› 選擇地區
三藩市
紐約
洛杉磯
其他美國地區
香港 台灣 北美
 
2016年10月24日

【科技籽】積木鍵盤任砌LEGO

【科技籽:出閘搜新】
用鍵盤,手感是第一考慮,若加上外形討好,相信工作心情都會好一點,如果可以DIY日日換花樣就更完美。I-Rocks K76M鍵盤就滿足到以上要求,它附設一塊積木面板可以砌LEGO,打得又砌得,得閒擺個人仔上去,都咪話唔開心。不過I-Rocks雖屬專出高階電腦配件的台灣廠,但這鍵盤未有LEGO官方認證,好唔好砌試過先知。

I-Rocks K76M鍵盤附設的積木面板可以拆出,上面的積木顆粒和LEGO磚塊完全脗合,不過可能始終屬非官方產品,砌上去有點鬆。鍵盤用來打字,在中間位置砌LEGO礙手礙腳,所以砌LEGO的地方集中在最上方位置,不過最上方位置空間亦有限,想DIY大型創作就要凌空「僭建」LEGO磚塊,實試砌出三、四層高小屋,鍵盤尚算承受得來,個人認為簡簡單單,砌LEGO minifigures人仔會比較好玩。專門自製Lego人仔的「Smile Store」負責人Cathy表示用鍵盤砌LEGO這概念很好玩,「平時返工成日都要打字,有得砌LEGO感覺無咁悶,而且LEGO都有好多小配件啱砌喺keyboard上面。」不過她覺得不如官方積木般牢固,定價$999有點昂貴。
I-Rocks K76M是機械式鍵盤,每粒掣底下都有機械軸體和彈弓設計,軸體用上三彈片設計,比一般單彈片設計有更好回彈手感,同時配上ORS專利消音技術,有效減低打字時的聲響。實試過,打字感覺有上佳表現,$999在機械式鍵盤來說亦算是合理中價位,LEGO迷或者會放大積木底板不穩固這缺點,我覺得它是個手感一流的機械鍵盤,砌LEGO是額外bonus,適合對鍵盤要求較高的用家。

本地自製LEGO人仔服務

Cathy自製的LEGO人仔很有本地特色,穿紅色外套的家駒人仔很有神髓,還有郵差、巴士司機等等,Cathy:「製作過程係先網購官方人仔配件,再用數碼打印技術將電腦畫嘅圖案,印喺人仔上面。」當中,她最滿意畢業人仔,上面的畢業證書可印上大學名、人名,用來送禮十分有紀念價值。大部份客人的要求都可以製作出來,最重要是衣服有特徵,試過有學生想製作畢業禮物,Cathy就幫他們一次過製作了全班穿校服的LEGO人仔。自製LEGO人仔每隻$99起,視乎設計再決定收費。如果想自製LEGO人仔,除了幫襯Cathy的數碼打印技術之外,旺角朗豪坊LEGO Store和油麻地現時點商場一帶,也有不少LEGO人仔散件發售,自己動手配衣服、面部表情和頭髮,和砌LEGO磚塊相比,又是另一番樂趣。

鍵盤查詢:漢科(3629 9899)
LEGO人仔查詢:facebook「SmileStore」

記者:司徒港燊
攝影:許先煜、鄧鴻欣
編輯:陳漢榮
美術:孔文彬

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載