蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年09月21日
馬上成為壹會員

大陸通行正:南澳食海鮮 海膽月餅做手信

《全國獨家》
海膽月餅¥268/盒
工序繁複,要先將海膽烤至乾身,再撈五仁、蓮蓉,中秋送禮夠晒特別。

喺香港食海鮮,唔係自家養殖就係外國來貨,深圳「南天閣餐廳」就唔同,九成海鮮都喺未受污染嘅南澳水域活捉,野生貨一定鮮上加鮮。老闆好點子,仲推出埋獨一無二海膽月餅,中秋快到,有無興趣買番盒試試?文、攝:中行線

南澳,一個未受污染嘅水域,水質清澈出產海鮮好豐富,「南天閣餐廳」打正旗號以海鮮做主打,每日都向漁民攞貨,唔靚唔要。即係話,你筷子夾緊嗰塊石斑,你拆緊肉嗰隻大頭螺,分分鐘幾粒鐘前仲喺大海自由自在游緊水。魚排養殖貨頂盡叫海魚,野生活捉至真正稱得上係海上鮮吖嘛,係咪?餐廳無金碧輝煌閃到你暈嘅豪裝,勝在乾淨企理,又有多間超大VIP房,大路海鮮酒家格局。門口有魚缸養住每日由南澳活捉返嚟嘅海鮮,鍾意食乜、點煮,開句聲就得嘞。餐廳以海膽菜式最耍家,必試海膽炒米粉,經理話:「呢道係南澳家鄉菜,個個家庭主婦都識整咁滯。」香噴噴,大大碟有足半斤海膽份量,炒得唔油膩,入口勁滑海膽味勁濃,正想添食,經理又話:「留肚試其他嘢喎,嗱,即食海膽更鮮味呀!」

花膠湯啖啖精華

剛剛將海膽殼掟埋一邊,又嚟多碟蒜茸蒸大頭螺,比起東風螺,大頭螺明顯更厚肉,肉質爽甜,蒜茸完全吊起鮮味,半打唔夠喉。再來有花蛤炒韭菜,花蛤拆肉,但隻隻炒完縮埋水都起碼有兩吋長,絕非蜆仔充花蛤之流。入口唔韌,配韭菜落鑊快炒,無得彈。鍾意啖啖肉嘅,翡翠斑球就絕對係你杯茶,學經理話齋:「唔使啲乜嘢超群廚藝,只要魚夠新鮮,火喉控制得好,就保證鮮甜夾唔腥。」其他菜式一樣食到舔舔脷,花膠翅骨湯係開業十多年來嘅招牌菜,經理強調話:「用嚟招呼幹部㗎。」花膠味濃又唔算太黏口,每日用翅骨同老雞煲五粒鐘熬好湯底,有Order即加發好嘅花膠再蒸燉,啖啖都係精華。鮑魚燜雞都好正,雞塊無雪味,可揀選九孔鮑或大連鮑,肉嫩無渣,芡汁好鹹鮮,送飯之選。小食推介有日式豬手,凍食,用日式燒汁煮,最後加日本清酒辟走豬嘅腥味,送酒一流。壓軸有全國獨家海膽月餅,聽落有啲匪夷所思,但我試過,無講大話,真係不俗,仲買咗兩盒做手信。

南天閣餐廳地址:深圳市龍崗區南澳濱海路9號南天閣海域酒店電話:(86)755-8440 0555

海味街尋寶

飯後,仲可以逛逛一街之隔嘅南澳街,呢條街專售海味,魔鬼魚乾、各式鹹魚,應有盡有,仲唔係最佳手信?

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載