› 選擇地區
三藩市
紐約
洛杉磯
其他美國地區
香港 台灣 北美
 
2010年09月10日

土耳其包不住 夜火熱

■朵瑪巴切清真寺(DolmabahceCamii)

講起土耳其,你會聯想到甚麼?伊斯蘭教……女士由頭包到落腳……旅行齋睇風景無得玩?愚昧的小記出發前都係咁諗,擔心今次旅程實悶死,但原來土耳其文化一啲都唔保守,當地日夜生活比想像中精采。捧場!

記者:蕭漢祥
攝影:譚盈傑
鳴謝:土耳其航空、TempestTour、GRSCorporationLtd

日落博斯普魯斯海峽

導遊話伊斯坦堡遍佈清真寺,梗有一間喺左近,不過清真寺內裏設計大同小異,想一次過快速參觀,可以考慮到艾米諾努(Eminonu)的加拉達橋(GalataKoprusu)旁的遊船碼頭(BosphorusCruisesPier),坐觀光船遊覽各景點。博斯普魯斯海峽比維港更水深廣闊,很多大型郵輪在海上穿梭,這時候,如果有靚女相伴,陪我遊山玩水你話幾好呢!就在呢一刻,眼前出現兩位美少女,小記膽粗粗上前打招呼,傾兩句之後得悉美少女來自阿姆斯特丹,「一直都好喜歡伊斯坦堡的建築和生活,今次旅程純粹享受人生。」好!呢程船上之旅,就由小記陪兩位享受……一個鐘咁多啦!
觀光船分全程、半程及日落之旅,帶你沿博斯普魯斯海峽向北而上,全程則更會接近黑海。途中,會經過朵瑪巴切清真寺、朵瑪巴切皇宮,穿過博斯普魯斯大橋橋底,再欣賞到魯梅里碉堡等多個著名景點。奉勸各位要趁早登船,因為觀賞風景最佳位置的船邊座位,真係話咁快就滿。不過坐船內都無話唔好,有冷氣,船艙設計用上綠白色格仔地板、酒紅色梳化椅,散發着古典風味。

博斯普魯斯遊船碼頭:艾米諾努的加拉達橋旁邊

每位費用:全程$128/半程$77/日落之旅$103

美女夜陪下棋吸水煙

伊斯蘭世界係咪真係有夜生活?據導遊所講,土耳其人99%信奉伊斯蘭教,但他強調此伊斯蘭不同彼伊斯蘭。咦,即係點?他說雖然土耳其伊斯蘭女信徒,同樣都要包住個頭,但並非由頭包到落腳。80後的少女們更加走在潮流尖端,毫不吝嗇漂亮的外表和美好的身材。入夜後,小記膽粗粗走到有如尖沙嘴的塔克辛廣場(TaksimSquare),以電車路(伊斯提克拉爾路)為中心,兩旁都是食肆、酒吧、商店。走入最旺的小巷,各店職員就像漩渦般吸你入去,每間店不盡相同,但食的主要是pasta、土耳其小食,飲的是土耳其茶、咖啡及酒類,還有著名的土耳其水煙!很多年輕男女一邊吸水煙一邊下棋,就這樣歡度一夜,比想像中蒲得斯文。

Kafeka酒吧
地址:IstiklalCadKucukParmakkapiSk,No4Beyoglu,Istanbul

少年街頭舞火

要狂野嗎?同樣都喺塔克辛廣場一帶,有很多樓上disco,一到晚上就會開盡音樂,性感美女走出露台跳舞,只要走在街上無可能見唔到。Disco不會收取入場費,平日每杯啤酒盛惠二十多元,周末就貴一倍。雖然好想近距離觀摩露台美女全新演繹的土耳其舞步,但礙於團友們已飲飽食醉想休息,無理由小記單拖踩場,以一敵十……個美女咪弊!惟有鳴金收兵。不過,深夜時分街頭都有好多賣藝表演,當中最搏就係兩位少年街頭玩火,吸引五十多人圍觀,但玩咗唔夠10分鐘就被警察冚檔,咩火都無晒!

NightlifeinTurkey

溫馨提示:塔克辛廣場有如尖沙嘴,店舖大都做遊客生意。深夜時分,雖然街上不時有警員巡邏,遊人還是應該小心財物,更不應單獨行事!

TravelMemo

持特區護照免簽證,BNO須簽證。土耳其領事館:25721331

土耳其航空由香港往伊斯坦堡來回機票$6,290起。土耳其航空: http://www.thy.com.hk


1土耳其新里拉兌5.12港元(文中已折算港元)

240V,兩圓腳插座

土耳其

伊斯坦堡

下周天晴,20-27℃

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載