› 選擇地區
三藩市
紐約
洛杉磯
其他美國地區
香港 台灣 北美
 
2018年07月27日

【玩物達人】SNK 40周年紀念機 遊戲界勞力士Neo Geo一盒game值11萬

【玩物達人】
Neo Geo Mini水貨到港,這台慶祝 SNK成立40周年的迷你遊戲機,內置40款經典街機遊戲,《拳皇(KOF)》、《Metal Slug》機迷應該都很熟悉,不過你又知不知道它的原身1990年推出的Neo Geo有幾咁巴閉?唔直接答你,用例子答你,1996年推出的Neo Geo版《Metal Slug》盒帶,現價可以賣十多萬港元,稱得上是遊戲收藏界的勞力士。

Neo Geo Mini外形似迷你街機多過Neo Geo家用版,事關Neo Geo當年其實是「一機兩味」。收藏家Felix指當年除了家用機Neo Geo AES,還有街機系統Neo Geo MVS。「兩個系統用的底板相若,喺當時應該係第一個諗到將街機同家用機混合,呢頭街機出完,好快家用機就有得玩,質素幾乎一樣,好震撼。」同期對手超任、世嘉五代和PC-Engine遊戲最多只有幾十MB,Neo Geo已經玩到過百MB,亦是第一部家用機用記憶卡,在家打完可以拿出街插落街機,繼續用相同存檔進度,十分破格。當初廠商SNK只打算推出街機和商用廠品,最多安裝在酒店,但當年街機遊戲極受歡迎,後來才決定推出市面,因此定位堅離地,售價650美元(約5,100港元)。計回當年物價,已是打工仔大半份月薪,遊戲亦要千多元一隻。

產量極少 全球瘋搶有價有市

拍攝當日的珍藏由遊戲店店主阿文帶來,邊擺陣邊指揮拍攝,「《Metal Slug》、《侍魂零》要影到,外國玩家睇到都會話識貨。」Neo Geo遊戲全世界都有價有市,cap圖為證,《Metal Slug》第一集Neo Geo盒帶在日本拍賣網價值160萬日圓(約11萬港元),其他一些較難找到的遊戲都要價過萬,「有網友facebook放隻《Metal Slug X》,我話當晚出嚟用二萬蚊即收,對方初初唔信,話真係收嘅話就會捐一萬做慈善,最後都真係捐咗。」Neo Geo算是有錢人的小眾玩意,難言大紅大賣,卻因為定位獨特,一直至2004年SNK仍有為其推出街機移植遊戲,主機銷量約為100萬。亦因為小眾,遊戲產量往往不多,《Metal Slug》由廠商Nazca發行,後來這間廠被SNK收購,產量極少造就天價。
除了量少,阿文和另一收藏家Felix也讚賞Neo Geo遊戲的質高。Felix指後來的Playstation和Saturn也有出過相同作品,但還是NeoGeo版本好玩,「PS要讀碟,流暢度也是Neo Geo版較好。」阿文則很欣賞當年的遊戲設計,「Neo Geo沒有3D遊戲,但當年真係用盡2D機能,2D格鬥遊戲做得好其實難過3D,每一格動作都要畫,唔似而家3D模組,可以計出嚟。」例如《龍虎之拳》,除了放大縮小,角色會被打到「爆缸」、口腫面腫,現在再看也不覺落伍。當然以現在的科技,Neo Geo已沒有機能優勢,Neo Geo Mini也基本上能做到和原版相同的表現,但機迷收藏的除了主機和遊戲之外,還有珍藏着一個已然遠去的年代,在街機式微的今天還保留着Neo Geo也算是一種幸福吧?

Neo Geo Mini聲畫出色

Neo Geo Mini收錄40款Neo Geo經典遊戲,分為亞洲版和國際版,遊戲陣容會有14款不同。Felix試機後大讚聲效表現出色。用USB-C供電,以一般外置電源接駁也開到機,也是一個方便的地方。不過暫時只能接駁另購的專用手掣,希望日後會推出Joystick大掣方便大家打《拳皇》等格鬥名作吧。

記者:司徒港燊
攝影:伍永健

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載