› 選擇地區
三藩市
紐約
洛杉磯
其他美國地區
香港 台灣 北美
 
2010年12月02日

《幪面超人OOO》新作溝亂種

六、七十後嘅朋友仔,照計都睇過《幪面超人》!今年9月,日本新作《幪面超人OOO》,同平成年代好唔同,因為呢次追加兩大形態,包括鍬形蟲溝螳螂、蝗蟲,以及獅子溝老虎、獵豹嘅全新角色,移植落遊戲後,再配合格鬥同首見嘅群毆模式,《幪面》Fans應可盡情打亂種!

記者:陳國輝

新增形態代表
獅虎豹組合

睇個Look唔難估佢係以獅子嘅鬆毛作為攻擊武器,兼備老虎巨爪以及獵豹嘅速度,三個字「快狠準」!

鍬螳蝗組合

以鍬形蟲頭上嘅角,以及螳螂臂上嘅鐮刀作為攻擊武器,當然唔少得蝗蟲必備嘅招牌式飛踢!

激戰似《無雙》

《幪面》系列都出過唔少遊戲,但幾乎清一色都係格鬥,若然想玩最傳統嗰隻「邊行邊打」,今次終於有機會喇!
新作《幪面超人ClimaxHeroesOOO》特別加入「諸神黃昏模式」,簡單啲講,即係玩番最新一輯電視劇集嘅內容;故事係點樣開始?唔重要!最過癮係以任務形式來進行,畫面側邊提供晒地圖位置,只要達成勝利條件,或殲滅所有怪人,咁就會自動過關。聽落好似無難度,但實情係你經常要面對十隻、八隻敵人,同時攞齊架生圍毆你,你除咗可以用必殺技,亦能夠透過PSPWi-Fi連機搵Friend幫拖,咁精采嘅群毆畫面,感覺幾似玩緊《無雙》o架!

臨死一擊變超撒

雖然格鬥模式依然健在,但咪以為毫無睇頭!入面支援一項名叫「ClimaxTime」嘅玩法,例如當你體力被扣至近乎零嗰陣,能量表嗰行Bar,就會升至巔峯狀態,呢個時候你只要使出一招逆轉必殺技,就能反敗為勝,加埋有電視劇背景音樂襯底,真係零舍有親切感。
另一招仲高難度!當你瀕臨死亡邊緣,兼對方向你使出必殺技嗰陣,你可使出一招終極反擊技,只要跟足畫面上出現嘅按鍵逐一輸入,就可以將敵人嘅絕招反彈,以彼之道、還施彼身!

電王亞極陀回歸

對於《幪面》粉絲,除咗要有睇故事嘅感覺外,最好當然玩齊所有角色啦!呢隻遊戲除咗有新增兩大組合,仲有大量平成後嘅幪面超人,例如電王、亞極陀等熟悉人物亦會登場;但話說回來,佢始終係移植自PS2嘅《ClimaxHeroes》,如果早前已經玩過晒,可能興趣亦會大減。

Profile

名稱:《幪面超人ClimaxHeroesOOO》
平台:PSP/Wii
類型:動作
廠商:NAMCOBANDAI
人數:1-2P
發售日期:12月2日

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載