› 選擇地區
三藩市
紐約
洛杉磯
其他美國地區
香港 台灣 北美
 
2016年06月23日

【救生密碼】求救嗌Mayday?SOS又係點解?

至今晨仍然未救熄嘅迷你倉四級大火,高級消防隊長張耀升不幸殉職,其同袍即時呼叫國際求救信號「Mayday」,究竟呢個字點解?

至今晨仍然未救熄嘅迷你倉四級大火,高級消防隊長張耀升不幸殉職,當時同袍即時呼叫國際求救信號「Mayday」要求增援。原來「Mayday」取自法文「Venez m’aider」(快來幫我)一字,因「Mayday」同「m’aider」的法文讀音相似而成。其實唔單只消防人員,「Mayday」呼救訊號多為使用無線電溝通的行業使用,例如船隻、航機等。

相對「Mayday」,較多人認識嘅求救訊號係「SOS」。SOS最初在1905年由德國政府首先採用,同樣廣泛應用喺無線電技術溝通,透過摩斯電碼連續發出三短(•••代表S)、三長(---代表O)、三短(•••代表S)來表示,點解會係SOS?其實初制定時無特別原因,純粹因為摩斯電碼發出方法就手方便兼易學,夠容易辦識。不過現在大家都賦予佢解釋為「Save Our Ship」(救我們的船)、「Save Our Souls」(拯救靈魂)或「Send Out Succour」(派出救援人員)等。

除咗利用無線電技術嘅求救訊號,用物件發出閃光或聲響都係常見嘅發訊方式。國際山難求救訊號,就係一分鐘內發出六下訊號(例如吹哨子、用鏡或金屬片發出光線、用電筒發出閃光或者揮動顏色鮮艷嘅衣物等),停頓一分鐘後,再次重複,直至救援人員見到。點知對方見唔見到?原來救援人員見到求救訊號後,會喺一分鐘內發出三次訊號,停頓一分鐘後,再次重複,直至見到求救者。

記者:黃樂雯

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載