› 選擇地區
三藩市
紐約
洛杉磯
其他美國地區
香港 台灣 北美
 
2019年11月05日

【黑鏡線索】當中國變成對手 - 宋漢生

九七移交,其實係以「回歸」包裝,本質上係一個騎呢兼併。

【黑鏡線索】
港交所李小加衝出嚟講,話鄧小平嘅一國兩制,本身個設計就有問題。簡單嚟講,中國兼併香港,係一個錯誤嘅M&A。

香港自英國人創立第一日開始,就係自由世界嘅一員。同一時間,中國,就一直係極權世界嘅一邊,仲曾經同蘇聯爭做世界極權一哥。將香港移交畀中國,就等如北韓兼併新加坡,或者中移動收購Snapchat,無論點睇,都係奇形怪狀,難以令人樂觀嘅刁。

問題係,當時鄧小平,為咗民族主義操作,決定無論點都要去馬,唯一考慮,係點樣實際上盡量保持區間,令香港呢間新收購,繼續保持獨特地位同功能,俾母公司搵着數。於是就有所謂一國兩制嘅設計,左右逢源。

擴大一國 收縮兩制

更爛嘅刁,都有蜜月期。但過咗蜜月期之後,問題就浮現。「一國」同「兩制」當中嘅比例,隨住時間,中國政權,越嚟越擴大一國,收縮兩制,由開始慢慢唔再提「高度自治、港人治港」,到最後索性宣佈中英聯合聲明壽終正寢。

中共將龍門越搬越過,其中一個伎倆,係不斷強調既然已經係一家人,就即係命運共同體。所以你見老董喺移交後強調「中國好、香港好」,之前一百五十年,有冇邊位港督,衞奕信或肥彭,會嗌the better China is, the better for Hong Kong?

中國式邏輯係,既然唔併都併咗,念在大家都係一國,香港人咪將就吓。中共好巧妙咁,首先將兼併呢個既成事實,講到係歷史嘅必然咁,再將呢個所謂歷史必然,撈埋啲fake news歷史,乜嘢〇三沙士係中國出手拯救,九七金融風暴係中國打大鱷等等,去引證大家都係中國命運共同體嘅主旋律。

唔好忘記,香港九龍係割嘅,只有新界係租,而二十年代港督金文泰曾經倡議,將新界轉租為割,作為交還威海衞嘅補償,可惜最後英國冇做。九七與否,只係一線之差,並唔係乜嘢歷史必然。

所謂回歸 騎呢兼併

中共目的,就係要大家唔好深究,九七移交,其實係以所謂「回歸」包裝,本質上係一個騎呢兼併。喺命運共同體主旋律掩護下,中國將兩制條線越移越過,試探香港人嘅意志。777對中共嘅過失,第一係睇死香港人冇意志,老點中共授權開大個火,釀成爆炸。

第二,本來香港主流民意,喺自由世界普世價值同中國身份之間,立場曖昧,但經777一煮,逼出個清晰選擇,就如李小加所指,香港人喺兼併廿二年之後嘅今日,明顯拒絕擁抱極權世界大灣區一帶一路嘅溫飽生存價值觀。反送中逼出攬炒抗爭意志,喺香港人心目中,中國由好似一家人,變成要永遠嚴防嘅對手。

於是,中共以後每次搬龍門,成本高咗好多。當黃藍商舖app變成大家生活購物必備,就連中資商業滲透操控都麻煩好多。如果建制派喺區會選舉有乜三長兩短,連蛇齋餅糭維穩budget都會緊張。喺中國最缺錢時,先嚟買乜都扯貴晒,仲要就算換人,都唔會點平返落嚟。 777搞送中,結果撕破中共嘅面具,暴露殖民面目。喺呢個後爛面時代,中共將會改變招數,香港人如今只有眼前路,沒有身後身。

撰文:宋漢生
fb : sunghsblog

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載