› 選擇地區
三藩市
紐約
洛杉磯
其他美國地區
香港 台灣 北美
 
2002年10月19日

周末遊車河:
大直路去到汀角路玩埋摸蜆

■早到嘅人架車泊到入魚塘邊夠方便。

雖然話香港豆丁咁細,但假期遊車河其實都有唔少好去處,例如由吐露港入汀角路、大尾篤、新娘潭路直到鹿頸,大部份以直路為主,駕駛絕不費神;想玩得更有feel,最好選擇四驅車,打開天窗感受一下大自然氣息,沿路有玩有食玩埋摸蜆,動靜皆宜,大人細路都適合!

記者:黃婉冰 攝影:陳穎

沿吐露港公路經大埔工業邨,途經汀角路時,就在對面馬路有一個不大起眼叫「親親大自然」的農莊,農莊在兩年前開業,雖然沒甚麼園林景致,但勝在搞作多,動靜皆宜,最適合一家大細合家歡玩足一個上午。

燒烤摸蜆餵動物 一站過
記者遊車河途中遇到好溫馨的林先生一家人,林先生說:「我哋專程由天水圍入到嚟玩,我自己揸開旅遊巴,好多時載啲本地團入嚟玩,嚟得多,見有動物又有紅樹林、養菇場,所以今次咪帶埋屋企人嚟玩囉,呢度好適合一家大細,燒烤食物味道OK,但如果有得租埋單車重好,唔使行出去租咁麻煩。」

農莊有個小小動物園,見到與小豬嘜同一屋簷下的還有幾隻灰兔。「呢幾隻灰兔中,有啲係因為主人唔可以再飼養或唔想養,但又唔想拋棄,就送畀我哋。」負責人蘇小姐說。小朋友可以餵兔仔食紅蘿蔔,紅蘿蔔及飼料在詢問處有得賣。另有羊仔、龍貓、珍珠雞、鵝、白鴿,其中有兩隻台灣烏豬,大的叫「哥哥」,而一隻叫「豬嘜」,另一負責人話只有老闆溫生叫才會應,果然,記者叫極都唔瞅唔睬,食檸檬收場。
歐小姐一家:「我哋係經朋友介紹,第一次入嚟玩,啱啱去完三門仔,跟住就落嚟,自己揸車都好方便,呢度又夠大,好舒服,好值得再嚟多一次。頭先摸咗一個鐘頭蜆,但都幾難摸,收穫唔係好多。」
燒烤場下面有個布滿紅樹林的灘,拍攝當日正值潮退,很多人落去摸蜆,更有人即摸即燒,但想摸蜆的話記得check清楚潮退時間。

蝦場即釣即食
釣蝦場一樣咁旺場,蝦池周圍企滿人,睇見個個收穫不錯,看來難度不太高。魚竿每支$50一個鐘,加多$15燃料費,重有人煮埋畀你食,即釣即食夠晒新鮮。

鮮菌做手信
釣蝦場旁邊就是自耕地同菇菌養殖場,住慣城市大可以返璞歸真,一嘗耕種滋味,菇菌養殖場供開放參觀,參觀完還可以買走,又或是給專人即場炮製,鮮菌每包$20-$30。

駕駛貼士
泊車唔使錢
親親大自然農莊內周圍爛地都泊得車,全部免費任泊兼地方充足。到達之後可先燒烤,但燒烤食物只可以即場買,不能自備,燒烤包連一款飲品、用具費每份$60。燒烤場附近正在維修土地,玩時要留神。
汀角路再入經大尾篤到新娘潭路,短短數十分鐘的路程中,出現得最多的非燒烤爐莫屬,沿途大大話話都有十多個燒烤地方,但車位極少,所以好多車都被迫泊在路邊,途經這路時最好多加留神;這裏亦不可錯過沿途的風景,有好多人都會在這裏落車影番張靚。

親親大自然農莊
電話:26626298 
地址:大埔汀角路17號地段(汀角村對面)

雞谷下村魚塘垂釣
這一路有不少釣魚場,位於鹿頸新娘潭路雞谷下村的海水釣魚場便是其中之一,聽聞是不少釣魚發燒友的釣魚勝地,客人可將車停泊在湖邊,戰利品可加錢交由店員幫你即時烹調或取走,難怪一到假日,場內便擠滿人同車。
歐生:「我哋由大尾篤遊車河經過見到咪入嚟行吓囉,呢度幾好玩,呢個時候個天氣幾好,幾舒服,幾好玩,但係泊車就較為麻煩。」

畀五個鐘錢釣足一日
下午時分魚場已滿座,顧客可選擇斷小時計或全日計每釣一小時收費$40,可帶走一斤魚穫,兩小時兩斤,餘此類推,釣五小時之後作全日計,收費$200,最多可帶走五斤魚穫,魚竿可自備或$10租全日。

鹿頸海水養殖場
電話:96188667
地址:鹿頸新娘潭路雞谷樹下村

天后宮賞白鷺
在雞谷樹下村向前駛不遠就到達鹿頸路,就在新娘潭路同鹿頸路交接位,有兩、三間食店,斜對面有免費停車位,很多人都鍾意遊車河到此歇一歇腳後再回程。一到假日,不少住在附近的村民擺賣生果、蔬菜,有着鄉村氣息。進入鹿頸路,遠離燒烤爐,人少車少,空氣亦比較清新,終於可以打開天窗呼吸清新空氣!

最後一站是最接近沙頭角的天后宮,望向對面的鴉洲,這個季節正可看到白鷺,潮漲時牠們會聚集在鴉洲,水天一色,好多喜歡攝影的人都會在這裏取景影相。但拍攝當日只得寥寥數隻,確實有點失望,雖然如此,能欣賞到這些珍貴的白鷺,作為全程的終站都算不錯。

駕駛貼士
雙程路突變單線雙程
駛入鹿頸路後記得開始慢車,因為雙程路有時候又會突然變成單線雙程行車,隨時有對頭車駛來,尤其是彎位更加要特別留意。

豐田LandCruiserPrado四驅車
大大部坐得夠舒服
雖然今日我哋用作遊車河嘅豐田LandCruiserPrado,係屬於上一代型號,但佢嗰個極富肌肉感嘅車身線條,卻予人一份剛勁感,而較高嘅離地距配合四輪驅動系統,亦方便行走一啲崎嶇不平嘅路面。
車廂方面,不但空間寬敞闊落,全車真皮座椅重有頗高嘅承托性,乘坐貼服舒適之餘,遇有需要時更可將第三排座椅摺起,以便擺放行李或雜物;當然唔少得重有前後獨立恒溫冷氣、車門電窗、天窗、高級音響等配備啦。然而,一台3.4公升V6引擎,動力輸出強勁,匹配一套4前速自動波,行車順滑又寧靜,而四輪碟式制動亦可予人有收放自如嘅效果呢!

行貨水貨 設備有別
不過,由於廠方已經喺日本本土市場,推出新一代LandCruiserPrado,所以代理及水貨車行理應再無舊款型號嘅新車出售;有興趣嘅朋友可留意二手市場上嘅放盤,但亦要留意行貨及水貨車之分,因為設備或引擎配搭上會有所差別,故此選購時不妨睇多幾部放盤,揀啱先買都未遲㗎。

記者:鄭達基

豐田LandCruiserPrado小檔案(行貨)
引擎:3378ccV6DOHC
馬力:178ps/4600rpm
扭力:31.0kgm/3600rpm
尺碼:4770×1820×1915mm
軸距:2675mm
當年新車價:$409,900(2001年)
現時二手價:約25萬起

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載