› 選擇地區
三藩市
紐約
洛杉磯
其他美國地區
香港 台灣 北美
 
2019年07月18日

【黑鏡線索】信用評分仲大鑊 - 宋漢生

《Winter on Fire》劇照

【黑鏡線索】
紀錄片《Winter on Fire》中,年輕人被問點解行出嚟,佢哋話,We want to be part of the free world。

分岔路上,一邊係歐盟,另一邊係俄羅斯。民眾湧出嚟,就係想力挽狂瀾,阻止自己國家走上自由世界對面嘅不歸路。

反送中事件,777埋怨香港人跣佢一鑊,明明之前一系列粗暴舉動,由DQ到一地兩檢,大家冇乜反應,都照畀佢過,反送中明明都係同一類惡法,點解忽然彈二百萬人出嚟反抗?

踩中臨界點 喚醒香港人

第一,有樣嘢叫臨界點,唔臨界你睇唔到,唔代表唔近臨界點,睇唔到臨界嘅線索,只係你視而不見,或者能力不足,或者豪賭,賭就梗係有可能輸。第二,送中係直接連上強國嘅陽光司法,學十一哥話齋,強國嘅陽光司法,喺國際係屬於敍利亞水平。送中威脅香港人自覺係free world一員嘅自我形象,咁大反應,其實唔出奇。

送中一役,反映二百萬人覺醒,再行落去,必定會脫離自由世界。正如美英德等人民,忽然覺醒,廿年前左膠克林頓擔保強國入世,以為會因此令強國逐步加入自由世界,原來係超級大誤判,而家先嚟急煞車。

如果送中法係大件事,咁接通強國社會信用評分,就更加大鑊。就算喺所謂free world,社交評分都備受爭議。本來,任何公司,賞罰用戶,都係好正常嘅做法。如果你搭飛機搞事,可能會俾航空公司永久black listed。如果你搭得夠多,可以升級優先上機等等,大家接受。

但係,當越來越多行業全世界(當然唔計強國)得一兩個巨形aggregator,咁就有啲唔同。睇過《Black Mirror》嘅,一定記得個人評分一集,主角分數跌咗,連租車都有困難。當一個行業嘅服務,冇乜其他供應選擇,俾人罰就好大鑊。我嘅Uber分數,得4.5,老婆4.8,唔知係咪心理作用,硬係覺得因此我叫唔到車嘅時候,好似佢就會叫到。

陽光司法 就係信唔過

喺歐美,開始對呢啲公司權力過大嘅問題,敲響警鐘。咁你諗吓,如果計你分嘅,唔只係一間獨大公司,而係你嘅國家,情況有幾嚴重。創科局局長楊偉雄話,財務信用評分,西方國家都有。問題係,第一,個評分評到幾廣,懲罰影響幾大?第二,都係嗰句,陽光司法,香港人信幾多?陽光評分,大家又信幾多?

當英國編劇以為自己好前瞻咁寫咗個警世科幻劇本,點知原來喺科技強國,同一個故事只係一套社會寫實片。所以強國話科技有幾領先,唔係講笑,係真嘅。送中都仲話未必咁快排到你,信用評分,就應該係人人有份永不落空。唔知彈出嚟話香港唔會用社會信用評分嘅高官有幾老實,但係講到明成個大灣區嘅重點維穩項目,又點會唔千方百計益埋香港?

撰文:宋漢生

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載