› 選擇地區
三藩市
紐約
洛杉磯
其他美國地區
香港 台灣 北美
 
2010年11月05日

馬交最佳 橫巷煲仔飯

估唔到,一條鮎魚擦邊游過,11月頭未曾入秋經已一雨成冬。還未及掏出櫳底棉被溫暖溫暖,馬上想到一個個瓦煲熱辣辣,揭開蓋蒸氣騰騰,散發油香飯香與絲絲焦香。事不宜遲,立即動身過大海,即日掃食澳門三大人氣煲仔飯!

記者、攝影:曾冠輝
模特兒:ChristyLee@AModelAgency

南記 雙爐脆香飯焦

即使是鄰市,要即日來回抑或短遊兩天,出發前還是要做一番資料搜集。在一個地道澳門人的留言板中,找到南記,人人異口同聲捧之為馬交最佳煲仔飯,上岸後第一站當然是它。不過,單靠手上地址:草堆街草堆橫巷……」即使路在口邊,還是兜了很大一個圈才找到,南記就是這種躲在橫街橫巷裏的一個小檔。「咦?乜你哋咁早嚟,南記6點先開喎!」好不容易找到卻又摸門釘……
終於天黑,再回到草堆橫巷,巷子變得異常幽暗。巷邊一個如車仔檔的檔口正燒得㷫烚烚,老闆一人獨對8個爐,一邊撥扇吹炭爐,一邊將瓦煲在石油氣爐上翻兩翻,飯熟加蓋焗一焗,埋尾轉到炭爐上慢煮。點解咁做:「用石油氣先煮熟飯後再用炭爐烤一烤,咁樣啲飯會香脆而又唔硬,仲唔使等好耐就有得食,一舉兩得。」要即叫即做,又要快上枱,仲要好食,全部做到真係missionimpossible。要了滑雞與排骨兩煲,分別都是最多人食的台柱款式,20分鐘熱辣辣上枱。一開蓋飯香四溢,加點豉油,若嗜豬油就記得開聲問老闆,再加蓋焗多焗立即將味道提升。飯粒煮得粒粒爆開唔黏身,而且滲透了飯焦香,齋白飯都可吞下整煲。坦白說,從前我是怕吃飯焦的,因大多是硬身唔脆又黏牙的貨色,南記的真如老闆所說:「香脆而又唔硬。」結果通通被我幹掉。

南記:草堆街草堆橫巷6號地下
營業時間:6pm-12mn

補之林 富貴海味煲

話說回頭,一心諗住上岸直奔南記午飯,誰知摸門釘,轉頭立即到另一家同樣在網上起朵的補之林煲仔飯,幸好有做午市。補之林在澳門可謂煲仔飯老店,開業已二十幾年,仲開有兩家分店,連郵政局都選之為代表澳門的地道美食,以之為主題發行郵票,威水!這裏煲仔飯款式相當多,除一般排骨滑雞臘味窩蛋牛,連冬季限定的羊肉、兔肉都有。不過論最有代表性一定是海味招牌飯,單睇排場已夠吸引,餸菜有魚肚、鮑片、瑤柱、滑雞、冬菇等等八九種,相當富貴,一開蓋多到滿瀉,真正餸多過飯。飯身同樣焦香,加上海味鮮味滲入飯中,是少見帶鮮的煲仔飯。網上是有留言投訴指等得太耐,要成30分鐘先有得食,這我倒是早已預料,即製嘛!不過倒沒想過煲仔飯都可以連缽仔加外賣紙盒拎走,打個電話預先柯打再拎返酒店消夜都認真唔錯!

補之林:雅廉訪大馬路41號 
營業時間:12nn-3pm、6pm-12mn

順記 唔等得咪食煲仔

「煲仔要等35分鐘o架吓,等唔等得先!」在福隆新街的順記或許你在買手信時早曾路過,我也一樣,早已領教過店東婆婆的「惡」言相向,其實沒甚麼的,直率一點而已。不計服務,單憑煲仔味道足以令我回頭。不過再大的飯桶,半天幹了兩煲還是會飽飽滯滯,還好順記有各種無飯的煲。啫啫雞煲是馳名的,雞肉滑且入味,以煲仔煮法更是惹味,配飯一流(可惜實在吃不下)。論個人至愛其實是薑葱豬膶煲,豬膶沒有因過熟而變得硬而嚡口,內裏軟腍仍能保持點點juicy,加上薑葱焗極之惹味。Model不好此味,我乾脆一人整煲清掉!

順記:新馬路福隆新街54號地下
營業時間:6pm-12mn

藥煲咖啡香夾滑

用瓦煲煲的唔止飯嘅,連咖啡奶茶都得,在營地街市熟食中心就有一家茶檔連阿蘇都要拜訪。勝記咖啡十幾年來主打瓦煲咖啡,店面兩個藥煲咁款嘅瓦煲內裏是茶和啡,我忍唔住問:「用瓦煲係咪真係好飲啲o架?」「瓦煲煮出來的咖啡更香更滑,唔信自己試試。」咖啡香味不如一般茶餐廳的「濃」,但不帶苦澀,質地果真幼滑。

勝記:新馬路營地街市綜合大樓3樓
營業時間:7am-6pm

WEEKEND好旅程

澳門

明日間中多雲,20-25℃

TravelMemo

持香港居民身份證毋須簽證。澳門駐港旅遊局:28388680

噴射飛航單程船票$134起。噴射飛航電話:28593333

1港元約兌1.02澳門幣(文中價錢已折算港元)

220V,三扁腳插座

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載