› 選擇地區
三藩市
紐約
洛杉磯
其他美國地區
香港 台灣 北美
 
2010年02月10日

異形血獸 紅當當賀新年

《AliensvsPredator》已去到第三集!齋賣異形同鐵血戰士兩個名都夠照,加埋出嚟做炮灰嘅海軍陸戰隊三方大戰,更加刺激!見報應該已見街,係農曆年前最後一輪Game,阿媽問點解過年都要打打殺殺?咁有無鬥講恭賀說話嘅Game先?打到成個畫面都紅色,好應節呀!

文:阿洛

三大種族同場獻技

農曆新年衝緊嚟,屋企部Wii用嚟招呼親戚帶嚟嗰班化骨龍,同埋班識得拎住個掣跟洪金寶Fing嚟Fing去嘅長輩,而房嗰部XB360就梗係自己玩番啲有難度、有勁度嘅Game。先旨聲明,呢隻Game出名血腥,已經話唔可以喺德國發售,玩過之後亦發現血獸暗殺技中有招擰甩人個頭,而異形仲可以搵條尾拮穿人個肚!睇落人類算最人道,最多用手榴彈炸爆你,唔痛!咪埋眼好快無事!

各有性格遠射近劈

講到三個種族,鐵血戰士隻血獸最勁,有熱能探測又可以隱形,但就主力打埋身戰,俾佢埋到身都九成無剩。異形就身手敏捷可以爬嚟爬去,行上牆都好似如履平地;人類就靠高科技電子零件同佢哋鬥,遠距離武器最強,但格鬥技就無得玩咁濟。而且Game內仲會出現同異形混種嘅血獸,同現實生活一樣,睇嚟做人真係好難。

4人合作16人圍打

玩FPS,最好玩都係玩連線,新年想和氣生財?可以同朋友玩合作模式,4人連線合作殺出重圍。
另有模式16人連線,包括異形模式就係其中一人扮異形,有人被殺復活後就會加入異形陣營,最後睇吓邊個存活。而鐵血戰士獵人模式就係一人做血獸,而邊個殺咗血獸就可以取代佢位置做獵人,慢慢獵殺獵物,逐個捉。

ALIENSVSPREDATOR

主機:XB360、PS3、PC 
遊戲類型:FPS
遊戲人數:1-16人
製作廠商:Rebellion

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載