蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年10月02日
馬上成為壹會員

大陸通行正:直闖深圳富豪飯堂 嘆拳頭大鮑

日式冰鎮鮮鮑¥850,拳頭大鮑,一啖咬唔晒。

深圳作為中國的經濟特區之一,環境設施早就拍得上香港,就連食肆都有番咁上下數量同質素,Sorry,講錯咗,係一定數量超過香港,質素高過香港幾班都仲得,唔信就帶你闖闖深圳其中一間富豪飯堂。 文、攝:中行線

究竟有幾富貴?呢間飯堂就叫「金悅軒」,位於地鐵車公廟站之上,唔好誤會呢度好似香港咁係拜神之地,其實佢係商業區就真。而金悅軒亦唔係一間普通酒家,你有幾何見過一間酒樓連地下接待處都有四層咁高,一樓主力係大廳,設計金碧輝煌,亦不失舒服,座位有圓枱、卡位,最特別係有一間存酒室,入面有過千支紅、白佳釀,想飲番杯可以出聲自己揀到啱為止。至於二、三樓,全部做晒廳房,即VIP房,以中國各大城市為名,而最大兩間就係北京同香港,真畀足面。

講完環境,當然要睇吓佢食啲乜?入得嚟富豪飯堂,幾大都食鮑魚啦,用老雞、金華火腿熬幾日嘅溏心鮑有得食之外,最吸引我就係佢哋嘅日式冰鎮鮮鮑,每隻size都有拳頭咁大,睇靚女拎住想一口咬落去就知夠吸引。至於製法,原來大鮑出自澳洲,隻隻最少都有兩斤重,先用酒家自己煮嘅鮑汁熬足五個鐘,令味道好似啲溏心鮑魚咁,入晒味後再入雪櫃,客人落order再原隻上堂切件,最緊要係價錢唔係貴,¥850有商量。
另外,成日見廣告都有賣,「阿乜鮑魚、堂灼響螺片……」,響螺係咪貴嘢就要睇佢有幾大,原因係大隻到可以切片做堂灼真係可遇不可求,不過內地有錢人多,響螺有幾多要幾多,聽大廚之一李莉芳講,一般三、四斤就日日都有供應,但要五、六斤以上就真係要提早講定,難搵之餘仲大把人爭。」聽李大廚邊講邊示範,但試食之前問吓價錢先,原來都係¥700左右一片,唔係貴呀,香港價一片分分鐘都$1,500左右,平成半㖭啦!

雪蛤花膠夠晒補

食完鮑螺,都係搵啲補品填吓肚先,賽螃蟹就食得多,用雪蛤做嘅賽螃蟹又真係未食過,而且每粒雪蛤晶瑩剔透,女士一流補品。補湯方面,花膠老雞螺頭燉湯,花膠認真多,骨膠原重,老雞、螺頭夠滋補,湯味濃,聽醫生話飲湯食埋湯渣,一定會致肥,不過,唔食又真係對唔住自己。
聽行政總廚周國堅講,「嚟呢度食飯都有不少香港中產,下午見佢嚟飲茶食飯,之後玩到夜晚再食過!」咁又係,呢度食得豪,不過都平一半,下午茶市更撞口撞面都係香港人啦!

金悅軒海鮮酒家

地址:深圳深南大道6013號中國有色大廈 
電話:(86)755-8886 8880
交通:乘深圳地鐵車公廟站C出口,或福田口岸乘的士8分鐘左右。

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載