› 選擇地區
三藩市
紐約
洛杉磯
其他美國地區
香港 台灣 北美
 
2004年04月17日

短線遊:
流浮山瞓蒙古包食海鮮觀白鷺

■場內有大中細蒙古包10間,最大的可以住40人擺8圍枱,最細都可睡10人,租來開Party最啱!

去露營裝備一袋二袋未免太浩蕩,宿營又不外乎長洲梅窩大嶼山。去蒙古放羊觀鳥食海鮮主意不錯,冇錢冇假期的話,周末搭車到流浮山一樣做到。

記者:陳慧敏
攝影:陳智良
模特兒:波仔、Isabella(StarAsia)

瞓蒙古包食大大隻扇貝
「本來冬天喺蒙古包裏面食肥羊火鍋暖笠笠,家陣天氣開始熱,咪索性俾啲嚟燒嘢食嘅人玩通頂囉!有啲鍾意睇山貝河日出同觀鳥,不過要自己帶睡袋,衞生啲嘛。」流浮山「觀鳥軒」的鄧莊主夾起橙色搖搖般大的扇貝,桌上豬扒墨魚丸香腸當然少不得,另外還放滿由農莊主人晨早由街市運來,3隻手指般粗的大蝦、花蟹、秋刀魚,還有番薯、矮瓜、黃牙白。10人份量款式陣容龐大,Isabella顧得食魚又怕啲扇貝就咁燒焦,忙碌非常。波仔拉Isabella入蒙古包:「放心入嚟唱K啦!有專責師傅幫我哋睇住,食得就夾上嚟㗎啦!」

歎刨冰 等火龍果結果
波仔拉住Isabella走向菜田,對於入街市只能認字知菜的兩位年輕人而言,眼前只是一大堆綠色植物。細數之下,原來有超過15種生果植物落地生根,例如來自本地及意大利的番茄、無核香水檸檬、番石榴、特別品種「蘋果芒果」、南瓜、絲瓜等等。走到菜園中間,波仔驚訝問:「嘩!做乜種咁多仙人掌?」「呢啲係火龍果樹嚟㗎!」Isabella一眼認出那手掌般大的火龍果花:「重要係台灣紅肉火龍果,呢度數埋成幾百棵,5月結果咪有排食?」不用等到5月,現在已經可以優先試食紅肉火龍果刨冰,紅彤彤的每杯$10,幾香幾清甜!

鳥瞰山貝河 望鷺鳥歸巢
時間尚早,郊區的漫天銀河還未出現,波仔跟Isabella繞到農莊後面,走上200級石梯達唐下寮山頂公園,270度鳥瞰山貝河及尖鼻嘴。山貝河這邊,后海灣拉姆薩濕地保護區紅樹林密布,雖然季候鳥走得八八九九,不過白鷺就排成大箭嘴由尖鼻嘴方向飛來,還有牛背鷺、大白鷺、池鷺和夜鷺等,在綠林上留下一個個小白點。「嘩!好靚!」擒着附設的觀光望遠鏡不放手的Isabella繼續追蹤「箭嘴」影蹤;另一邊尖鼻嘴方向卻是灰茫茫的泥灘,對面是深圳福田矮樓景致,映着落日紅光的白鷺或呆站或捉魚,平靜的美景,終於讓人明白愛鳥者攞住望遠鏡四圍掃的樂趣。

觀鳥軒有機農莊(24726962)
地址:元朗流浮山深灣路尖鼻嘴迴旋處
收費:蒙古包海鮮燒烤(10人起)$1,500;2人份$300,睡袋自備,卡拉OK、電視、麻雀耍樂等免費供應。請先預約,先到先得。純參觀者最低消費$5。
交通:元朗泰豐街(交通銀行對面)乘35號專線小巴($7),約45分鐘直達門口。場內附免費泊車位。
網址:www.yl.com.hk/birds

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載