蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年08月17日
馬上成為壹會員

【櫃員機迷思】渣打機變快咗?傳聞女人撳錢特別慢?

櫃員機,雖然未必日日會去撳錢,但神奇嘅係每次都趕時間兼大排長龍,仲要前面班人個個手腳極慢用到2046。我哋就街訪咗大家用櫃員機最怕遇到邊啲情況。

第3位 排錯隊定打尖

櫃員機排隊方法有好多種。1部機1條龍,咁排法好似賭大細,唔一定人少嗰條隊就快,如果你前面嗰個人拎住成疊單瘋狂入數過數,就GG(gameover)喇!但如果1條龍排好多部機,有時又會有人懵盛盛唔知扮排錯隊定打尖。櫃員機點排隊最好?就好莎士比亞句「To be or not to Be」,係個永恒嘅難題。

第2位 櫃員機有垃圾

用得櫃員機,好多時都係本地人喇啩?但講到櫃員機衞生情況認真麻麻,櫃頂有飲品就成日都見,紙巾同單據都係通處丟,有受訪者仲話見過鍵盤位塞滿頭髮,希望佢唔係撞到污糟嘢啦!櫃員機有垃圾又核突又惡心,大家記得要有公德心。

第1位 無奈的等待

唔使估、又唔使inbox都知道答案,櫃員機最怕梗係等。有時前面嘅人好多操作,撳完又撳,嗰啲真係好想開口叫佢「再排隊啦!」。不過網上有網民就話,女人用ATM都特別慢,甚至話「女人」加「渣打櫃員機」係絕配,係慳時間嘅絕配啊!原來好多人都話渣打櫃員機特別慢。

去年動新聞都做過ATM撳錢速度實測,結果渣打櫃員機全港最慢,117秒、近兩分鐘先撳到錢。不過聽聞最近渣打櫃員機更新咗,我哋就再試多次,結果真係快咗唔少,從入卡到拎錢,33秒左右搞掂。渣打櫃員機都會快咗,女人撳錢慢都未必係一定嘅。

記者:司徒港燊、馬子聰
即Like全新飲食專頁【籽想好食】: https://www.facebook.com/food.appleseed/

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載