蘋果日報 | APPLE DAILY
› 選擇地區
三藩市
紐約
洛杉磯
其他美國地區

4億遺產零增值 爭產情仇 煙消雲散 祥嫂:當初何必搞成咁!

最後更新: 0804 18:48 / 建立時間 (HKT): 0721 00:00

曾經搞到滿城風雨的「鄧家爭產案」,作為母親的祥嫂(洪金梅)與四名她口中的「紅 衞兵」仔女爭產風波,持續十年之久。但親情終歸勝過金錢, 06年一家破冰重圓,爭產情仇煙消雲散。無晒隔夜仇的祥嫂與小艾,合力為離世 14年的父親,一代慈善伶王新馬師曾(鄧永祥),推出一系列經典金曲發燒碟,並計劃重開酒樓「楚留香」,為鄧家的完美結局作紀念。
日前兩母女在元朗重塑的「永祥苑」緬懷祥哥生前點滴時,亦齊齊開腔分享破冰感人經過。由接到女兒破冰電話一刻,祥嫂說心裡只有痛沒有恨,更嘆謂:「當初何必搞成咁!」而小艾一句:「無埋媽咪我會好遺憾!」觸動兩母女抱頭痛哭。

○四年破冰失敗

在元朗大屋「隱居」了四年的祥嫂,在女兒小艾陪伴下,終於打開家門,在家中向記者展示每一件懷念祥哥的物品。祥嫂家中擺設及金碧輝煌的家具,都跟昔日一家六口住在永祥大廈的家如出一轍。懷念祥哥同時,反映出六十五歲的祥嫂心裡一直想重塑昔日完整的家。○六年十月,她在壽宴與曾形容為「紅 衞兵」的四個子女三吻泯恩仇畫面前,鄧家早已在人月團圓的中秋節成功破冰。
坐在鄧家標記的宮廷梳化,祥嫂開腔講與四子女的破冰經過,當下都變得溫和,並眼泛淚光。畢竟過去那段與骨肉相爭產的日子,無論誰對誰錯,如在她身旁的小艾所言,雙方根本不好過。
九六年鄧家爭產,擾攘十多年。○四年母親節,初為人母的小艾因記掛母親,首度嘗試破冰,託人向祥嫂送上果籃及問候咭示好,但失敗而回。小艾說:「送果籃俾媽咪,但當時佢無反應,或者佢剛剛為酒樓股權打完官司,佢仲嬲緊,我怕再俾媽咪拒絕,唯有將心底話寫晒 喺一張咭,但最後我連寄出去 嘅勇氣都無。」

童言破僵局

對女兒首次破冰不為所動,祥嫂解釋氣難下:「果籃送到 嚟,有張咭寫住:『媽咪,我好掛住你,希望你可以俾個機會大家。』雖然內心一直有牽掛佢 哋,呢種係天性,但因意氣未消,個人亦未睇得透徹,思想未廣闊,於是我叫工人攞走果籃。」
雙方關係繼續僵持。○六年兆榮的三歲兒子,在永祥大廈頂樓見到爺爺的靈位,童言無忌,問怎麼沒有 嫲 嫲,又問是否死了?令鄧家大人不知如何應對,卻一言驚醒夢中人。於是小艾第一個主動致電母親,抑壓已久的記掛,小艾說當日劈頭第一句就直接講:「媽咪我好掛住你,不如大家出 嚟食飯慶祝中秋。或許佢(祥嫂)對我咁突然 嘅邀請 嚟唔切反應,媽咪 喺電話呆 咗幾秒先答應。為 咗表示我 哋誠意,阿哥兆尊同細佬妹之後逐個打電話俾媽咪。」
說到那個破冰電話,幾硬淨的祥嫂,因十多年的孤清被觸動,情緒帶點激動說:「 嗰刻喺電話無言幾秒,係因為……(哽咽續說)我內心 嘅痛苦湧晒出 嚟,既然今日大家都明白親情可貴,當初何必搞成咁。聽到佢 哋電話,幾執着 嘅祥嫂都心軟,嬲過就算,經歷過家變,好深切體會一家人 嘅珍貴。」

夜靜思過

十多年為官司不相往來,再次見面,恍如隔世。小艾說到在中環蘇淅會跟母親的破冰飯局,帶點哽咽說:「當刻我 哋一見面大家就攬住,感覺係前所未有 嘅溫暖,雖然好激動好想喊,但大家都抑壓住,爭產件事已經好似俾人感覺係一場鬧劇,依家又突然和好,唔想俾人睇到喊晒似鬧劇,所以 嗰晚大家都忍住。」
過往跟子女有隔膜的祥嫂,破冰之後願意向子女打開心扉,把過往做惡死專橫母親的苦衷道出,與小艾彼此剖白十多年來的孤單痛苦,結果兩母女相擁喊足一晚。
講起祥嫂就鼻子一酸:「過往十多年,我經常夜靜思己過,頭家搞成咁,我檢討自己錯與對。知道以前我太投入着緊老公事業、物業同健康,忽略 咗仔女,針無兩頭利,我選擇擺晒時間精神 喺老公身上,就預 咗同仔女關係疏離。我唔想由第二個服侍祥哥,否則第五任祥嫂接上去,所以我要霸住個位,但當時仔女入世未深,佢唔明我苦處。
「今日小艾亦都經歷過兩段婚姻,知道妻子同母親不易為。當年為 咗壓得住仔女,我一言堂政策,當時我 喺佢 哋心目中係無商無量 嘅阿媽。不過人係要有經歷先反省,依家知道同仔女坦白溝通好重要。我做阿媽要識包容同原諒,否則我內心也不忍,亦對祥哥唔住。依家最開心就係仔女成日 嚟探我。」

4億遺產

祥哥離世後,剩下 4大遺產,當中包括永祥大廈、西貢坑口 4萬呎地皮、筲箕灣楚留香酒樓鋪位以及澳娛股份,據估計當時遺產總值高達 4.2億港元,夠鄧氏子女用過世。鄧兆尊曾表示單係遺產稅便高達八千萬港元,可惜經過 97金融風暴洗劫,鄧氏資產大縮水,唯有變賣套現。 03年,鄧氏子女以 9,540萬港元將永祥大廈售予東華。

Sport祥哥少見

祥嫂變小孩

當日互不相讓,今日互相體諒。
「阿媽令我最感動一番話,就係講:『無論仔女對與錯,做阿媽 嘅始終會企 喺仔女 嗰邊,一定支持我 哋。』佢話呢番話埋藏 喺心裡面十幾年,等到 嗰晚終於可以講出 嚟。我做仔女何嘗唔係等緊團聚和好呢一日,其實 嗰十幾年大家都好痛苦,我同媽咪講:『我已經失去 咗爹哋,唔想無埋你,我唔想再有遺憾。』
「以前唔理解媽咪點解咁惡,依家明白佢當日唔係咁惡咁硬淨,爹哋就唔會有呢番事業,佢 嘅惡係環境所迫。」小艾說。
小艾說祥嫂這幾年間變得祥和,昔日硬淨打天下的母親,今天如小孩子一樣,整天愛被家人呵住。
「依家媽咪 嘅慈祥同溫柔係以往從未見過,佢好 enjoy做番一個小女人。成日要黐實仔女,連阿哥剪頭髮佢都要跟埋去。以前我 哋想表達意見,佢會叫我 哋收聲,依家同我 哋好多 嘢講,仲成日問:『阿女,我頭先講 嘢有無過分 咗?』之前佢為 咗要揀最新鮮最靚 嘅生果俾仔女同孫食,半夜起身走去果欄入貨,又經常七、八點起身同工人去街市買 嘢 㷛湯,到下午就車出嚟送湯俾我 哋飲。我同媽咪講,我 哋係仔女,受唔起佢咁做。
「之前雙方錯失 咗十幾年 嘅相處時間,往後日子我要補償番俾媽咪,我唔心急搵伴侶,因為我要將時間俾晒媽咪。」

完美句號

正如祥嫂所講,興家旺業,小艾續說:「我 哋做好爹哋 嘅粵曲經典發燒碟,打算出三十隻,八月會先推出五隻,之後再會出 DVD,又會搞新馬師曾 嘅珍藏展覽,將爹哋 嘅藝術精神延續落去,我 哋一家亦計劃重開酒樓「楚留香」,因為呢個係我 哋一家 嘅心願。」

爭產鬧劇

觀眾最鍾意睇嘅爭產劇,早有現實版。 96年祥哥將 4億資產轉到子女名下,引爆鄧家爭產風波。祥嫂與鄧家子女分為兩大陣營,雙方各有支持。黃夏蕙、白韻琴等好友紛紛在電台發功為祥嫂講好話;至於鄧家子女則有幫理不幫親的十一姨洪國華及九舅父支持,總之鬧劇一幕接一幕,成為當年熱爆話題。

九舅父掟杯

96年底,鄧家爭產風波揭幕。祥哥正為東華錄影呼籲片段,祥嫂陪伴在側,小艾及兆榮突然殺出,聯同十一姨(洪國華)及九舅父,更帶埋記者直踩永祥大廈,踢門要求八舅父(洪家泉)還錢。事緣 93年,八舅父欠債百多萬,要鄧家子女做擔保,小艾及兆榮怒斥八舅父係「奸國舅」,九舅父亦一怒之下「掟杯」。

八舅父爆大鑊

八舅父洪家泉到新城電台在《盡訴心中情》節目中接受白韻琴訪問,爆鄧家爭產風波內幕,逐一數臭十一姨、九舅父及鄧家四名子女,包括踢爆鄧兆尊當年在加拿大闖禍,要祥嫂補鑊求情。

更多 壹週刊 文章

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載