› 選擇地區
三藩市
紐約
洛杉磯
其他美國地區
香港 台灣 北美
 
2007年05月29日

數碼生活:屋企電視擺上網
返工遠睥《溏心》

翡翠930,仲喺公司未收工?女友打來心急過拎出世紙,怕我趕唔切返屋企陪佢睇《溏心風暴》。6月1日就大結局,到時又係工作進行中咪死火?面對同樣案情,擔心女友發老難嘅朋友可以放心,因為救星已到!只要安裝一部外形有如Router的gogomediaPro,就可利用手提電腦、3GPDA手機等同步收睇屋企部電視。同女友邊傾邊睇,真係諗得周到。

記者:陸俊雄
攝影:陳盛臣

電視即壓MPEG4

太複雜的數碼科技聽到人發悶,但gogomediaPro簡單幾句就解釋到佢係啲乜。呢個盒仔係個媒體處理中心,連接家中唔同嘅視訊來源,再將訊號轉化成MPEG4格式,經互聯網傳送出去;自此你就算唔喺屋企,都可以用手提電腦、Wi-FiPDA或3GPDA手機等上網,同步收睇屋企電視做緊嘅節目。
安裝程序都好簡單,先將所有TVIn、Out線駁晒落gogomediaPro,跟手將隨機附送《ADigitPlayer》軟件,裝入屋企電腦內將之Set為Server;自此你只須長開該軟件同上住網,你就可以玩「上網睇屋企電視」;心水清嘅朋友一定想知可否轉台,例如屋企睇TVB,公司就睇NOW財經台?一樣得!因為gogomedia內置有TVTuner,可作自身調頻之餘,又唔會影響家中人所睇之電視節目。

gogomediaPro設定逐步睇

PDAPhone隨身睇

gogomediaPro初推出時,隨機只附送《ADigitPlayer》軟件,不過到咗6月初,佢仲會送埋專畀PDA手機專用的《PKPlayer》軟件,大家只需到佢哋個網站下載返。
用法同樣簡單,安裝好後只要輸入跟機的伺服器編碼、賬號密碼等,揀選心水頻道就可即睇。而且《PKPlayer》仲有FullScreen功能,你部PDAPhone螢幕有幾大,佢就同你玩到有幾大;而且佢仲識得配合「電視度」,變為打橫全屏播放,真係電視機感十足。
既然有Wi-Fi嘅地方就可以上網睇電視,坊間唔少地方有免費Wi-Fi提供,3GPDA手機係咪照樣收得好順?
好似麥記,佢有20分鐘免費任上,不過多數呢類免費服務,數據傳送速度上限較低,收放百多Kb一個e-mail就冇問題,但講到睇電視,至少要用256至512Kb,認真有阻滯。最好當然係公司有Wi-Fi設備啦!唔心息嘅朋友可以去機場、灣仔會展中環試試,情況可能比較好;或到某些討論區內,搵搵坊間流傳的免費Hotspot位置一試。所以話,始終係要畀錢嘅Wi-Fi服務,先至上得夠穩定。

Pro版設遙距預錄

其實gogomedia早前推出過名為Light嘅版本;今次新推Pro版,最強新增功能係有遙距預錄、多咗個USB插槽同當Router用。gogomediaPro版機身前端的USB插槽,只要插上USB手指或外置硬碟,可以直接取代DVR或DVD錄影機,將節目撥錄到USB內。例如在Office用手提電腦,開啓《ADigitPlayer》的預錄介面,你可以設定不同視訊來源輸入,錄收費電影都得,校好預錄時間,按時序排列錄多條頻道都得。所以喺屋企唔記得校預錄時,都有後着遙距出招。

Profile

硬體︰32位元RISC處理器、MPEG4/2/1CODEC及無線寬頻分享網路處理器
頻道系統︰NTSC、PAL
輸出/輸入︰VHF/UHF、S-VIDEO、AVIn/Out、乙太網路、USB
體積︰220×185×186mm
重量︰0.5kg
查詢︰31550115(SeeDigi)

後記

咪以為數碼港得個貝沙灣,同睇戲大把位唔使同人爭。如今次介紹的gogomedia,開發呢件產品的公司ADigit,正係數碼港嘅「數碼娛樂培育中心」裏頭其中一間中小企公司。話明培育中心,當然會對參與計劃的公司給予支援協助,如提供先進數碼製作設施、辦公室租務優惠等。所以日後有人問你數碼港到底用嚟做乜,大家唔使再支吾以對。

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載