蘋果日報 | APPLE DAILY
› 選擇地區
三藩市
紐約
洛杉磯
其他美國地區

工廈王子大反擊 - 宗菁華

歌賦街,今時唔同往日矣,開咗型格 boutique及日本拉麵店,類似牛記這類小店,又少一間。(林志謙攝)
最後更新: 0804 19:33 / 建立時間 (HKT): 0404 00:00

喺呢個社會,每有老鋪結業,都會引起唔少回響。好似歌賦街間牛記,本來交緊四萬幾蚊租,一加就加到十二萬,店主麥炳權不滿業主大咬,業主又話佢無特色,雙方唔再續約,做埋今個月二十一號就拜拜,引來唔少食客幫襯。呢個鋪本來係工廈大王楊耀松持有,自佢○三年過身後,就將遺產交咗俾三個仔,牛記老闆打「情」字牌話:「想當年佢老豆楊耀松未死,都嚟呢度食飯!」暗諷現業主無情。

工廈大王嘅大仔楊國佳,抵唔住頸向小宗提反擊,佢話老父指明將呢個鋪交由細佬楊國樑打理,佢無份,唔方便講嘢,只係鄭重澄清一句:「楊老先生從未於該店座位食牛腩。」近來歌賦街不斷發展,隔鄰開晒新式日本拉麵店、對面又有 agnès b. café,楊國佳坦言牛記無甚特色,真係「影衰業主﹗」點解咁講嘅?據知楊國佳伯父楊耀熾都做地產,後人仲做得唔錯,好似謝斐道嗰幢楊耀熾商業大廈,做埋酒吧、 Café集中地,收入唔錯。為咗喺家庭聚會時唔失禮,楊國佳講到明要打理好祖業,以示管理實力。所以話,有錢佬都有同輩壓力!

大國崛起

雖然內地三線城市啲廁所,仍然只得一條坑,但小宗認為大國已開始崛起。何解?上海車站呢個公廁,張貼咗多張指示,以圖畫教育公民。要蹲、要坐、定要企,大便定小便,揀好位置先至好去,睇吓幾乾淨!圖中嘅英文,仲要係無串錯字㗎!

柏文 BB發育完全睇

半年減咗八十磅,瘦到面都凹咗嘅孫柏文呢排好紅,仲被封做柏文 BB。聽到呢個名,真係少啲心血都唔得。佢自己都話:「連我阿媽都無叫過我 BB,一直係叫我肥仔。」其實睇番孫柏文啲 BB相,的確曾經可愛過、仲瘦過。小學時候,佢最鍾意抱住「馬仔」影相,佢話:「我老豆一直想養隻馬,養唔到咪養狗,阿媽話咁不如叫隻狗做『馬仔』。」「馬仔」死時,孫柏文抱住馬仔,哭得死去活來,眼淚成身都係,這種少男情懷,佢可謂無變過。變嘅,只係身形,因為到咗大學, BB已經開始肥到走樣。

Give me a book:睇書學知彼

最近中港照相﹙ 1123﹚主席孫大倫 Dennis,向小宗介紹咗本書,叫《當論語遇上算盤》。本書係明治時期,日本人澀澤榮一所寫,講點運用孔子嘅哲學喺商界「搵銀」,「日本人做嘢咁仔細,皆因崇尚儒家哲學,包括『義』同『信』,唔會下巴輕輕,偷工減料,做事肯堅持,所以唔少企業都可以傳承下去!」 Dennis話作者係日本企業教父,事關係佢創立「株式會社」呢種日本現代企業制度,好鬼猛料。讀書了解日本人生意之道,知己知彼,難怪 Dennis間中港照相可以獨家代理富士攝影器材產品近半個世紀。
英皇「樓神」張炳強亦認同知己知彼嘅重要性,佢睇嘅係《 Shattered Sword: The Untold Story of the Battle of Midway》。本書係講第二次世界大戰,日本偷襲美國中途島嘅一場著名戰役。佢話呢場戰爭好有啟發性:「日本部署好偷襲中途島,點知美軍收集到情報,知道晒佢嘅部署,成功反擊日本。」佢話做生意都一樣,收集情報好重要。「唔好覺得自己弱小就一定唔夠人『鍊』,知己知彼嘅話一樣贏到!」

本週車牌

格外開恩?
銀行條例規定,要用 BANK呢隻字為招牌,必定要先請准攞命陳(即係金管局總裁)。呢架波子何以咁威用得呢四個字母做車牌。車主丁元中,做開科技公司,莫非佢同攞命陳有親?

金牙大狀講嘢

黑社會做特首
「禮義廉」葉國謙話特首先決條件係愛國愛港,並非其他原因,而係鄧小平話過要咁。按呢個邏輯,最有資格選特首者,可能係黑社會。
鄧小平有冇講過律師、醫生、以至測量師「愛國愛港」,冇正式記錄;但總舵主肯定講過「黑社會也有愛國的」,故此黑社會又豈不比其他界別更有資格選特首?明乎此,大家則又應該知道舊年特首選舉,何以有流浮山小桃園之會矣。
不過,總舵主更加講過,「中央政府對香港問題的發言,我說的是正式的」。其餘趙紫陽、姬鵬飛、許家屯、外交部長及主管中英談判的發言人,亦都算數。「除此之外,所有其他的發言都無效,都不是正式的。」故此即使貴為人大副委員長耿 飆及中共駐聯合國代表黃華,佢哋有關香港嘅發言都係「胡說八道」。
總舵主、趙總理、姬主任已矣,而許家屯又去咗羅省休息度假,但咁唔等於話喬曉陽、王光亞、梁愛詩、譚惠珠、葉國謙之流就可以胡說八道噃。總舵主幾時話過佢哋可以講嘢?

中環人語迷你版

“選舉權普及平等,並不包括提名和被選權。”
估中邊個中環人講呢句說話,送你 JWATCH J-37水晶版藍寶石鏡面限量版手錶一隻
有意參加者,請於四月八日 24:00前將答案電郵 mailto:centralman@nextmedia.com
小宗只接受電郵,郵寄免問。

本刊員工及直系親屬不得參加。
為求公平及杜絕偷步搶答起見,請於星期三下午一時後來電郵競猜答案;在此之前發出之電郵作廢。
超過一位讀者估中,先到先得,恕不接受上訴。
答案及中獎者姓名將於一三年四月十一日本欄揭曉。

上週人語揭曉

“呢個唔係請示。”
答案:梁振英
得獎者: Chan Suk Han
中獎時間: 1:00pm 27/3/13

廣告時間

你有某財團嘅黑幕想爆?你知邊間上市公司造假?
你仲想舉報地產霸權嘅不公?
歡迎你將財金界嘅寃屈或過癮八卦事,爆俾《壹仔》財經組知,一切報料,均會保密!
爆料熱線/whatsapp: 6829 5929


宗菁華

更多 壹週刊 文章

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載