› 選擇地區
三藩市
紐約
洛杉磯
其他美國地區
香港 台灣 北美
 
2015年06月20日

【潛龍碟影】龍叔叔的最終幻想 - 龍叔叔

魔晃爐重現,精細到似荷李活電影。

喺禮拜二幾乎同一時間,龍叔叔WhatsApp通知幾乎響個不停,原來係一班機友send過嚟,全部都講緊同一件事──《FF VII》終於宣佈重製,唔係傳咗N年嘅揸流灘高清版,而係真真正正remake!嘩,呢單嘢喺game界迴響仲大過政改方案被否決。對龍叔叔嚟講,更係媲美蘋果教主伸隻手入褲袋,講句「One more thing」咁重要。

嗱嗱聲㩒手機上網追消息,睇到PS官方條trailer,畫面靚到絕唔再講,後段重現番舊版本opening一幕,熟悉嘅Barret同Cloud嘅背影閃過,加上BGM《オㄧプニンダ-爆破ミツシヨン》,果種等咗18年嘅感動,全部湧晒上心頭。雖然只得動畫播片,未有實機game play演示,不過知道SqureEnix終於肯重製《FF VII》,其實已老懷安慰喇。
對今年E3遊戲展嘅勁game連發,實在有好多嘢想講,龍叔叔燃燒番起幾乎熄滅咗嘅「打機魂」,先忽然諗起《潛龍碟影》呢個欄,唔係齋講blu-ray㗎喎,今個禮拜就同大家「那些年」,分析下《FF VII》重製嘅消息。
廿年前,SONY同老任傾唔掂數,自行研發行光碟嘅遊戲機PlayStation,撞正老大哥世嘉部新主機Saturn,SONY憑住標榜多邊形圖像及「非硬派」好game,居然有本事鬥個旗鼓相當。激戰咗大半年,RPG王者Square(當年仲未同ENIX合併)宣佈喺PS推出第七集《FF》,更係首度跳出2D框框,多邊形角色動作生鬼咁走嚟走去,出超必好似睇戲咁精采,搞到成班機迷非機迷好似癲咗咁,瘋狂搶game。莫講話正版碟賣到斷貨,就算旺角同深水埗嘅老翻檔,都好似瀨尿牛丸咁,由五十蚊三隻碟炒到去二百蚊都有。加上當年「得Square、得天下」嘅市場定律,可憐嘅Saturn就如捅爆咗嘅汽球咁摺埋一嚿。隨後世嘉另一部次世代主機Dreamcast,同樣被PS2及《FF》聯盟所打敗,從此退出遊戲主機市場,專心做game,一代巨擘,實在比楊過隻銷魂掌更黯然。
冷靜一輪,龍叔叔心情稍稍平復,開始諗,廠方餓咗你班「FF忍」咁多年,𠵱家先拎隻皇牌《FF VII》重製出嚟,應該因為近年日系RPG大退潮,冇乜板斧下嘅最後手段。而且咁重要嘅消息,居然喺美國E3度發表,「㗎仔」嚟講算少有,亦證明日本本土市場,已經冇乜好期望,龍叔叔話之你,有得玩就得。從預告片中,雖然只見到主角背影,不過都知道新《FF VII》畫風唔再係Q版3D,而係接近劇情版《Advent Children》嘅設計風格,男嘅型女嘅索,應該可以重現主角飛上天打龍王巴哈姆特嘅精采場面。故事架構、人物背景全部冇得輸,唔使點改,最大問題係戰鬥系統方面。舊有嘅半回合制指令玩法已經out,好大機會換上類似《FF XV》嘅動作式戰鬥,即係要眼明手快考反應,咁樣好似會失去咗舊作嘅味道,即係等於王晶重拍《可憐天下父母心》,但角色換晒新潮戲服咁,好難call到共鳴。
點都好,呢個project必定幫到SqureEnix搵大錢,估計會好似《FF XIII》咁畀錢下載九萬幾套特別服裝同武器,龍叔叔嘅「最終幻想」,希望連女主角翻生復活劇情都可以download,改寫番遊戲個結局,對比較剛陽嘅Tifa,都係溫柔嘅Iris啱feel啲。

編輯:黃子卓
美術:吳子豪

龍叔叔

幾十歲老宅男,聽歌煲碟打機無一不癡,一生最大成就便是家中收藏幾千隻碟,假日只愛潛伏家中煲碟,親情跟愛情也拋諸碟後。( http://www.facebook.com/uncle.dragon.movie )

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載