蘋果日報 | APPLE DAILY
› 選擇地區
三藩市
紐約
洛杉磯
其他美國地區
2007年10月07日
馬上成為壹會員

數碼達人:《異魂》識聽鬼話
六軸手掣專吸猛鬼

細數恐怖遊戲,經典如《BioHazard》、《零》甚至《SillentHill》,通通大搞氣氛,一旦過度投入,隨時嚇個半死!中文版《異魂傳承》(簡稱異魂)正式登場,日版鬼怪噏乜今勻水落石出,但最過癮係扭盡PS3手掣六軸特性,捉鬼時手掣要好似釣魚咁大力向上「扯」,玩角力咁款,趁哈囉喂未到,發個天師夢又何妨!

記者:陳國輝

故事大綱

因一個匿名電話及來自死去多年嘅親人書信,令一位靈異雜誌記者來到一條已荒廢嘅村落,更旋即發生一連串靈異現象,穿梭於充滿幻想生物與亡魂嘅異界,迫使他們不惜借助獨有的特異技能,打倒敵人並解開箇中玄機。

童話式人物唔血腥

唔見血、冇喪屍嘅恐怖遊戲,咪以為驚極有限!其實《異魂》一開始由海邊小村莊出發嗰陣,筆者已玩到有啲毛管戙!例如聽到夜闌人靜嘅貓頭鷹叫聲,以及由微風吹動嘅樹木沙沙聲,在沒有BGM(背景音樂)情況之下,反而更真實可怕!但繼續玩落去,會漸漸發現脫離像《BioHazard》那種嚇你一跳的情節,尤其畫面方面,無論人物設定抑或場景佈置,均充滿童話式格局,特別係怪物設計非常夢幻古怪,如蜜蜂、大笨象「演變」嘅幽靈,甚至外形如坦克車嘅Boss敵人等!睇完可能得啖笑,夜麻麻玩唔使專登搵人陪啦!

鬼魂變色一扯到手

每隻驚慄Game幾乎都玩電鋸,最好劈到對方甩頭甩骨、血肉模糊先至爽快。但呢項另類喜好唔係人人都鍾意,玩《異魂》就可避過呢一劫,雖則係動作冒險Game,但主角係一名雜誌記者,需要四圍採訪,向途人同怪人收集情報。好彩係《異魂》中文版熱辣登場,解謎過關易得多,唔怕盲摸摸過關。
最值得講係PS3六軸手掣,戰鬥時畫面右上角會有一行敵人嘅「魂」,根據敵人Level,共分為4種顏色,只要用六軸掣將「魂」嘅顏色轉成紅色,就可以用手掣向上「扯」(好似有魚上釣咁),將怪物靈魂抽出嚟,吸收其能力,感覺幾新鮮㗎!不過,好多網友唔明點玩,如面對黃魂嗰陣,原來要將手掣左右傾斜,令「魂」保持正中,想玩得叻,真係要操多啲先得!

PROFILE

名稱:《異魂傳承》
(中英文合併版)
機種:PS3
發行:SCE
類型:動作冒險(A.AVG)
遊戲人數:1人
操控:六軸感應
語言:中、英
售價:$328

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載