› 選擇地區
三藩市
紐約
洛杉磯
其他美國地區
香港 台灣 北美
 
2019年01月10日

【黑鏡線索】Google同facebook嘅最大心結

歷史如果話科技巨擘嘅主要業務係賣廣告,又唔型又有啲污糟,佢哋巨頭心裏面會係乜嘢滋味。

【黑鏡線索】
Google同facebook貴為全球最有影響力嘅科技公司,你大概會認為,佢哋嘅創辦人CEO,會對自己寫入史冊嘅成就頗為自豪。有趣嘅係,種種迹象顯示,佢哋其實都有好大嘅糾結,仲要係相類似嘅糾結。

Google兩位,最關心嘅係成間母公司Alphabet底下嘅Google Glass、無人車、長生不老科技等等,至於大家心目中嘅狹義版Google,其實幾年前已經交畀人做CEO。而喺facebook,Mark Zuckerberg最沉迷嘅業務,反而係仲係未成氣候嘅AR等等嘅副業。

收入來源得一個:廣告

係,錢係賺好多,而且一蚊就係一蚊,但到咗某個階段,都會好關心啲錢其實係點樣賺返嚟。Google同facebook嘅共通之處,係喺收入嘅角度嚟睇,係切切實實嘅廣告公司,縱使介紹書有幾多幾多唔同業務,收入來源基本上係得一個,廣告。

Google當年挾着全球最勁最多人用搜尋引擎嘅銜頭,但係苦於搵唔到方法賺錢,後來有間叫Overture嘅公司發明搜尋廣告,Google驚為天人即刻做AdWords,往後就係歷史。呢一個發展對Google極為重要,但有理由相信,Google管理層會以為慢慢就可以減少對廣告嘅依賴,點知只係越踩越深。

科技人初心:改變世界

facebook曾經經歷類似階段,由PC轉去手機時,連本來唔多嘅廣告收入都再縮,直到撞吓撞吓撞到喺用Newsfeeds包裝廣告,手機平台最後變咗救星,往後就係歷史。

做廣告為生有乜問題?第一個,唔係一般人關心嘅問題,純粹係行業嘅心結。廣告人賺廣告錢當然無糾結,但係科技創辦人嘅偶像,唔係Ogilvy,而係Steve Jobs、Bill Gates。好多時創業嘅初心,係用科技去改變世界,賺嘅錢,一係嚟自賣科技產品,例如iPhone,一係嚟自平台,例如Windows。總之就唔係賣乜鬼嘢廣告。

第二個問題,就的確關網上廣告業本身事。一百年前,未有互聯網廣告,廣告業有句金句:"Half the money I spend on advertising is wasted, the trouble is I don't know which half.",互聯網廣告,好多人憧憬,會終於解決到呢個問題。你落實體廣告,鬼知邊個人有睇。但係互聯網廣告,就每一個click都有紀錄,唔click唔畀錢,咁仲唔減廢?

副業變正業 扶唔起阿斗

結果呢,連Google自己都承認,有一半嘅所謂有人睇過嘅廣告,其實係bot睇,唔係真人睇。網上廣告真click假click,唔係非黑即白,而係灰色地帶,三角關係裏面,publisher、ads network、商戶,前兩者絕對有誘因傾斜去對bot鬆手嗰一面,於是乎,兜咗個圈,又係原點:Half the money I spend on advertising is wasted, the trouble is I don't know which half."。亦都係咁,做互聯網廣告賺返嚟嘅錢,有人硬係覺得唔太乾淨,好似petrodollar咁,甚至直指係click fraud。

想像一下,當Google、facebook級數嘅創辦人,回顧自己嘅成就,當人哋Elon Musk又電池車救世又乜火箭幫人類永續香燈,歷史就話佢哋主要業務係賣廣告,佢哋心裏面係乜嘢滋味。當你每日返工,明明好唔想賺廣告錢,又唔型又有啲污糟,但冇廣告錢就冚檔,心中嘅副業好似永遠都係正業,心中嘅正業就好似係扶唔起嘅阿斗,當中嘅糾結就唔難明白。

撰文:宋漢生

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載