› 選擇地區
三藩市
紐約
洛杉磯
其他美國地區
香港 台灣 北美
 
2019年08月08日

【黑鏡線索】世上最遙遠的距離 - 宋漢生

FB live直播,即時唔代表最真實,但起碼真實過有剪接。 網上截圖

【黑鏡線索】
/英國人為通商,攞咗個得幾千人口嘅荒島。一百五十年之後,卻將已蛻變成國際城市嘅地方,移交畀另一個文明體制風馬牛不相及,大纜都扯唔埋嘅強國政權。為咗夾硬解決呢個器官排斥問題,強國偉大總設計師發明咗一國兩制呢個辦法。而呢個包裝紙嘅內容,寫得好清楚,包括雙普選。

問題係,移交之後,一路以嚟,實際上嘅一國兩制,都未做到雙普選呢個承諾,董曾年代,泛民代表爭取,結果都係拖完又拖。到咗689,不單止拖數,仲開始行使行政暴力、程序暴力,激起雨傘運動。嚟到777,暴力程度仲超越埋前朝,反作用力等於作用力,結果送中條例掀起冇大台嘅全港逆權運動。

港獨之母不回應 仲屈人否定一國兩制

香港人一直爭取嘅,只不過係正版一國兩制。777不特止冇幫手爭取,反而不停咁暴露強國版一國兩制嘅bug,到底係乜嘢居心?唔通係想令到香港人質疑一國兩制其實work唔work?明明五大訴求裏面,請楚講明要求實現一國兩制框架底下嘅雙普選,點解777對此,隻字不提,反而鏗鏘有聲咁,朗讀「光復香港,時代革命」?難怪有人封佢為港獨之母。

正如曾俊華準確預言,777係撕裂2.0,撕裂力比689更加進化。五大訴求,一點不應,和理非二百萬人上街,唔應,勇武,唔應,再升級勇武,都唔應,然後和理非三罷,唔應機之餘仲要屈人否定一國兩制。唯一嘅回應,就係出動警鄉黑鎮壓,總之就係不斷將撕裂升溫,總之就係要不惜玉石俱焚都要禁絕已經遲咗廿二年嘅真正一國兩制。

兩個月嚟,身邊每一位香港朋友,都被777政府折騰。朋友高健寫了首詩,最後兩段係:

世上最遙遠的距離

是立場不同的多年好友 

在臉書 unfriend 自己



是好友維持臉友關係 

但算法讓二人讀着截然不同的新聞 

看不見彼此



是好友一直互相看到彼此 

持相反意見 但保持沉默 

維持臉友關係

FB喺呢次運動裏面,有兩個好重要嘅功能,一個係FB live直播,另一個係FB feed,各自有好唔同嘅影響力。FB live係抗爭網上三寶,最大貢獻係,一)喺唯一發牌電視台CCTVB之外,畀大家睇到其他不同取向媒體報道,打破大台壟斷。二)畀大家睇到即時冇剪接畫面,去抗衡任何剪接版本,例如CCTVB版本。當然,即時唔代表最真實,記者決定去邊度,影邊個,可以影響出嚟嘅效果,但起碼真實過有剪接。而關於FB feed,下次再講。

撰文:宋漢生

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載