› 選擇地區
三藩市
紐約
洛杉磯
其他美國地區
香港 台灣 北美
 
2013年08月10日

紐約直擊:G2激薄靚聲 靠篤背脊上位

職場上最憎小人玩篤背脊,但手機玩創新篤背脊又點睇?繼三叔S4後,LG最新旗艦機G2亦選擇了在紐約同全世界Say Hi!新機焦點是把實體鍵全搬到機背上的大膽設計,加上激薄邊框的5.2吋大芒、豪玩24-bit/192kHz發燒級音樂、光學防震相機及一系列貼心新功能,睇嚟新機靠篤背脊之餘亦甚具實力;最新消息9月中香港發售,值得留意!
記者、攝影:韓繼聰

新功能一覽

背鍵Short Cut 左右開弓

網上早有流傳G2的機背設計,到發佈會正式揭盅,原來G2創新地把音量及開關掣全搬到機背,機身四邊則變得滑不溜手;官方介紹話呢個設計比傳統手機更舒適就手外,左右手操作都同樣方便。
實際試用,起初心理上有啲唔慣,但用落發現食指會好不自覺地放在機背操作位置,其實真係幾就手!Screen Capture亦可一隻手指辦妥,自拍亦㩒得更自在,的確唔錯!唯獨是用主鏡頭拍攝時,手感總有點怪,但需要兩手拿着電話卻更感穩定。另外,兩個音量掣亦同時是快捷鍵,關閉屏幕時,長按音量「+」鍵即可啟Quickmemo記事,而音量「﹣」鍵則可即時開啟相機功能,「篤背脊」創新之餘,亦有很高實用性。

5.2吋靚芒 用盡七成機面

G2機身不大,屏幕卻感覺特別巨大!實情是屏幕兩邊只有2.65mm極幼邊框,因此可在138.5×70.9mm的機面上,配置5.2吋的Full HD IPS大芒;整個屏幕佔了機面75.9%,做到同尺寸手機當中,擁有最大屏幕的設計。用盡了機內虛位的3,000mAh電池,亦應該足夠支持大芒的高耗電量。
G2的高效核心及大芒容易令手機發熱,自己知自己事,所以G2在手機高溫時會自動調低屏幕光度,亦會限制用家調校,減少近日頻頻出現手機過熱意外。

光學防震 追焦Zoom住拍

1,300萬像素相機不算突出,但亮點在於鏡頭加入手機較少有的光學防手震,增強夜攝及移動拍攝時的能力。現場特別設有三隻分別持有G2及兩部其他品牌手機的震動假手,在相同震幅下,G2相機畫面的確搖晃較少,而小記及後親身試影夜景,影像亦的確比一般手機實淨,至於日光下,影像更是細緻,線條輪廓異常清晰。
新增的Tracking Zoom亦相當好玩,拍片時可對指定對象Zoom In並追焦,用來拍攝運動場面應該頗實用。加上Audio Zoom功能可對特定畫面範圍提升收音,並減少其他範圍音量;以及FHD 60fps的高質拍片能力,G2的攝力更進一步貼近真正相機。

HiFi好歌喉 2.26GHz最強四核

G2另一項意想不到的功能,就是獨家首創在Android手機上,支援並輸出容量大、無壓縮的發燒級24-bit/192kHz音樂,比一般手機的16-bit/44kHz高質好多,在一眾手機追高清靚芒時,已率先玩埋高清靚聲!
硬件方面,G2配備了2.26GHz四核心處理器配2GB RAM,效能非常強勁,一般功能如影相、睇片等當然夠快,更支援真正的多功能,只要三隻手指左右拉動屏幕,即可如同真正電腦一樣開啟三頁視窗同時運作三個程式。

LG G2

處理器:2.26GHz四核
記憶體:2GB RAM、16GB/32GB ROM
屏幕:5.2吋Full HD IPS
鏡頭:1,300萬像素
電池:3,000mAh
顏色:黑、白
尺寸:138.5×70.9×9.1mm
發售日期:9月中
售價:未定

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載