› 選擇地區
三藩市
紐約
洛杉磯
其他美國地區
香港 台灣 北美
 
2012年10月02日

蘋機會:旅牌出大袋 iPad自由行

大概A4紙大小嘅10.1吋iPad,拎在手四圍走,的確唔係咁方便!尤其鍾意周遊列國嘅你同我。如果行李箱提供平板專用層格,拉出手柄即拖埋衫褲鞋襪一齊走,你話幾好!今日介紹幾款專用來放置iPad嘅行李箱和手袋畀大家,飛甩傳統硬殼保護,去旅行之前,記得帶埋佢喎! 記者:陳國輝 攝影:劉永發 模特兒:Karzier@Zmodel

行李箱 厚內櫳防撞

經常搭飛機旅遊公幹嘅OL,應該也聽過KIPLING呢個牌子!旗下City Business系列嘅Medellin 50,外層係柔軟嘅防水布料,內層係紫和橙紅色嘅monogram花紋,設計上似專為女性而設。可能你會問,佢體積咁細,又無防撞防花嘅超硬淨物料,點入機艙先?唔怕話你知,實情佢屬於跟身旅行箱,打開拉鏈,內櫳除咗可放衣物、日常用品之外,還具備一個魔術貼特厚層格,你唔只可放置一部15吋Notebook入去,也適合擺放iPad、Note 10.1等平板電腦,就算走過較震動嘅路段,亦唔驚會撞花或刮損機身,保護性能特強。拉起伸縮式手柄,即可隨時拖住行,啱晒鍾意帶電子產品出差嘅女士。
另一款半行李箱設計嘅Asween,十足公事包手袋。內櫳具備特厚層格,專放置電子產品,並提供手挽,但你亦可改用收埋喺拉鏈嘅伸縮式手柄,底部具備兩輪,可輕鬆拉住行走。

輕便袋 放兩部板腦

至於平日出街,當然唔會拎住行李箱咁誇張!原來斜揹袋亦提供專放平板電腦嘅款式畀你揀,例如呢款Cote&Ciel Tablet Kit Bag,拉開一睇,便發現內櫳兩側採用好特別嘅V形設計,每邊各可放一部iPad及任何10吋或以下嘅平板,玩齊iOS及Android兩大機型都無問題!入面還有一個小拉鏈,可放置記憶卡、USB手指等小物件,好貼心。此袋提供黑、銀、灰及深灰四種顏色,無任何monogram花紋,睇落比較沉實穩重!

潮味手挽袋

公事包或手提袋,由於可放置個人物品,一般體積比較大;相反,如果要揀一款剛好放得落iPad 嘅小手袋,可留意Cote&Ciel的iPads Soft Tote,佢特點係超薄身,而且用柔軟及可保護iPad的物料製造,提供三種顏色。$380(b)

斜揹夾棉袋

喜歡Casual一點的設計,可以考慮KIPLING DigiTouch C。咪睇佢外形係一個普通斜揹袋,內櫳其實採用柔軟尼龍以及夾棉外層製作,剛好放得落一部iPad,仲提供充份保護,至於芥黃色啱唔啱你口味,咁就因人而異。$850(a)

收納袋 鬥彩鬥潮

在12月份,KIPLING仲會推出一款全新銀色設計,尺寸僅24×19cm的iPad袋,相比公式化造型係咪多點新鮮感呢?
鍾意換色襯衫,Cote&Ciel就提供一款勁多顏色嘅iPad Zipper Sleeve。佢以灰色作主調,並可配搭紅、橙、藍、黑等不同顏色嘅拉鏈和內櫳,而外層物料更提供輕微防雨水功能,下雨天拎出街都唔驚整壞啦!

同場加映:Samsonite反傳統出套

擁有100年製作行李箱歷史嘅Samsonite,也推出專為流動板腦而設嘅全新系列Leora Portfolio。不過呢次唔係保護行李,而係iPad。佢表層採用聚胺酯物料,內層採用微纖維,並可由保護套搖身一變,成為方便煲劇嘅座枱支架,雖然款式普通啲,但始終由知名行李箱牌子推出,買個信心都值嘅!

(a)KIPLING( http://www.kipling.com )
(b)Morgan Power(2827 2881) 
(c)捷成消費品(2926 2300)

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載