› 選擇地區
三藩市
紐約
洛杉磯
其他美國地區
香港 台灣 北美
 
2019年06月13日

【黑鏡線索】Remote Work入門

【黑鏡線索】
遙距工作,喺科技界雖然未算主流,但肯定已成一定氣候,識幾間行內嘅公司,都已經行緊呢條路。心態係,橫掂都遙距,以後搵人才,撒個網就可以大到全世界上到網嘅地方,而唔再係拘泥於方圓幾公里範圍。

掉轉頭,人才嘅心態係,橫掂都遙距,以後搵公司搵顧客,撒個網就可以大到全世界上到網嘅地方,而唔再係拘泥於方圓幾公里範圍。亦即係話,無論你人在何方,收入都唔會受影響。

當越來越多人,因唔同原因局住離開自己嘅城市,遙距工作呢個選項,就變得越重要。其實,呢個選項,比起好多人所以為嘅,成熟好多,只不過係喺正常時候,好多人都會by default揀一直最主流嘅路,而冇原動力去發掘。

自律太差 唔啱遙距

我唔係好識其他行業,但基本上,digital有關嘅工作,好多都可以行呢條路。Programming同digital design,就好明顯得,但仲有好多,例如online marketing就係好大嘅一個範疇,由寫content到繙譯到SEO等等,工種人數都唔細。

點準備?可以上網search "remote jobs",會搵到主要嘅全球遙距工作網站,job posts由freelance到perm都有。掃吓啲job posts,睇吓請遙距人才嘅公司,要求嘅係乜,睇重嘅係乜。

幾個重點。一,遙距工作,管理有唔同嘅難度,亦都唔係人人適合遙距工作,例如有啲人自律太差,或者唔識得喺遙距環境有效溝通,如果係咁,就算高技能都冇用,所以好多公司,都希望請啲已經有遙距成功經驗嘅人。

當然,呢個係雞同雞蛋嘅問題,但可以解決,就係重點二,要喺主要作品發佈網站,建立自己嘅portfolio,如果你係programmer,咁當然係GitHub,designer就Dribbble,呢啲好多人都知,但係正常好多人拖咗好耐都未得閒做,而家可能係時候的起心肝。如果你仲係停留喺「我做咗好多勁到飛天嘅嘢㗎,不過前公司唔畀我公開之嘛」嘅年代,咁就係時候醒醒。

溝通能力是王道

係,在open source projects冇錢收,做設計小練習或小玩嘢放上Dribbble冇錢收,但係對儲portfolio嚟講好重要,係中長距離投資。如果你未有深厚工作經驗,係時候考慮每星期預留一啲時間喺呢一方面。

參與open source projects,你同其他合作者嘅溝通紀錄,就係證明自己有足夠遙距溝通能力嘅最佳證據。而你參與比較高水平嘅open source projects嘅時候,好大機會發現自己溝通能力會提升,太多人睇小溝通能力,但喺遙距世界,溝通能力係王道,而展示自己嘅思想同技能,都係溝通嘅一種。

大部份遙距工作,都係美金交收,呢個對好多人嚟講係優點。而就算有一日唔知點解想搵返份要肉身出現嘅工,以上嘅投資,都肯定冇嘥用得着。

撰文:宋漢生

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載