩家有更大嘅自由度。

特典鐘令人失望

𠵱家幾乎每隻遊戲都有預約特典,《Neo》亦冇例外,原本打算送個「幾骨子」嘅鐘。Bandai將撒亞人太空囊改造成跳字鐘,呢個構思不俗,所以吸引到唔少人注意,奈何「幻想美麗,現實殘酷」出到嚟又變成另一回事,啲字只係簡單得可以嘅黑白液晶,簡直同Game界享負盛名嘅《Xeno》邪神像或者《N3》水晶球有得揮!有舖頭仲要額外加五草嘢先至俾人拎走,值唔值真係見仁見智囉。

PROFILE

遊戲類型:動作
對應機種:PS2
遊玩人數:1至2人
開發廠商:NamcoBandai/Spike
售價:$448

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載