› 選擇地區
三藩市
紐約
洛杉磯
其他美國地區
香港 台灣 北美
 
2012年03月05日

蘋機會:PSV自創賽道 雞牛嚇對手

賽車勝負關鍵,往往因一個死亡彎角,搞到你翻唔到本!既然係咁,倒不如自己話事,Set好賽道,再你入局。最新PSV遊戲《ModNation》,不論直路、彎位,抑或起伏不平嘅暗斜,百分百由你話事,砌出啱心水嘅賽道,繼而成功翻本!

記者:陳國輝
攝影:周旭文
Model:Anladia@GME淘女郎

鴨仔羊仔隨處擺

《ModNation》早前已喺PS3出現過,嗰陣特別強調用武器對付敵人,而自創角色、砌靚車玩法,只屬於次要。今集鼓勵機迷發揮創意,連賽道都可自行設計,用手指喺芒上便可畫出賽道,遊戲仲提供幾十種地勢,揀出低地同丘陵,務求令地勢崎嶇,提升難度。透過PSV輕觸芒同埋掃背功能,在自創賽道時,可用指尖將添加物直接拖拉到賽道位置,毋須靠十字掣慢慢擺;更改地形嗰陣,亦可透過掃背功能,將一大遍平原變成高低不均嘅山路。最過癮係可於任何位置添加物件,除花草樹木,仲可以擺複式豪宅、摩天大廈、甚至走來走去嘅雞鴨牛羊!咁過癮,齋諗賽道已夠你消磨一天。

執靚架車挑戰全世界

《ModNation》以「生涯模式」作為遊戲主軸,畀你於大約20條賽道之中,透過勝出賽事去換取唔同道具,今集連PSV粒右Analog都派上用場,當敵人駛近,只需轉下Analog,就會做出神龍擺尾動作,以車身「屁股」將敵人撞開,呢招比起用武器更能羞辱對手。不過,玩得耐始終略嫌賽道單調,而且電腦對手也太過悶蛋,所以遊戲加入「Mod探索者」以及「Mod里程」兩種新模式,只要你去虛擬世界各地「打卡」,並且搵當地對手片車,唔止可賺取旅行點數以及Mod里程數、解開隱藏道具,同時更有機會獲得當地限定道具,令耐玩性大增。

《ModNationRacer:RoadTrip》

機種:PSVita

類型:賽車

人數:1人

售價:$228

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載