› 選擇地區
三藩市
紐約
洛杉磯
其他美國地區
香港 台灣 北美
 
2018年05月19日

【Salon專用】Dyson潮人風筒推$3,380專業版 新風嘴易吹造型

Dyson的Supersonic 風筒雖然定價比一般風筒貴一大截,但憑着型到裂的外形,同夠風又唔會過熱的功能,就成功吸引到唔少人入手。啱啱Dyson發佈咗升級專業版,不過所講嘅升級,大多都係配件或者一些細位upgrade,而主要的硬件和功能,就沒變動。

叫得做專業版,今次唔少改進都係針對專業的髮型師而設,好似新設計寬度更大的造型風嘴,就係方便髮型師在造型時吹出更精準聚焦的氣流。除此之外,風嘴的接位亦加強了磁力,增加24個磁極,令風嘴連接得更緊。髮型師用風筒時間一定比一般用家長,加上環境有更多髮膠和噴霧等雜質,所以今次專業版就設計了新的磁力可拆式過濾網,更多配一個後備,方便清洗和更換。另外,亦設有一個濾網清潔刷,用來清潔內層濾網,算係幾貼心的小配件。

如果你細心的話,或者就會發現髮型屋用的風筒電線一般都比較長,而Supersonic專業版亦沒有忘記這一點,把電線加長至3.3米,不過就比較難收藏,一般用家或者不太適合。另外官方亦話,今次開關鍵設計得更牢固,令它更耐用,不過記者現場玩過又未太feel到分別。

最後,當然係價錢問題,又升級又有新配件,但今次專業版就冇話加價,同一般家用版一樣賣$3,380,更附送更長的兩年保用!覺得抵咗好想買?不過要講聲Sorry先,睇咗咁多隻字介紹,而家我先講個殘酷現實你知,就係只供業內人士訂購,而唔會公開發售,冇計喇,都講到明係專業版嘛。

記者:韓繼聰
攝影:劉永發、鄧鴻欣

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載