› 選擇地區
三藩市
紐約
洛杉磯
其他美國地區
香港 台灣 北美
 
2010年10月06日

揸iPhone踩入7仔 捉熊!!

早排去到邊都聽到「噹噹」聲,原來係iPhone的推銀及推曲奇熱,由此可見幾咁多人追住iPhone嘅Game嚟玩,真係追慢啲都跟唔上。最近連7-11都出咗隻iPhone遊戲,呢隻遊戲過癮在同現實掛鈎,真係要搵間7仔先可以捉到熊仔。

記者:符樂
攝影:林栢釣
Model:Boo@Zmodel

GPS定位 擴增實境

呢隻遊戲要捉嘅熊仔叫「PaddingtonBear」,覺得佢熟口熟面?無錯,佢就係7仔買嘢儲印花換購嘅熊仔。Game名叫《7-iCollection》,在AppStore打此名便可搵到,呢個喺「擴增實境」(AugmentedReality)遊戲,意思係從虛擬世界擴增到現實。只要拎住部iPhone去到7仔,畫面上就會見到熊仔如雨下,搖一搖部機便可將隻熊仔捉住。點解咁神奇?因為佢用咗「GPS定位」技術,當iPhone收到訊號畫面就會有熊仔出現。有網民話去到舖搵唔到熊,又話舉機即被誤以為影相被驅趕。小記親自試過,的確並非間間7仔都有熊出沒,例如沙田中心及禾輋分店都未見熊蹤,7仔解釋部份分店設於室內或地底,訊號會較弱,而驅趕問題已與職員溝通。

藍芽交換熊仔

捉到嘅熊仔會自動儲存在「私家珍藏」內,共有9款,當儲齊後便會出現第10款「別注版」,這款式只會出現於iPhone。每間舖只會出現1至3款熊仔,要儲齊所有便要走多幾間搵搵,但搵唔到唔緊要,透過藍芽一樣可以問朋友拎;方法是開啟遊戲後於「私家珍藏」按「PaddingtonBear」右上角會出現藍芽標誌,連接後即可送熊仔畀朋友。據講下期精品都會用iPhone儲,不過我最想儲滿之後,真係可以換隻真嘅熊仔攬吓喇。

捕熊法 大解構
1

iPhone3GS或4的用戶開啟程式後按「AR逐個捉」,鏡頭便會自動開啟。

2

舉機鏡頭對準7仔,熊仔便會出現,若鏡頭垂下會較難見到熊仔。

3

當鏡頭瞄準熊仔後,中央焦格會由白轉綠。

4

將iPhone輕輕向前搖,便能將熊仔捉住。

5

捕熊成功嘅訊息出現,熊仔將自動儲在「私家珍藏」內。

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載