› 選擇地區
三藩市
紐約
洛杉磯
其他美國地區
香港 台灣 北美
 
2019年07月11日

【黑鏡線索】廿二世紀自救網絡 - 宋漢生

【黑鏡線索】
估唔到老董今次,竟然自爆係感染源頭,爭在未宣佈自己先係真正嘅港獨之父。咁又係,雖然喺香港人角度,過去十年急劇倒退,但其實喺對家眼中,搞咗廿二年,投入大量資源,都仲係搞唔掂民心,民調顯示十個年輕人有九個唔認同係中國人,應該都好震怒,責成扮晒香港通嘅阿伯好好檢討交代,份屬正常。

據聞老董喊住咁話,一日最衰都係自己任內引進通識,換走中史,搞到學生獨立思考,唔再愛國。表面睇,好似好有道理。畢竟,中史課程,係塑造大中華膠嘅重要材料,基本上,整個內容,都係服務偉大中華文化龍的傳人一脈相承到而家巨龍蘇醒嘅主旋律。新一代中學生冇受此洗腦,當然係難啲潛移默化出中國情懷。

香港人成全球覺醒潮流的前線

但係,過去十年,連受過中史教育而成膠嘅大中華膠,都開始覺醒。上星期食飯,有位朋友自爆,自己曾經極度大中華膠,當年女朋友話去日本旅行,佢話一日未去晒祖國咁多個省,睇勻中華秀麗江山,佢係絕對唔會踏足日本呢啲地方,否則對唔住列祖列宗。佢而家睇返,自覺真係膠到七彩,但有呢種懺悔,相信唔係個別例子,而係好多同代人嘅共同經驗。

連原本讀中史冇通識嘅一代大中華膠,都紛紛覺醒,可見過去十年情況嚴重到寫晒喺堵牆,照咁睇,老董嘅影響力,其實冇佢自己講到咁勁,中學生讀唔讀中史,讀唔讀通識,都唔會咁容易培養出中國情懷,老董嘅一念之差,最多只係令年輕人兜少個彎,慳咗個懺悔,所以頂盡只可以計助攻,而唔係奠定賽局嘅關鍵。

更何況,懺悔覺醒嘅,唔單止係香港人。西方國家幾十年嚟,對強國崛起充滿無限幻想,但近幾年忽然醒悟,原來捉咗蟲。你見連美國左膠大報,都挖掘返當年克林頓拍心口擔保強國加入世貿嘅誤判,大興問罪之師,風向轉變之急之大,可見一斑。五年前,香港人基本上單打獨鬥,五年後,西方媒體形容,香港人成為全球覺醒潮流嘅前線。

百萬計香港人覺醒,唔會下下基於理想主義。有創科界朋友,好有興趣借響應政府,乘大灣區機遇,撈返一筆,反正佢唔撈,都總會有人撈。但係當佢嘗試認真去睇政策文獻,就發現,每一隻字佢都識,但係加埋冇一句佢睇得明,就算改睇一圖讀懂嘅懶人包,都係睇唔掂。所謂嘅融合,明顯係單向融化,隔山打牛。如果啲政策真係代表香港嘅未來,佢話明顯個未來從來冇預佢一份。

創科界流行一個理念,創業唔係鬥落筆準,反正個個落筆都有大大小小嘅錯,最重要嘅,係你修正得幾快幾密。即係話,個產品1.0實係頹,關鍵係2.0、3.0等等。如果雨傘係1.0,五年後嘅嘗試——修正速度,係出乎所有人意料。最估唔到嘅,係撕一貼十咁,將行動更本土化,貼地貼到去地區層面。不單止冇大台,連幅連儂牆拆咗,都可以分裂成以十倍計嘅新連儂牆。

從來,要新界九龍朋友去港島出動好似天經地義,港島就係大台,而家醒起,香港其實點止係維園至金鐘。一直以嚟冇認認真真好好行過沙田,沙田係朋友LikeCoin高健(高重建)地頭,之前聽佢講七月要飛返台灣,慶幸前兩日見佢喺fb話當然要改期飛行,咁就要捉住佢做嚮導。沙田見。

撰文:宋漢生

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載