› 選擇地區
三藩市
紐約
洛杉磯
其他美國地區
香港 台灣 北美
 
2013年10月15日

特務「A發」插SIM 手機掛喺耳

自從看過《國產凌凌漆》,手機界便出現一堆「估你唔到」的產品,外形新奇有趣,部份仲好實用㖭!像內地牌子AIEK,推出既係藍芽耳機,又有電話功能的「A發」(A8),側邊可插SIM卡之餘,還提供切換專用鍵,三秒即由耳筒變電話,$680玩齊兩味,唔會攞你命三千!
記者:陳國輝
攝影:陳盛臣
模特兒:Becky@Portamento People

三秒切換耳筒 力挑NFC

話明特務手機,齋睇外形,你肯定估唔到佢係乜東東!正如星爺在電影都話:「佢表面上係一隻鞋,但其實係風筒先真。」AIEK A8都唔執輸,佢外表雖然係一款掛耳式藍芽耳機,但更重要的是佢仲提供電話功能!迷你機身唔夠100g,輕鬆自在掛喺耳仔,已經夠厲害;勢估唔到,機身印住0至9數目字,居然係用得嗰種!按鍵上還顯示輸入法筆畫,可以打中英文字,寫訊息;而更值得留意,Keypad下方提供了「Bluetooth」專用鍵,你只要㩒實三秒,就可以將耳機切換成電話功能,現場試用過,無論變身做普通無線耳機,又或者變番做電話,都唔使入設定畫面慢慢揀,而且通話表現亦好穩定,未試過斷線;論方便程度,隨時媲美一拍即連接的NFC㗎!

激細屏幕 顯示三行訊息

可能你會諗,咁細部手機,功能應該有限啦!無錯,A8的確唔似幾千蚊高階機般,玩巨型輕觸屏、內置高像素相機和Android系統,畀你單撈Apps;但不足100g重量下,能夠提供一個細於0.5吋的迷你屏幕,更內置手機鈴聲、聯絡人資料,並可一次過顯示三行中文字訊息,有齊晒入門機應有功能,用途上可謂交足功課!
佢係咪現時最輕、最細部的手機?並不敢妄斷,但能夠把藍芽耳機融入手機之中,論創意,一定爆燈;此外,佢亦好適合駕車人士,或機不離手的玩家使用,之不過數字鍵勁細,唔練番一排,好易㩒錯電話囉!

AIEK A8 $680

制式:GSM雙頻
主要功能:一鍵切換藍芽耳機或手機、單色顯示屏、收發訊息
顏色:黑、白

查詢:囍(2394 0077)

最強特務!配4,100萬像針孔鏡

如果你嫌A8功能唔夠勁,連最基本的偷拍鏡頭都無,咁就要考慮真正的高科技特務產品!
瑞士出鐘錶一向出名,但今次唔玩金撈,轉移發表特務手錶CROSSBOW。錶殼採用鈦合金,錶面更選用藍寶石製造!最特別係12點位置的突起部份,設置4,100萬像素蔡司鏡頭,高清拍片,超細緻照片就唔在講,還兼容Android、iOS甚至Windows三大平台手機齊齊用,仲支援WiFi、NFC以及GPS等高階機功能。如果想平試智能手錶,不妨考慮Hyundai的出品,先達價約$1,000。

足本收睇《亂噏24》x 甄子丹;天后潮媽陳慧琳接力登場 !
周一至周五《亂噏24》預埋你: http://bit.ly/appletalk24

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載