蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年09月09日
馬上成為壹會員

【科技籽】消息一籮籮 新iPhone傳聞分析

【科技籽:發燒專科】
香港時間明日01:00,預計新iPhone 6s及6s Plus將於美國三藩市發佈會中亮相,新一輪換機潮亦會隨之而來。每當有新手機推出,事前總是傳聞滿天飛,今次也不例外,有說機身首度起用玫瑰金色、有說鏡頭提升至1,200萬像素,亦有說容量將由32GB起跳,甚至加入Force Touch技術等。空穴來風,未必無因,今次請來三位業界人士,逐一點評傳聞的真確性。

方保僑:新增玫瑰金 32GB起跳 

新iPhone會否加入Force Touch功能?香港消費電子產品聯盟主席方保僑認為可能性不大,原因是Apple需考慮售後服務,他笑言:「如果係一般香港人,㩒掣嘅力度可能唔會差太遠;但換轉係外國人,分分鐘大力到㩒爆芒,到時邊個嚟負責?呢個係需要時間考慮同解決嘅難題。」

對於推出玫瑰金色機身的傳聞,方保僑則說:「有70%至80%嘅機會成真,因為對於廠商嚟講,製作一種新顏色嘅難度唔算高,加上呢個消息流傳咗好耐,相信推出後嘅反應會唔錯。」鏡頭方面,他相信升級在所難免,並稱現時的手機技術相當成熟,4K拍攝應該沒有難度。方保僑又補充,新iPhone的機身容量,最高階級應維持在128GB,「如果提高到256GB嘅話,機價可能要過萬蚊港紙,但最低容量有機會加大到32GB,因為16GB真係唔夠用。如果鏡頭真係升級,所需要嘅儲存空間亦會相應增加。」

Sonny Dickson:沒有粉紅色 強化脆弱位

為了得到最接近Apple總公司的猛料,記者電郵訪問了澳洲其中一位知名blogger——Sonny Dickson。Sonny Dickson的網站一向都有大量與Apple新機有關的消息,而在iPhone 6及6 Plus推出之前,他就曾成功推測過機身的尺寸,可信性不容小覷。
Sonny Dickson表示,新iPhone除了灰、銀及金之外,亦會有首次出現的玫瑰金,但就不會有粉紅色。鏡頭則肯定會升級至1,200萬像素、支援4K影片,不過只能達至30fps,並表示很大機會用上SONY的感應技術。

對於新iPhone的容量,他直言將會沿用16、64及128GB,而機身尺寸則和iPhone 6一樣,價錢亦不變。不過他卻表示機身硬度可能會有改善,採用全新物料打造,並會強化脆弱位置,令機身更加堅硬不易拗彎。Force Touch他就沒有正面回答,但認為假如真的有需要裝配,都不會添置在屏幕之上,反而會另外安裝在按鍵之上。

魏志豪:Force Touch有機 硬度依舊

香港有數個由Apple粉絲組成的團體,當中包括成立逾10年的MACitizen,其會長魏志豪(Derek)表示,初次接觸Force Touch時覺得十分神奇,「我第一次用Macbook嘅Force Touch嗰陣,覺得成個mouse pad好似會因應我嘅力度大細而真係㩒得凹,但當你睇住個mouse pad嗰陣,又唔會見到佢凹落去,我真係覺得好神奇。」他認為Force Touch技術既然已發展成熟,在Apple Watch及Macbook都成了基本配置,加入至iPhone應該也沒有難度。

至於機身硬度,Derek則較保守,他表示自己由iPhone 3G到3GS、4到4s、5到5s看出了一個模式,「同一代嘅iPhone,都會沿用相同物料同外形,如果要令到機身更加硬淨嘅話,就有需要轉用新材質,呢個機會似乎唔高。」而對於iPhone 6經常有拗彎的情況出現,Derek覺得Apple會以「這些情況是因為部份用家的問題」來解答,而且這個時候轉用物料,豈不是間接承認自己有問題?聽起來又好像有點道理喎。
另外,Derek同樣表示新鏡頭將升級至1,200萬像素,機會率超過50%,「因為用家對相片質素嘅要求越嚟越高,但手機冇光學變焦,所以要靠提升像素去補救呢個弊端。」

先達場料

日韓水貨 平買易賣

熟路的買家都一定聽過,很多人會買入水貨再轉手到內地賺錢。三禾電氣負責人Simon則稱,除了日本水貨機之外,近年大家都開始留意韓版水貨,因為韓圜平,而且制式和香港一樣,內地亦可使用,所以頗受歡迎。談到香港人都可用韓版機,Simon則稱未必有保養。

玫瑰金代香檳金

先達廣場的G-World負責人Lo哥認為,iPhone 6s推出粉紅色的機會頗高,並認為玫瑰金將取代香檳金,「自5s開始有香檳金色出現,至今已相隔兩年,所以相信Apple會推出玫瑰金色,為果粉帶來新鮮感。」當年推出香檳金的確為Apple帶來新果粉,玫瑰金色或許能帶來更多女粉絲。

街頭直擊 市民點諗

記者:方健銘、容逸富
攝影:鄧鴻欣
編輯:陳國棟
美術:利英豪

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載