蘋果日報 | APPLE DAILY
› 選擇地區
三藩市
紐約
洛杉磯
其他美國地區
2007年06月21日
馬上成為壹會員

好想飛 Fiona東京遊2:原宿攻略
3粒鐘意式Buffet 啱晒花心嘅我

■面對賣相精美的前菜,Fiona早已蠢蠢欲動想放肆地大擦一餐。

總以為做歌手女演員,一定食得少,誰知纖瘦的Fiona卻坦言:「每次到日本,就會放肆地食食食,因日本食物較清淡,好似食好多都唔會肥,好過喺香港食炸薯條啦……」難怪,除了購物,都不忘到六星級東京文華東方「擦餐勁」!

食自助餐
一家人最開心

「我好鍾意食自助餐,因為平時喺屋企食飯同爹哋媽咪都無乜嘢講,可能大家嘅視線唔係集中喺電視機,就係有其他引誘。但食自助餐就唔同,無其他嘢騷擾,大家一齊開心咁揀嘢食,慢慢由頭盤到主菜,再擦甜品,3粒鐘迫埋一齊,反而多嘢講又開心。而且去普通餐廳,試勻所有菜式又唔可能;相反,自助餐五花八門,樣樣試少少,啱晒為食又花心嘅我……」

一講到食就露出一臉興奮的Fiona,面對眼前五顏六色的美食,一早已急不及待左挑右選。原來,她到日本食buffet倒是第一次,到東京文華東方酒店,除了親切感,還因位於酒店二樓的意大利餐廳Ventaglio是現在日本No.l熱話的自助餐去處。

10米樓底竹樹婆娑

早餐至下午茶以至晚餐,Ventaglio都只供應自助餐,而且主打意大利菜,加上環境無敵,清雅幽靜的裝潢,竹樹的點綴伴以10米的樓底,那份空間感,是坐下來就不想走,雖然食物款式不多,卻質素一流,不同的甜品中,Fiona就最愛朱古力慕絲。M.O.喎,當然不會令人失望!

東京文華東方

地址:103-8328東京都中央區日本橋室町2-1-1
查詢︰(81)3-32708188
交通︰乘東京metro銀座線至三越前站直達
自助晚餐:每位317元

老牌玩具店
變形金剛好過吉蒂

「其實,我唔鍾意啲得意嘢㗎,HelloKitty、Barbie都無乜點玩過,我鍾意啲男仔頭嘅嘢,好似星戰呀高達呀先啱我……」所以,來到最愛的原宿,蒲已有45年歷史的Kiddyland,大部份女孩子喜歡的毛公仔除了拿來拍照,似乎勾不起Fiona半點購物慾……相反,那些特別版高達機動戰士更令她手舞足蹈。

越古怪越吸引

全國皆有分店的Kiddyland,是每次遊表參道必到的掃貨點,只因樓高五層的原宿Kiddyland幾乎可以找到所有卡通玩具甚至古怪雜貨。旁邊的HelloKitty店集齊和服Kitty,是不少Kitty迷的朝聖地,Fiona時而看中cute到爆的兒童水靴給唱片公司的同事,時而又買來電話貼,就連爆笑巨蕉都差少少想搬回香港。「越古怪越吸引我,哈哈哈……」

Kiddyland

地址︰東京都涉谷區神宮前6-1-9
電話︰(81)3-34093431
交通︰JR山手線至原宿站,沿表參道步行約7分鐘

家室變紀念館
怪雕一大堆

「原宿、南青山都係我每次嚟日本必到嘅地方,因為我鍾意喺日本買做show嘅衫,當然,好多牌子香港都有,但始終日本多款好多,又比香港快,其中必掃嘅當然非川久保玲莫屬啦!不過,掃衫唔係重點,重點係呢區掃貨同時,仲有好多間gallery,就連舖入面都會忽然有個展覽,有時行吓呢啲gallery仲滿足過掃貨呀!」穿上一身VivienWestwood的Fiona畢竟是讀設計出身。
由表參道以至南青山,小小的gallery真的是行幾步就碰上一兩間,當中岡本太郎紀念館是必參觀之一!
生於1911年的岡本太郎是日本現代藝術史中的重要人物,以大膽誇張、色彩豐富見稱,在日本人心中有着崇高地位。作品由油畫至雕塑,以至為電影做道具等,其中1970年為大阪萬國博覽會設計的太陽之塔更是代表作之一。隱藏在南青山縱橫交錯的小街上,便有岡本太郎先生的紀念館,地方不大,本是太郎在生時的家,裏面可欣賞到他的畫室、原稿,其佈置及陳設不少是由1953年一直保留至今,若Fiona碰上那些超鮮艷又超古怪的作品,必讚︰好鬼正!

岡本太郎紀念館

地址︰東京都港區南青山6-1-19
電話︰(81)3-34060801
交通︰營團地下鐵銀座線表參道站徒步約8分鐘

旅遊大使

想知道Fiona更多遊日貼士或甜蜜趣事,記得7、8月click入佢嘅blog,因為暑假開始,Fiona獲榮邀為香港日本親善大使,佢會加多個有關日本吃喝玩樂的博客,定期update日本「旅事」,必click呀!
http://hk.myblog.yahoo.com/fi-fi/

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載