› 選擇地區
三藩市
紐約
洛杉磯
其他美國地區
香港 台灣 北美
 
2012年09月13日

蘋機會:一個女人在途上 浪攝

點諗到一個女人仔,鍾意單拖浪攝遊世界不特止,仲唔怕死,喺意大利俾壞人跟、喺北海道被狐狸吊尾幾粒鐘、喺法國更一度被搶走相機……依然故我,鍾情一條友走嚟走去影靚相,有時更揸成日車,爬山幾粒鐘,為嘅只係太陽在山邊最靚一道光線。女人,唔一定只識為事業線打拼嘅。記者:徐影龍

風暴下出海打雀

Pat只係一個業餘攝影師,但足迹幾可跟旅遊版記者睇齊;中美意法日外,仲有埃及、梵帝崗、韓國、新加坡、柬埔寨同老撾,通通單拖去勻晒。一個女仔點會無遇過危險?「試過喺意大利俾壞人跟,搭順風車又話要載我返屋企,亦試過喺巴黎鐵塔下影相影到忘晒形,腳邊背囊同攝影器材俾人搶走。最得意係北海道層雲峽影櫻花,四野無人,有隻狐狸喺不遠處住我,吊住我行幾粒鐘,最後越走越近,我惟有上返車,唔係驚佢襲擊我,只怕佢污糟同有菌啫。」「不過講到最驚險,係兩年前貪平搭凌晨機去日本,唔夠瞓兼要一落機就揸長途車去北海道知床,最大鑊係遇正打風,狂風暴雨個天又黑,能見度低兼唔熟路,好彩日本個GPS超準,最後抵達能取湖。風暴下橫放着車、抵着車門,左手拎遮右手揸住部Nikon,憑住80-200mm長鏡,最後都拍到滿意嘅紅珊瑚草靚相。」講就輕鬆,換轉係我早已返酒店浸溫泉食魚生咯。

跟美國老師攝影團

最令我欣賞嘅,係Pat唔會對器材盲目追求,一部舊機Nikon D300陪佢出生入死無數次,心思反而花喺籌劃度。她家中收藏一大堆浪攝友最愛嘅《Lonely Planet》,出發前度出最佳行車路線。「呢幾年興起流浪攝影,我會Join當地攝影老師嘅拍攝團,啟發多啲靈感,又可跟同學仔交流吓心得。」 Pat口中嘅攝影老師大有來頭,好似去美國Yosemite國家公園咁,就跟過勁人Ken Rockwell同Dave Wyman攝影團,拍出多幀動人作品,呢度多個景點都喺攝影界熱傳,個個都想親赴一趟影餐飽,絕對係拍友朝聖之地。「我由十幾年前已用Nikon菲林機,幾年前開始轉用Nikon數碼單反,不過近年漸漸愛上富士,X100、X10、X-Pro 1我都有捧場,因為佢啲色真係好啱我心水,未出嘅X-E1亦係我必買之物,希望嚟緊個黃石公園Tour有得用啦。」

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載