› 選擇地區
三藩市
紐約
洛杉磯
其他美國地區
香港 台灣 北美
 
2015年05月23日

【潛龍碟影】以神蹟包裝嘅《明日之後》 - 龍叔叔

碟舖老闆昌哥打嚟,問龍叔叔呢排蛇咗去邊,點解咁耐都冇碟評見街?查實龍叔叔近排多嘢做兼要出差,完全分身不暇啫。話雖如此,稿可以唔交,但碟就幾忙都要睇,早排煲完嘅《出埃及記:神王帝國》,真係值得推介。

龍叔叔並冇宗教信仰,打正旗號嘅福音電影一向少睇,今次《出》嘅引人之處,就係冇刻意歌頌上帝功績,齋以緊湊劇情同變態CG特技嚟留住觀眾,娛樂性滿到瀉。戲內仲有好多質問上帝嘅對白,例如「有哪個神會連小孩也不放過?」等。更嘩然嘅係角色設定,有條𡃁仔經常失驚無神出現,對摩西指指點點,仲嫌摩西手腳慢,勸唔掂法老王放過以色列人,於是自己郁手施行十個天災懲罰希臘人。條𡃁仔雖然係神嘅化身,不過滿臉邪氣,講嘢又寸又兇狠,堪稱死小孩中嘅極品,睇到一半,應該已經激到一眾「耶忍」紮紮跳,邊鬧邊離場。
咪勞氣住,大家其實可以當佢係一套以神蹟包裝嘅災難片,認真便輸了。由於當時希臘滿天神佛,個個都迷信到不得了,神就踩場挑機,向希臘人施以十災,等大家明白,乜神都保佢哋唔住。呢十災緊要喇,以現今高超視覺特技,重現血染尼羅河、密集冰雹、蝗蟲突襲、蛙災及瘟疫等巨變,簡直係古羅馬版《明日之後》,畫面、聲效相當嚇人,喜歡災難片同炸機嘅觀眾會開心到跳起。
雖然聖經冇明確寫出,但編劇為咗增加張力,大膽假設摩西年輕時係無神論者,四十歲後先信奉主耶穌,帶領以色列人過紅海。飾演摩西嘅Christian Bale,即係《黑夜之神》嘅蝙蝠俠,由年輕時青靚白淨,到同好兄弟法老王反面,跟住四十歲後滿面鬍鬚依靠神,由唔信到堅信,都演得幾自然,增加唔少說服力。

蝗蟲包圍 感同身受

前半段毫無悶場,加上特技出色,龍叔叔難免期待尾段摩西分紅海嘅高潮戲。可惜喺前有紅海,後有追兵之際,海水以大退潮形式露出陸地,畀以色列人行過對岸,唔係《十誡》同《埃及王子》咁,紅海變成兩幅牆,視覺衝擊當堂冷卻晒,好彩最後都有幾百米高嘅海牆出現,淹沒班希臘軍,叫做喺視覺上攞番啲氣勢。龍叔叔上網翻查,有網友指出聖經記載過大退潮(出14:21)同海水變高牆(出14:29),導演跟足聖經,兩樣都拍番出嚟,算係有做到功課。
論藍光碟嘅聲畫表現,算係A級㗎喇,天現龍捲風同尼羅河鱷魚互噬等,都靚到疑幻似真,畫面利落之餘,暗位仲有好多細節。3D嘅景深亦好強烈,多個wide shot都拍出希臘盛世,唔似一般2D轉3D咁虛假。至於聲效,就算無Atmos 11.2加持,單靠DTS-HD MA 7.1,已經好震撼,冰雹打落地下嘅低沉聲、清脆嘅格劍聲,都增加咗呢套災難片嘅可觀性。最正係蝗蟲圍城嘅包圍感,真到想伸手撥走佢,龍叔叔仲隱約聽到拖篋同講價聲,實在得人驚。
意猶未盡?三碟裝除咗2D同3D版外,仲有隻製作特輯bonus碟,入面收錄超過四粒鐘內容,由角色、時代背景到特技解構都講齊晒,而且全部有中文字幕,呢套三碟裝相當抵睇。

《出埃及記:神王帝國》

藍光碟(3D加2D三碟套裝)
灣仔價約$240

龍叔叔

幾十歲老宅男,聽歌煲碟打機無一不癡,一生最大成就便是家中收藏幾千隻碟,假日只愛潛伏家中煲碟,親情跟愛情也拋諸碟後。( http://www.facebook.com/uncle.dragon.movie )

編輯:陳國棟
美術:吳子豪

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載