› 選擇地區
三藩市
紐約
洛杉磯
其他美國地區
香港 台灣 北美
 
2016年08月05日

【科健籽】爛gag評述孖寶 奧運合體

【科健籽:運動人生】
不經不覺,四年一度的奧運舞台即將揭幕,回想八年前北京奧運,香港有兩名評述員一炮而紅,他們沒有金猴,但勝在爛gag多多無厘頭,他們是陳恩能(丹尼爾)和石金華。八年後的今日,這對「爛gag評述孖寶」在奧運這個成名舞台故劍重逢,雖說今次二人天各一方,一人變身主持親赴巴西直擊,另一人闊別一屆奧運後再在大台開咪,彼此都視為「最後一次」評述奧運,要同時聽兩人的爛gag,就唔好錯過今屆奧運喇!

話說2008年北京奧運,不少觀眾沒看大台直播,反而改看明珠台麗音粵語旁述,皆因有陳恩能、石金華(石仔)、黃興桂(桂神)和翁金驊的生鬼抵死評述,尤其陳恩能和石仔,評述賽事期間經常爆出爛gag和搞笑金句,又疑似因為由朝到晚評述,試過出現吃杯麵和薯片發出聲音過大的笑料,一炮而紅,深受年輕人追捧,除了被網民記錄二人接近200金句兼放上網公諸同好外,還開了粉絲專頁、與粉絲聚會交流,冠為「明珠評述孖寶」、「明珠爛gag孖寶」,甚至「明珠9 Up孖寶」等稱號。訪問當日被問到在眾多花名中,最喜歡哪一個?兩人諗都無諗就異口同聲說:「我哋最鍾意當然係『9 Up孖寶』啦。」

陳恩能:現場直擊 當「最後一次」

37歲的陳恩能,由2000年悉尼奧運在電台錄音室報道獎牌榜,16年後的今日,終於搖身一變成為主持,衝出香港遠赴森巴國土直擊奧運。雖然評述經驗豐富,不過今次原來是丹尼爾現場採訪大型運動會的處子戰,亦是他的「最後一次」,「收山告別體壇就唔會,我想講嘅係心態,今次係我首次出外主持和採訪奧運,希望抱着可能係最後一次嘅心態去參與,咁樣無論喺準備工夫、警覺性和執生能力,都迫到自己嘗試更上一層樓。」
百足咁多爪的陳恩能,評述過不少運動項目,又是運動員經理人和大賽活動的司儀,在京奧憑「爛gag孖寶」一炮而紅後,下定決心視體育評述和節目主持為正業,上屆倫敦奧運他在大台錄影廠,見證李慧詩摘銅而留下男兒淚,今年4月,更自編自導自剪了一輯名為《人人奧運》的短片,邀請香港運動員談奧運夢,然後放上網分享。今次出征巴西,除了留守單車館一睹「牛下女車神」的英姿,他亦希望在當地發掘一些運動員奮鬥的陽光故事,讓港人藉着故事吸收正能量,「對我來講係用自己方式,去為香港體壇作貢獻,其實我做很多事都是額外付出,但呢個係你嘅專業,如果你對件事認真,每一個細節都會好認真。李慧詩話過奧運和單車係佢人生信仰,體育對我來講好比一場戀愛,因為我好鍾意體育。」

石仔:闊別一屆 坐鎮大台開咪

「丹尼爾,你可以做英文旁述返嚟,然後我喺明珠台幫你譯做中文聲吖。」和丹尼爾相反,年齡相差20歲的好拍檔石金華,連同今屆,已經是參與奧運評述的五朝元老,30歲半路出家入行體育傳媒界的石仔,在1996年的美國亞特蘭大奧運,現場直擊「風之后」李麗珊為香港勇奪歷史性第一金,他記得當日受天氣因素影響,其快艇趕不及回採訪區,所以比行家搶先訪問到李麗珊的奪金感受,石仔回想此事仍耿耿於懷,多次說:「我輸了,香港歷史性奪得奧運金牌是開心的事,遺憾的是我爭輸了(訪問)。」
近年在本地球圈打滾擔任行政工作的石仔,2012年適逢想轉跑道,走去嘗試創作音樂,因而未有參與倫敦奧運評述。鑑於今年已57歲,石仔有感四年後年屆六旬,未必再有人找他評述奧運,故闊別一屆後毅然復出,以真正視為最後一屆的心態,繼續在大台英文台擔任廣東話評述,今次不用像當年京奧朝九晚十直踩13小時,只需評述早上時段,又與好拍檔分隔兩地,會否失落?「有少少啦,但我會祝福佢,因為佢𠵱家更上一層樓,能夠喺巴西親身直擊,經歷係難能可貴,至於手信,佢會識做㗎啦。」
八年過後,「陳恩能+石金華」的facebook粉絲專頁再沒更新,又因為工作關係,二人見面機會不多,但每次相遇,總是故人重逢聊個不亦樂乎,訪問過程中,不時互窒鬥嘴,然後大笑起來,拍拍膊頭圓場,二人就是份外投契,石仔話,他們之間就是沒有一項東西,那就是芥蒂;不過丹尼爾就忽然感性,覺得「爛gag孖寶」可一不可再,往事只能回味,「和石仔拍檔,我會點樣講呢,係精采同過癮,我覺得當年我哋嘅拍檔係完美,經常擦出火花,個化學作用係好正,但可一不可再,過去咗就係過去咗,如果冇機會再同場評述嘅話,我會視為一個浪漫嘅終結。」石仔亦附和:「好多嘢時移世易,𠵱家就算做番當年嘅事,都未必去到當年嘅效果,當然我哋都好開心,耐唔耐有人會走來講八年前有幾鍾意聽我哋評述,點樣食食吓飯都會笑。」

重溫2008年京奧 評述孖寶「無語錄」
評述篇

跳水:
石:我哋中國有千千萬萬個火亮嘛!
陳:千千萬萬個火亮?無田亮同火亮咁下個係乜呢?唔通係木亮或者水亮?火亮佢三跳總分有270分,即係平均分幾多呀?90分呀!你考試可唔可以次次考到90分?

舉重:
石:中國隊舉100幾kg好似熱身咁。
陳:係㗎,拎冠軍都係熱身。

網球:
陳:大威用咗九分鐘已經3:0,只係三個杯麵嘅時間。
石:哎呀,拿度呢球矮仔放得太高喇。
陳:係呀,係一球好高嘅矮仔。

曲棍球:
陳:想知打曲棍球有幾辛苦,就試吓幫阿媽吸塵喇,仲要跑住嚟吸,就知有幾辛苦。

拳擊:
陳:好彩呢位拳手贏咗,如果唔係返更衣室將會同保安再來另一場拳賽。

馬術:
陳:頭先馬術咁精采……
石:馬術精采你又知?你唔係探緊人㗎咩?
陳:我邊度探緊人呀?
石:周公吖嘛……

閒聊篇

石:人一生得三萬幾日,瞓覺就瞓咗一萬幾日……咁樣仲嘥時間喺食嘢度!不如唔好食啦……
陳:但係你唔食嘢我驚你過唔到嗰兩萬幾日。
石:過去十年,冇睇過電影!
陳:冇?咁你有冇睇開幕式呀?
石:有!開幕式有……
陳:嗰套咪係囉,現場拍電影。

資料來源:綜合網上資料節錄

孖寶再現 網民反應

Elsa Ho:最期待的組合返來了!

Jamie Lam:當年係因為呢個組合先識丹尼爾,苦等八年終於有爛gag奧運聽。

Henry Lee:當年北京奧運嘅一大亮點。

Jay Lam:本來對今次奧運冇乜興趣,但係你哋兩個講就唔同啦,當年好後悔冇睇晒你哋講嘅賽事,事後就咁睇番文字覆述你哋嘅說話都覺得好好笑。

Chung Marco:Wow, X up孖寶

資料來源:facebook「丹尼爾 vs 陳恩能」專頁

里約奧運小資料

時間:8月5日至8月21日(巴西時間)
主辦城市:巴西里約熱內盧
參賽國家和地區:206個(首次參賽:科素沃、南蘇丹)
參賽運動員:約10,500人
比賽項目:28項產生306塊獎牌(增設高爾夫球及七人欖球項目)
口號:A new world(英語),Um mundo novo(葡語)
吉祥物:Vinicius
比賽場地:6個城市共38個場館
開幕典禮:8月6日早上7時(香港時間)
開幕禮場館:馬拉卡納球場

陳恩能服裝提供:Aigle
部份圖片由受訪者提供

記者:余瑋
攝影:徐振國
編輯:謝慧珊
美術:吳子豪

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載