› 選擇地區
三藩市
紐約
洛杉磯
其他美國地區
香港 台灣 北美
 
2002年12月31日

萬人夜光巡遊倒數迎元旦

還以為在香港過除夕氣氛先至最好,但原來深圳人過除夕一樣好激。一班居於深圳的朋友,推介我今年到歡樂谷過一個熱鬧到暈的大除夕,皆因歡樂谷喺今晚有個全國首創的夜光大巡遊,可以同過萬人一齊睇音樂Show和倒數,而且重有煙花睇,計我話點都好過去蘭桂坊同人迫!

記者:黃希知 攝影:陳盛臣、楊錦文

夜晚去到歡樂谷,場內氣氛同白天完全不同,整個廣場都擠滿了人,大人細路個個霸定靚位等睇全國首創的夜光大巡遊和樂隊表演,節目還未開始,每個人包括我在內,都被四周的氣氛感染到極度興奮。巡遊一開始,不同造型的夜光花車和卡通人物出場,各人情緒更加高漲,氣氛澎湃!

蝸牛出巡
大巡遊除了有不同的童話故事主角,好似士兵木偶、白雪公主和七個小矮人之外,令我最欣賞的還有不同造型的夜光花車,好似呢架外形十足蝸牛的花車,由以墨西哥裝扮的工作人員慢慢推出場,離遠就好似一隻會發光的蝸牛出巡一樣。

勁歌熱舞森巴女郎
一個個穿着鮮豔夜光舞衣的女舞蹈員,陸陸續續跳住森巴舞出場,勁歌加熱舞,在場不少人都不自覺地隨住強勁的音樂跳起舞來,五顏六色的夜光在漆黑中隨着舞蹈員的身體不停擺動,連我都想跳埋一份。

倒數賞煙花
要數全晚的高潮,當然是十二點來臨前的一分鐘,萬人齊集大倒數,大會重會在踏正十二點的一刻廣播新年鐘聲和大放煙花,成個露天廣場夠大又夠空曠,四周無樓遮擋,所以就算企滿人都可以睇得一清二楚。

音樂節大派對
音樂節亦是其中一個重頭節目,由不同的本地樂隊好似武漢金手指、99度樂隊等多隊組合,由夜晚7時半開始輪流演唱,雖然我對呢幾隊Band無乜認識,但現場強勁音樂加上營造出來的視覺效果,令台下Fans愈聽愈瘋狂。

歡樂谷
電話:(86)75526949168
地址:深圳市華僑城
即日起至1月3日票價:成人?120、1.1至1.4米高小童?60(1.1米以下小童免費);六時後入場門票只需?30。
開放時間:9:00am-12:00am
交通:可乘26、204、209、210、101、113、301、310大巴及423、433、429、453小巴。由羅湖火車站乘的士約?60。

其他節目
除夕夜探鬼屋
這間在上星期才開幕的嚇驚樂園,是深圳第一個日式主題館,設在中信城市廣場地庫,鬼屋外寫住嚇驚樂園四個大字,外表看來不恐怖,就在我靜候入場時,不時聽到鬼屋內的人尖叫,搞到我都開始有少少驚。探完鬼屋之後重可以去樓下個露天廣場參加倒數大派對,一直玩至凌晨,節目夠晒豐富。

真人扮鬼嚇餐死
鬼屋內的嘩鬼並非隻隻都由工作人員扮成,室內黑漆漆,有時真係分唔清邊隻係真鬼邊隻係假鬼,見佢唔郁重以為係假鬼,點知突然追住我,真係俾佢嚇死!

古井爬出骷髏貞子
沿途黑漆漆,根本好難見到前面會見到啲乜,經過井口突然有個好似貞子嘅骷髏頭彈出嚟,嚇到我捉住攝影師係咁狂奔。

血腥支解斬埋你
鐵籠內兩隻鬼好凶殘咁將個假人支解,開始時重以為得個睇字無乜好驚,但當我睇完擰轉身行開之際,隻鬼居然可以破籠而出,攞住斧頭追埋出嚟,都算幾有創意。

嚇驚樂園
地址:深圳市深南中路中信城市廣場B1層全層(LOOKS潮流視窗)
電話:(86)75525941033
收費:入場券每張?20,此入場券在玩完鬼屋後可在場內任何一間商戶作?20現金券使用。
開放時間:(平日)中午12時至晚上10時半
     (除夕及假日)上午10時至凌晨12時

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載